رەسەي بانكتەرىنە سانكتسيا سالىنعاندىقتان، قازاقستاندا ورنالاسقان رەسەيدىڭ ەنشىلەس بانكتەرىندەگى تۇتىنۋشىلاردىڭ  9,2 ملرد تەڭگەسى بۇعاتتالىپ قالدى. بۇل تۋرالى قارجى نارىعىن رەتتەۋ جانە دامىتۋ اگەنتتىگىنىڭ (اررفر) ءتورايىمى ءمادينا ابىلقاسىموۆا حابارلادى.

"سانكتسيالىق تالاپتار اياسىندا جەكەلەگەن شەتەلدىك بانكتەر "سبەربانك", "الفا-بانك" جانە "بانك ۆتب (قازاقستان)"  شەتەل ۆاليۋتاسىنداعى كوررەسپوندەنتتىك شوتتارىن بۇعاتتادى. وسىنىڭ ناتيجەسىندە، بانكتەر شوتىنداعى جالپى سوماسى 9,2 ملرد تەڭگە (سبەربانك – 2, 7 ملرد تەڭگە، الفا-بانك  – 6,2 ملرد تەڭگە، بانك ۆتب  - 300 ملن) قۇلىپتالدى، - دەدى ابىلقاسىموۆا

ول سونداي-اق "سبەربانكتىڭ" جەكە تۇتىنۋشىلارىنىڭ  2,9 ملرد تەڭگەسى، "الفا-بانك" تۇتىنۋشىلارىنىڭ 3,9 ملرد تەڭگەسى بۇعاتتالعانىن اتاپ ءوتتى.

ونىڭ ايتۋىنشا، "الفا-بانكتىڭ" جاڭا اكتسيونەرى اتانعان "بانك تسەنتركرەديت" بانكتى اقش پەن باسقا  دا بىرقاتار ەلدەردىڭ  سانكتسيا تىزىمىنەن شىعارۋ بويىنشا ىسكە كىرىسكەن.

"بانك ۆتب (قازاقستان)" تۇتىنۋشىلارىنىڭ تولەم جانە اۋدارىم وپەراتسيالارى شەڭبەرىندە قارجىسىن بۇعاتتاۋ فاكتىلەرى جوق", - دەدى ابىلقاسىموۆا.

Abai.kz