داۋرەن قۋات. شالعايى كەڭ شاپان جامىلعان كەدەندىك وداق
شالعايى كەڭ شاپاننىڭ كىمدىكى ەكەنىن وقىرمان جاعى بەك ءتۇسىنىپ وتىرعان شىعار دەگەن ويدامىز. سوندىقتان «اي باعىپ، اسپان شارلاماي» ايتپاعىمىزعا كوشەيىك.
الەم الپاۋىتتارىنىڭ اۋىلىنا بارىپ جايعاسقان ورىس ميللياردەرلەرىنىڭ ءبىر شوعىرى قازاقستاندا بيزنەس «ساۋىپ» ءجۇر. ولار كىمدەر دەيسىز عوي. ولار - 15,3 ملرد دوللارى بار الەكساندر مورداشەۆ دەگەن كىسى. 13,5 ملرد اقش دوللارىن الاقانىندا اۋناتىپ ۇستاعان ۆاگيت الەكپەروۆ دەيتىن اعاي. 10,8 ملرد دوللاردىڭ بۋىنا پىسكەن اندرەي مەلنيچەنكو دەيتۇعىن باي-پاتشا. ميحايل فريدمان (13,4 ملرد دوللاردىڭ يەسى، ارىقاراي جاقشانىڭ ىشىندە ورىس شونجارلارىنىڭ قاراجات كولەمى سيپىرمەن جازىلادى). پەتر اۆەن (4,3), گەرمان حان (8,5), الەكسەي كۋزميچەۆ (6,7), ولەگ دەريپاسكا (8,8) الەكساندر نەسيس (3,1) الەكساندر مامۋت (2,1) يگور التۋشكين (1,6) دەپ كەلەتىن ىعاي مەن سىعايلاردىڭ ءساندى-سالتاناتتى شوعىرى. وسىلاردىڭ قاي-قايسىسى بولماسىن قازاق جەرىندەگى قازبا بايلىقتىڭ ۇستىندە، جىلىكتىڭ مايى سورعالاعان باسىن عانا سورىپ، شالجيىپ جاتىر. مىسالى، Nordgold كومپانياسىنىڭ قوجايىنى الەكساندر مورداشوۆ بىرنەشە جەردەن گەولوگيالىق بارلاۋ جۇمىستارىن جۇرگىزىپ، سونىڭ ىشىندە جەرەك تاۋىنىڭ ەتەگىنەن التىن «تەرىپ» ءجۇر. Nordgold كومپانياسىنىڭ «كەرزى ەتىگىن» كيگەندەر كەزىپ وتكەن كەن ورىندارىندا 5,24 توننا مىس، 8,2 توننا التىن قورىنىڭ قويماسى بارى انىقتالىپتى. مورداشەۆ جەرەكتەن 2003-تەن بەرى قاراي جىل سايىن 1,6 توننا التىن ءوندىرىپ باستادى.
شالعايى كەڭ شاپاننىڭ كىمدىكى ەكەنىن وقىرمان جاعى بەك ءتۇسىنىپ وتىرعان شىعار دەگەن ويدامىز. سوندىقتان «اي باعىپ، اسپان شارلاماي» ايتپاعىمىزعا كوشەيىك.
الەم الپاۋىتتارىنىڭ اۋىلىنا بارىپ جايعاسقان ورىس ميللياردەرلەرىنىڭ ءبىر شوعىرى قازاقستاندا بيزنەس «ساۋىپ» ءجۇر. ولار كىمدەر دەيسىز عوي. ولار - 15,3 ملرد دوللارى بار الەكساندر مورداشەۆ دەگەن كىسى. 13,5 ملرد اقش دوللارىن الاقانىندا اۋناتىپ ۇستاعان ۆاگيت الەكپەروۆ دەيتىن اعاي. 10,8 ملرد دوللاردىڭ بۋىنا پىسكەن اندرەي مەلنيچەنكو دەيتۇعىن باي-پاتشا. ميحايل فريدمان (13,4 ملرد دوللاردىڭ يەسى، ارىقاراي جاقشانىڭ ىشىندە ورىس شونجارلارىنىڭ قاراجات كولەمى سيپىرمەن جازىلادى). پەتر اۆەن (4,3), گەرمان حان (8,5), الەكسەي كۋزميچەۆ (6,7), ولەگ دەريپاسكا (8,8) الەكساندر نەسيس (3,1) الەكساندر مامۋت (2,1) يگور التۋشكين (1,6) دەپ كەلەتىن ىعاي مەن سىعايلاردىڭ ءساندى-سالتاناتتى شوعىرى. وسىلاردىڭ قاي-قايسىسى بولماسىن قازاق جەرىندەگى قازبا بايلىقتىڭ ۇستىندە، جىلىكتىڭ مايى سورعالاعان باسىن عانا سورىپ، شالجيىپ جاتىر. مىسالى، Nordgold كومپانياسىنىڭ قوجايىنى الەكساندر مورداشوۆ بىرنەشە جەردەن گەولوگيالىق بارلاۋ جۇمىستارىن جۇرگىزىپ، سونىڭ ىشىندە جەرەك تاۋىنىڭ ەتەگىنەن التىن «تەرىپ» ءجۇر. Nordgold كومپانياسىنىڭ «كەرزى ەتىگىن» كيگەندەر كەزىپ وتكەن كەن ورىندارىندا 5,24 توننا مىس، 8,2 توننا التىن قورىنىڭ قويماسى بارى انىقتالىپتى. مورداشەۆ جەرەكتەن 2003-تەن بەرى قاراي جىل سايىن 1,6 توننا التىن ءوندىرىپ باستادى.
«لۋكويلدىڭ» اكتسيونەرى، ءارى «لۋكويلدىڭ» ەنشىلەسى «لۋكويل وۆەرسيز» كومپانياسىنىڭ يەسى الەكپەروۆ «تورعاي-پەترولەۋم» (قۇمكول جانە شىعىس قۇمكول), «قاراشىعاناق»، Buzachi Operating Ltd (سولتۇستىك بۇزاۋشى), «قاراقۇدىقمۇناي» جشس، «قازاقويل-اقتوبە» جشس (الىمبەكمولا، قوجاساي), جامباي، وڭتۇستىك زابۋرىن سياقتى قارا التىنعا باي وڭىرلەر مەن قازاقستاندىق كاسىپورىندارعا باسشىلىق جاساپ، جىلىنا سىرتقا 34,4 ميلليون باررەل مۇناي ەكسپورتتايدى.
ولەگ دەريپاسكا قازاقستانداعى كومىر شارۋاشىلىعىنىڭ كولەمدى ءبىر پۇشپاعىن ۇستادى.
ميحايل فريدمان، پەتر اۆەن، گەرمان حان، الەكسەي كۋزميچەۆ - «الفا-گرۋپپ» كونسورتسيۋمنىڭ اكتسيونەرلەرى. «بيلاين» دەسە جۇرتتىڭ ءبارى بىلەتىن برەندى بار «ۆىمپەلكوم» كومپانياسى وسى ۇجىمنىڭ مەنشىگى. «ۆىمپەلكومنىڭ» ەنشىلەسى - «ۆىمپەلكوم» جشس قازاقستانداعى ۇيالى بايلانىس وپەراتورلارىنىڭ جەتەكەشىسى «كار-تەلگە» قاراپ وتىر. مىنە، وسىلاي كەتە بەرەدى... Forbes جۋرنالىنىڭ تۇراقتى كەيىپكەرلەرىنە اينالعان بۇل ادامدار - جەر پلانەتاسىنىڭ ەڭ باي تۇرعىندارى، جىلدىق تابىسى تەك ميللياردپەن ەسەپتەلەتىن ايگىلى الپاۋىتتار كوشىنىڭ باسىنداعى تۇلعالار. كورىپ وتىرسىزدار، ورىس شونجارلارى قازاق جەرىندە اياقتى الشاڭ باسىپ، قۇلاشتى قالاي سەرمەيىن دەسە دە ەرىكتى. ونىڭ ۇستىنە بايلىقتان باسى اينالىپ، بالاعىنان ءبيتى توگىلگەن «ەۋرازياگرۋپپ»، لاكشمي ميتاللداردىڭ «ميللياردتتار ونىدەرتىن پلانتاتسياسى» بولىپ تۇرعان قازاقستانعا «بەرسە قولىنان، بەرمەسە جولىنان» الىپ ۇيرەنگەن ورىستار نەگە وڭمەڭدەي ۇمتىلماسقا، نەگە اۋىزدى ارانداي اشىپ سالماسقا؟ ارىبىرىدەن سوڭ جوعارىدا ءبىز اتى-ءجونىن اتاعان ورىستار قازاق جەرىندەگى ەن بايلىقتى بابادان قالعان مۇرا - ەنشىلى دۇنيەسىندەي كورىپ، وزگەلەردەن ولەردەي قىزعانىپ جۇرگەن بولسا، وعان ەش تاڭدانبايمىز. بىراق وسى ارادا ءبىر عانا «نو» بار. سول «نو» قازاقتىڭ بۇرىنعى نوقتالى باسىن ورىستىڭ قولىنا ەركىن تيگىزبەي تۇر. ەركىن تيگىزبەيتىن سەبەبى - قازاقستان قازىر تاۋەلسىز ەل. پۋتين ايتپاقشى، «حح عاسىردىڭ الاپات سۇمدىعىن» پايدالانىپ بوداندىقتان بوستاندىققا جەتكەن ەلدىڭ ءبىرى (پۋتين كسرو-نىڭ كۇيرەۋىن الاپات سۇمدىققا - كاتاستروفاعا تەڭەگەن بولاتىن), بۇۇ-نىڭ مۇشەسى. قازاقستاننىڭ بىرككەن ۇلتتار ۇيىمىنا مۇشە ەكەندىگىن اشۋ ۇستىندە ايقايلاپ وتىرىپ سەنات دەپۋتاتى عاني قاسىموۆ تا ەسىنە ءتۇسىردى (قاراڭىز: http://masa.kz/article/view/id/3904 ). دەمەك، قازاقستاندى بۇرىنعىداي بۇلتشا ءتونىپ كەلىپ، بۇلتاققا جىبەرمەي «بۇتقا قىسىپ الىپ جاتۋ» قاتە. ايتكەنمەندە ازەلگى داستۇردەن ورىس بيلىگى دە، ورىس الپاۋىتى دا جاڭىلعان جوق. ول ءداستۇر - قازاقتى كوپ قيقاڭعا جەتكىزبەي باسۋدىڭ ءداستۇرى. ماسەلەنكي، پۋتين بيلىككە كەلدى دە كاسپي تەڭىزىنىڭ سول جاعالاۋىنان قازاق دالاسىنا ءدۇربى سالدى. كوردى، ءبارى ورنىندا ەكەن. مىزعىماپتى. ەندى نە تۇرىس؟ قازاقستانعا رەسمي ساپاردى جيىلەتىپ جىبەرىپ ەدى، ورىس پاتشاسىن ءۇش عاسىر تولعاندىرعان جايتتىڭ ءبارى تولايىم رەتىن تاپتى. «قازاقستان دەربەس مەمەلەكەت. ءوز ميزامى وزىندە. ءوز نانىن ءوزى تاۋىپ جەيتىن جاعدايدا. اش قالسا، اسىرامايمىز. اۋىپ كەتسە، الدىنان توسپايمىز. بىراق، ىرقىمىزدان شىعارماي، ىعىمىزدا ۇستايمىز. قازىنا بايلىعىن الدىمەن ورىس شونجارلارىنىڭ قولىنا ۇستاتىپ، سودان سوڭ رەسەي مەملەكەتىنىڭ مەنشىگىنە تىزە بەرەمىز. بۇدان ارتىق نە كەرەك؟» وسىلاي قيسىنداۋىمىزعا مىسال: ۆاسيلي انيسيموۆ ماسەلەنكي، 2010 جىلى قازاق ۋرانىن رەسەيدىڭ مەملەكەتتىك ارمز حولدينگىنە ساتىپ كەتتى. بىلاي عوي اڭگىمە: انيسيموۆ باسكە دەگەن جىگىت رەسەيدەن سالاڭ ەتىپ قازاقستانعا كەلە سالادى دا جەردۇنيەنىڭ حالقى جۇتىنىپ قاراپ وتىرعان قازاق جەرىندەگى ۋرانعا قوجايىن بولىپ شىعا كەلەدى. سويتەدى دە، ونى ءبىراز اينالدىرىپ، اۋىرەلەپ، قىزىعىن كورىپ بولعان سوڭ رەسەيدىڭ مەملەكەتتىك حولدينگىنە ساتىپ كەتە بارادى. ال، «ۋران قورى ەسەبىنەن قازاق ەكىنشى ورىندا» دەپ ءبىز ءجۇرمىز مىندا بوركىمىزگە سىيماي. ەندى ميعا سالىپ كورىڭىزشى: نە بولدى؟ ۋران قايدا، قازاق قايدا؟ ايتپاقشى، سول ۋراندى «ءوزىمىز وندىرەمىز، ءوزىمىز وندىرە الماساقتا ورىسسىز وندىرەمىز» دەپ تالاپتانعان ءبىر قازاق تۇرمەدە جاتىر. مۇحتار جاكىشوۆ. ەسىڭىزدە مە؟ ول بايقۇستى وسى كۇنى ىزدەپ، سۇراپ قوياتىن پەندە جوق. ايتەۋىر، «ۇرلاپتى» «ءىشىپتى، «جەپتىمەن» ءىستى بولدى دا اباقتىعا قامالدى. سونىمەن، «قازاق قايدا؟» دەدىك-اۋ. قازاق - اباقتىدا. اباقتىدا ەمەس، قازاقى شاپان جامىلعان وتىراشىلدىقتىڭ تار شەڭگەلىندە. قازاقتىڭ بۇگىنگى دە-يۋرە تۇرىندەگى تاۋەلسىزدىكتى تۇسىنە الماي ءجۇرۋىنىڭ سەبەبى دە وسىندا. قارا بازاردا قاپ ارقالاپ، بىرەر قارانىڭ (مالدىڭ) سۇمەسىنە قاراعان قازاق بىلاي تۇرسىن، توقسانىنشى جىلداردىڭ باسىندا ءتاپ-ءتاۋىر كاسىپ باستاعان ازاماتتاردىڭ ءوزى بۇل زاماندا تەنتىرەپ كەتتى. دانيال احمەتوۆتىڭ ۇكىمەتى ءبىر، كارىم ءماسىموۆتىڭ ۇكىمەتى ەكى - ەزگىگە سالا بەرگەن سوڭ سورلىلاردىڭ الدى قاشىپ، ارتى اۋزىن جاۋىپ اۋىلدا ءجۇر. الماتىنىڭ ىرگەسىندەگى شاعىن ءبىر ەلدىمەكەندە تاۋىققا جۇمىرتقا باستىرىپ، ءونىمىن ماسكەۋگە دەيىن اپارىپ ساتقان، قازاقشامىزبەن قايىرساق، «جۇمىرتقادان ءجۇن قىرققان» مارعۇلان سەيسەنباەۆ سياقتى ىسكەرلەردىڭ قازىر بار-جوعى بەلگىسىز. «استانا-موتورس»، تاعى قايسىسى ەدى قۇداي-اۋ، ءبارىنىڭ ءۇنى ءوشتى. مىنە، ەندى «جىعىلعانعا جۇدىرىق» - كەدەندىك وداق كارىنە ءمىندى. اڭگىمە باستابىنداعى ورىس بايلارىنىڭ قازاق جەرىندەگى كەن ورىندارىن مەنشىكتەۋىنە ورالساق، كەدەندىك وداق نازارباەۆقا دا، پۋتينگە دە ەمەس، الدىمەن سول الپاۋىتتارعا كەرەك بولعان سياقتى. ويتكەنى «ىسكەرلەر قاۋىمى» قايدا بارسا دا ءوز زاڭىن قالتاسىنا سالىپ بارعاندى، ءوز سالتىمەن ءومىر سۇرگەندى قالايدى. وزگەلەردى وزدەرى بەلگىلەگەن تارتىپپەن ورگىزۋدى وزدەرىنە مىندەت سانايدى. ونداي مۇمكىندىككە جەتۋ ءۇشىن الدىمەن قاباق باعىپ، اڭىس اڭدىپ كورگەن ابزال: باسپاسوزبەن جۇمىس ىستەي ءبىلۋ قاجەت. ورىس بايلارى وسىنى قاپىسىز ۇعىپ قازاقستانداعى ءورىستىلدى باسپاسوزگە اۋقىم تۋدىرۋمەن بولدى. استىرتىن قارجىلاندىردى، بارىن توكتى، ايامادى. ناتيجە تاماشا. ءورىستىلدى ءباسپاسوز تابانداپ وتىرىپ قازاقستاندى رەسەيدىڭ شوۋلارىنا شومىلدىرىپ، كوپشىلىك تۇتىناتىن مادەنيەتتىڭ ەركىنە ەلىكتىرىپ، ۇلتتىق سانانى سانسىراتىپ، نە دەسەڭ سوعان ىلىعاتىن تۇتاس توبىرعا اينالدىرىپ بەرە سالدى. قىزىق قىلعاندا، وسىنىڭ ءبارىن كورە، بىلە تۇرا، قازاق بايلارى ايتىسقا اۆتوموبيل تارتۋ ەتكەننەن ارىعا بارعان ەمەس. شاماسى، قازاقتىڭ بايشىكەشتەرى ۇلتتى رۋحاني تۇلەتەتىن، ۇلتتى مۇراتتى، ماقساتتى جولعا باستايتىن، ءىسىن ىلگەرى وزدىراتىن «ۇلتتىق جوبا» -- ايتىس دەپ تۇسىنەتىن بولسا كەرەك. ويتكەنى، قازاق باسپاسوزىمەن بىرىگىپ، قازاق ءباسپاسوزى ارقىلى قازاق بيزنەسىن قورعايتىن، ۇلتتىق-ازاماتتىق قوعام قۇرۋ يدەياسىنا قازاق كاسىپكەرلەرى ءالى باس قاتىرا قويعان جوق. كۇندەردىڭ كۇنىندە راس، قازاق بۋرجۋازياسى دا ويانار، ۇلتتىڭ قامىن كۇيىتتەر، بىراق وعان دەيىن قازاق پەن قازاق ءباسپاسوزىنىڭ ەسەسى اركىمگە كەتىپ، ءسوزى وتپەي قورىنىپ قانا ءومىر سۇرەرى انىق. ايتپەسە، «ورىستان دوسىڭ بولسانى...» قازاقتىڭ قاقساپ ايتقانىنا قاي زامان، بىراق سونى قۇلاققا ىلەر پەندە كەم.
وتكەندە مەملەكەتىمىزدىڭ باسشىسى، بۇكىل تۇركى ەلىنىڭ بۇگىنگى اقساقالى نۇرسۇلتان ءابىشۇلى تۇركياعا ساپارالاپ قايتتى. نە دەسەكەتە، وسى وسمان-تۇركىلەردىڭ قازاق-تۇركىلەرگە دەگەن ىقىلاسى ءتۇزۋ، پەيىلى ەرەكشە. قازاقستان كسرو-نىڭ قۇرامىندا ەگەمەن ەل رەتىندە ەندى ءبىلىنىپ جاتقان تۇستا ەلباسىمىز تۇركياعا بارعان ەكەن، سول كەزدەسۋدى كوزىمەن كورگەن حاسان ورالتاي اعا «تۇرىكتەر قازاق باسشىسىن اقش پرەزيدەنتى كەلگەندەي اسا زور قۇرمەتپەن قارسى الدى» دەپ جازادى «ەلىمايلاپ وتكەن ءومىر» كىتابىندا. وسمان-تۇركتەردىڭ سول قۇرمەتى - قۇرمەت. وسى جولى دا نازارباەۆتى اعايىندىق ىستىق جۇرەكپەن قارسى الدى. اۋزىنا قارادى. ايتقانىن ىقىلاسپەن تىڭدادى. «تۇرك كاسىپكەرلەرى، بىرىگىڭدەر!» دەپ ۇران تاستاپ ەدى، ءتىپتى قاندارى قىزىپ، قيقۋلاپ جىبەرە جازدادى. قازاق ستاتيستيكالىق اگەنتتىگى جۋىردا جاريا ەتكەن دەرەككە قاراساق، نۇرەكەمىزدىڭ «تۇرىكتەر، بىرىگىڭدەر» دەيتىندەي ءجونى بار ەكەن. سەبەبى، قازاقتىڭ كەن ورىندارىن، جىلى-جۇمساعىن ورىستار باسىپ قالىپتى. رەسمي اقپارعا كوز جۇگىرتىڭىز:
قازاقستاندا رەسەي ەلىنىڭ 9003 وكىلدىگى، فيليالدارى جانە زاڭدى تۇلعالارى تىركەلگەن. قازاقستان ەكونوميكاسىنداعى شەتەل مەملەكەتتەرىنىڭ توپ-20 تىزىمىندە ەكىنشى ورىندا - تۇركيا (3899), ودان كەيىن - قىتاي (2778), ءتورتىنشى ورىندا - وزبەكستان (1849), بەسىنشى ساتىدا - گەرمانيا (1236), التىنشى ورىنعا اقش تۇراقتاعان. بۇل ەلدىڭ مەملەكەتىمىزدە 1144 كاسىپورنى جۇمىس ىستەيدى. سونداي-اق تىزىمدە نيدەرلاندى، كيپر، شۆەيتساريا، كحدر، يتاليا سياقتى مەملەكەتتەر دە بار.
كوردىڭىز بە، مىنەكەي، قازاقستان ەكونوميكاسىنداعى شەت مەملەكەتتەر كوشىنىڭ بۇيداسى رەسەيدىڭ قولىندا. سول رەسەي الگى «بۇيدانى» بۇيىم كورگىسى كەلمەيدى. «بۇدان باسقاسىن دا بەر، بەرە بەر» دەيدى. نازارباەۆتىڭ «ماڭگىلىك دوستىق ەلى» - رەسەيدەن ەپتەپ رەنجىپ قايتۋىنا وسى داسەبەپ بولعان شىعار. ەلباسىمىزدىڭ قاباعاىنداعى كىربىڭدى ءباسپاسوز بىردەن اڭعاردى. ونى ءبىز نازارباەۆتىڭ تۇركياعا ساپارى حابار مەن ۇلتتىق ارنادان ەرەكشە ەكپىن تاۋىپ حابارلانعانىنان بىلدىك. ءيا، قازاق پرەزيدەنتى دوسىنا وكپەلەپ قالعان قاباقپەن قايتتى. ەڭ دۇرىسى ول وكپە-رەنىشىن «ەگەر ءسىز بىلاي ەتسەڭىز، ءبىز دە بىلاي ەتە الامىز» دەگەن قاداممەن ۇقتىرىپ قانا قويدى. راسىندا، كەشەلى بەرگى تۇركيا-سيريا جانجالىندا سيريانى اشىق قولداپ تۇرعان رەسەيگە قىر كورسەتىپ، قازاقستان باسشىسىنىڭ تۇركياعا بارۋى، تۇركى جۇرتىن بىرلىككە شاقىرۋى ەسكى دوستاردىڭ ءجۇزشايىسىپ قالعانىن سەزدىرسە كەرەك. بىزگە جەتكەن اقپاراتقا سۇيەنسەك، نازارباەۆ پەن پۋتين بايقوڭىر عارىش ايلاعىنان «بايتەرەك» كەشەنىنىڭ قۇرىلىسىن بىرىگىپ جۇرگىزۋ ماسەلەسىندە توقايلاسپايتىن تاراپتار باعىتىنان تابىلعان. بۇل اڭگىمەنىڭ ءمانى مەن مانىسىنە الداعى ۋاقىتتا ورالاتىن بولامىز. سەبەبى، نازارباەۆ تۇركيادان ورالىسىمەن ورىس جۋرناليستەرىنىڭ كەيبىر ماڭىزدى ساۋالدارىنا جاۋاپ بەرۋ ەسەبىندە قازاقستاننىڭ رەسەيمەن جانە باسقا ەلدەرمەن بارىس-كەلىسى، الىس-بەرىسى باياعى جولىنان اينىمايتىنىن قاداپ ايتتى. مينيستر ساۋات مىڭباەۆتىڭ اۋزىنان شىققان باكۋ-جەيحان-تبليسي باعىتىندا باتىسقا مۇناي ايداۋدىڭ دا اڭگىمەسى ازىرگە وسىمەن ءتامام بولا تۇراتىنعا ۇقسايدى. ەسەسىنە رف پرەزيدەنتى پۋتين ورتاق ۆاليۋتا تۋرالى ءسوزدى قايتادان قوزدىرۋعا كىرىستى. تاياۋدا ۆلاديمير پۋتين حالىقارالىق «ۆالداي» پىكىرتالاس كلۋبىنىڭ مۇشەلەرىمەن كەزدەسىپ: «ورتاق ەكونوميكالىق كەڭىستىكتىڭ ايماعىنا ورتاق ۆاليۋتا ەنگىزۋ ءۇشىن رەسەيدىڭ، قازاقستاننىڭ جانە بەلارۋسسيانىڭ قارجىلىق ءام ماكروەكونوميكالىق ساياساتىن ۇندەستىرۋ كەرەك» دەدى. رەسەي دۋماسىنداعى تمد ىستەرى مەن وتانداستار كوميتەتىنىڭ توراعاسى لەونيد سلۋتسكوي سياقتى ساياساتكەرلەر بولسا، ەۋرازيالىق پارلامەنت كەدەندىك وداقتىڭ كەڭىستىگىنەن ءتۇبى ءبىر ورىن تەبەتىندىگىن ايتۋدا. ال، شالعايى كەڭ شاپان جامىلعان كەدەندىك وداققا مۇنداي پارلامەنتتىڭ سىيىپ كەتەرىنە ءبىزدىڭ كۇمانىمىز قالماي بارادى.
«Abai.kz»
