"روسكوسموستىڭ" باس ديرەكتورى دميتري روگوزين «سارمات» بالليستيكالىق زىمىرانى رەسەيگە ۇناماي قالعان كونتينەنتتىڭ جارتىسىن جويىپ جىبەرە الاتىنىن ايتتى.

«مۇنداي زىمىران اگرەسسيۆتى ساياساتىمەن بىزگە ۇناماي قالعان جەردىڭ جارتىسىن جوق قىلىپ جىبەرە الادى»،- دەدى ول.

ءساۋىر ايىنىڭ سوڭىندا روگوزين "روسكوسموس" «سارماتتىڭ» ستراتەگيالىق ماقساتتاعى 46 اسكەري كەشەنىن شىعاراتىنىن ايتتى. ونىڭ ايتۋىنشا، 2022 جىلعا ۇشۋ-كونسترۋكتورلىق سىناقتار وتكىزۋ جوسپارلانىپ وتىر. سونىمەن قاتار، كراسنويارسك ولكەسىندەگى ءبىرىنشى پولكتى جابدىقتاۋعا ارنالعان سەريالىق زىمىراندار شىعارىلادى.

20 ساۋىردە رەسەي قورعانىس مينيسترلىگى رس-28 "سارمات" قۇرلىقارالىق زىمىرانىنىڭ العاش پلەسەتسك عارىش ايلاعىنان ءساتتى ۇشىرىلعانى تۋرالى حابارلاعان بولاتىن.

قازىرگى ۋاقىتتا كراسنويارسك ولكەسىندەگى باس زىمىران پولكىن جاڭا زىمىران كەشەنىمەن قايتا جاراقتاندىرۋعا دايىنداۋ جۇمىستارى جۇرگىزىلۋدە.

باتىس جۋرناليستەرى «سارماتتى» «جەردى توزاققا اينالدىرا الاتىن» قارۋ دەپ اتادى.

Abai.kz