بۇگىن ورتالىق كوممۋنيكاتسيالار قىزمەتىندە «سامۇرىق-قازىنا» اق رەفورمالاۋ باعدارلاماسى تانىستىرىلدى. «سامۇرىق-قازىنا» اق باسقارما توراعاسى الماسادام ساتقاليەۆ قوردا كادرلىق رەفورمالار جۇزەگە اسىپ، سونىڭ ناتيجەسىندە 2 ميلليارد تەڭگەدەن استام قاراجاتتىڭ ۇنەمدەلگەنىن ايتتى.

"نۇر-سۇلتان قالاسىنداعى كورپوراتيۆتىك ورتالىق قىزمەتكەرلەرىنىڭ سانى ەكى ەسەگە قىسقارتىلدى (248-دەن 124 ادامعا دەيىن), كومپانيالار توبىندا 106 كەڭەسشى جۇمىستان بوساتىلدى، «كەڭەسشىلەر» ينستيتۋتى ۇيىمدىق قۇرىلىمنان تولىعىمەن جويىلدى. قوردىڭ بارلىق شەتەلدىك وكىلدىكتەرى: لوندوندا، بەيجىڭدە، ابۋ-دابيدە جانە ماسكەۋدە جابىلدى. «سامۇرىق-قازىنا» توبىنداعى التى كومپانيانىڭ، ونىڭ ىشىندە «قازمۇنايگاز» بەن «QazaqGaz» كومپانياسىنىڭ باسشىلىعى وزگەردى. پەرسونالدى وڭتايلاندىرۋ «سامۇرىق-قازىنا» كورپوراتيۆتىك ورتالىعىنا 2 ميلليارد تەڭگەدەن استام قاراجاتتى ۇنەمدەۋگە مۇمكىندىك بەردى", - دەدى ول ءباسپاسوز ءماسليحاتىندا.

«سامۇرىق-قازىنا» قورى قورجىندىق كومپانيالاردى IPO/SPO-عا شىعارۋ جانە جەكەشەلەندىرۋ ارقىلى قوردىڭ ەل ەكونوميكاسىنداعى ۇلەسىن ازايتۋدى جوسپارعا ەنگىزدى. بۇل رەتتە قور ستراتەگيالىق اكتيۆتەردەگى باقىلاۋ پاكەتىن ساقتايدى. الداعى 5-8 جىلدا «سامۇرىق-قازىنا» ستراتەگيالىق حولدينگ بولىپ قالادى، الايدا ينۆەستيتسيالىق حولدينگ ۇلگىسىنە ءوتۋدى جالعاستىرا بەرەدى.

قازىرگى ۋاقىتتا قور گازبەن جابدىقتاۋ، سۋمەن جابدىقتاۋ، كولىك جانە ەنەرگەتيكا سالاسىندا بىرقاتار ءىرى ينۆەستيتسيالىق جوبالاردى جۇزەگە اسىرۋدا. ولاردىڭ باسىم بولىگى مەملەكەت باسشىسىنىڭ جولداۋىن ىسكە اسىرۋ جونىندەگى ۇلتتىق ءىس-شارالار جوسپارىنا ەنگىزىلگەن.

سونىمەن قاتار «سامۇرىق-قازىنا» اق مەن سىبايلاس جەمقورلىققا قارسى ءىس-قيمىل اگەنتتىگى جانە قارجى مونيتورينگى اگەنتتىگى اراسىندا ىنتىماقتاستىق تۋرالى مەموراندۋمدارعا قول قويىلدى. جينالىس بارىسىندا قوردىڭ الداعى جوسپارلارى تۋرالى ايتىلدى.

Abai.kz