3 مامىردا قازاقستان پرەزيدەنتى قاسىم-جومارت توقاەۆ بالا قۇقىقتارىن قورعاۋ تۋرالى زاڭعا قول قويدى. بۇل زاڭعا سايكەس، بيلىك مەسسەندجەرلەر مەن الەۋمەتتىك جەلى يەلەرىنەن بالالارعا كيبەربۋللينگ دەپ تانىلعان كونتەنتتى الىپ تاستاۋدى تالاپ ەتە الادى. 20 ساۋىردە ءماجىلىس زاڭ جوباسىنا سەنات ەنگىزگەن وزگەرىستەرمەن كەلىسكەن.

ول كەزدە سەنات كيبەربۋللينگتى انىقتاۋ ءۇشىن ساراپشىلار كوميسسياسىن قۇرۋ جانە كيبەربۋللينگ دەپ تانىلعان ماتەريالدى الىپ تاستاۋ ماسەلەلەرىن ناقتىلايتىن وزگەرىستەر قوسقان. سەنات توراعاسى ماۋلەن اشىمباەۆ جوبادان اقپارات مينيسترلىگىنىڭ ينتەرنەت-رەسۋرستارعا، الەۋمەتتىك جەلى مەن مەسسەندجەرلەرگە ءوز بەتىنشە شەكتەۋ قويىپ، جۇمىسىن توقتاتۋىنا مۇمكىندىك بەرەتىن "كەڭ وكىلەتى" جويىلعانىن ايتقان.

سىنشىلاردىڭ ايتۋىنشا، بىلتىر قىركۇيەكتە بيلىك پارتياسى اتىنان سايلانعان دەپۋتاتتار ايدوس سارىم مەن دينارا زاكيەۆا ۇسىنعان زاڭ جوباسى بيلىكتىڭ قولىنا تسەنزۋرانىڭ جاڭا قۇرالدارىن بەرەدى. زاڭ جوباسى اۆتورلارى بولسا، بۇل وزگەرىس بالانى كيبەربۋللينگتەن قورعاۋعا، "قاۋىپتى كونتەنتتىڭ" تارالۋىمەن كۇرەسكە قارسى باعىتتالعان دەپ سەندىرگەن.

مەديا وكىلدەرى زاڭ جوباسىن ءالى دە جەتىلدىرۋ كەرەك دەگەن پىكىر ايتتى. جاڭا وزگەرىستەرگە قارسىلىق بىلدىرگەن جۇرت پەتيتسياعا قول جيناپ، ميتينگىلەر وتكىزدى. زاڭ جوباسىن پارلامەنت ماقۇلداعاننان كەيىن دە ونىڭ قابىلدانۋىنا قارسى جۇرت كۇرەسىن جالعاستىردى.

23 ساۋىردە الماتىدا الەۋمەتتىك جەلىلەردى رەتتەۋ تۋرالى زاڭ جوباسىنا قارسى رۇقسات ەتىلگەن ميتينگ ءوتتى. جيىنعا وتىز شاقتى ادام جينالدى. شاراعا قاتىسۋشىلار پرەزيدەنتتى ۆەتو قۇقىعىن پايدالانىپ، زاڭ جوباسىن كەرى قايتارۋعا ۇندەگەن.

Abai.kz