باتىس قازاقستان وبلىسىنىڭ پوليتسيا دەپارتامەنتى الەۋمەتتىك جەلىدە داۋ تۋدىرعان جەلى قولدانۋشىسىنىڭ ۇستىنەن قىلمىستىق ءىس قوزعادى. بۇل تۋرالى باتىس قازاقستان وبلىسىنىڭ پوليتسيا دەپارتامەنتى حابارلادى.

جەلى قولدانۋشىسى ماكسيم ياكوۆچەنكو قازاقستاننىڭ بىرقاتار قالالارىن رەسەيگە بەرىپ جىبەرۋدى تالاپ ەتىپ، قازاق حالقىنا ءتىل تيگىزگەن.

«الەۋمەتتىك جەلى قولدانۋشىسى ماكسيم ياكوۆەنكو قوعامدا كەڭ رەزونانس تۋدىرعان ارانداتۋشىلىق اقپاراتتان تۇراتىن جازبا جاريالادى. ول ءوز جازباسىندا قازاقستاننىڭ بىرنەشە قالاسىن رەسەيگە بەرۋ كەرەكتىگىن جازادى. وسى مالىمدەمەسىمەن ول ۇلتارالىق ارازدىقتى تۋدىردى. اتالعان فاكتى بويىنشا پوليتسيا دەپارتامەنتى قر قىلمىستىق كودەكسىنىڭ 174-بابى (ۇلتارالىق ارازدىقتى قوزدىرۋ) بويىنشا قىلمىستىق ءىس قوزعادى», - دەپ حابارلادى بقو پوليتسياسى.

پوليتسيا دەپارتامەنتى الەۋمەتتىك جەلىدە ارانداتۋعا بارۋعا بولمايتىنىن ايتادى جانە جەلى قولدانۋشىلارىن سىيلاستىققا شاقىردى. «بارلىق ازاماتتار ءبىر-بىرىنە دەگەن سىيلاستىق قارىم-قاتىناستى ساقتاۋى كەرەك، مۇنداي ارەكەتتىڭ ءبىر عانا ماقساتى – قوعامىمىزدا تۇسىنبەۋشىلىك تۋدىرىپ، جانجالدارعا سەبەپكەر بولۋ. سوندىقتان اباي بولىڭىز جانە ارانداتۋشىلىققا بوي الدىرماڭىز», - دەپ تولىقتىردى ءتارتىپ ساقشىلارى.

ال ماكسيم ياكوۆچەنكونىڭ ءوزى بولسا حالىقتان كەشىرىم سۇراپ، 15 جاسىندا سوققىعا جىعىلىپ، اۋرۋحانادا ەم العانىن ايتقان ۆيدەوسى جاريالاندى.

Abai.kz