ماسكۋدەگى قازاقتاردىڭ www.kazakh-tili.ru سايتى ممۋ-دىڭ اقپاراتتىق ساراپتامالىق ورتالىعىنا سىلتەمە جاساي وتىرىپ زاۋتبەك تۇرىسبەكوۆتىڭ رەسەيگە ەلشى بولىپ كەلەتىنى تۋرالى ءبىر دەرەكتىڭ شەتىن شىعاردى. وسىدان اي جارىم بۇرىن تاراعان اڭگىمەگە بايلانىستى رەداكتسيامىزعا ءمالىم اقپارات كوزى تۇرىسبەكوۆ مىرزانىڭ اگرەمان كۇتىپ وتىرعانىن راستادى. ياعني، زاۋتبەك تۇرىسبەكوۆ انە-مىنە قازاقستاننىڭ رەسەيدەگى ەلشىسى بولىپ اتانعالى جاتىر.

ماسكۋدەگى قازاقتاردىڭ www.kazakh-tili.ru سايتى ممۋ-دىڭ اقپاراتتىق ساراپتامالىق ورتالىعىنا سىلتەمە جاساي وتىرىپ زاۋتبەك تۇرىسبەكوۆتىڭ رەسەيگە ەلشى بولىپ كەلەتىنى تۋرالى ءبىر دەرەكتىڭ شەتىن شىعاردى. وسىدان اي جارىم بۇرىن تاراعان اڭگىمەگە بايلانىستى رەداكتسيامىزعا ءمالىم اقپارات كوزى تۇرىسبەكوۆ مىرزانىڭ اگرەمان كۇتىپ وتىرعانىن راستادى. ياعني، زاۋتبەك تۇرىسبەكوۆ انە-مىنە قازاقستاننىڭ رەسەيدەگى ەلشىسى بولىپ اتانعالى جاتىر.

اق وردانىڭ ءدالىزىن كەشىپ جۇرگەن ساياسي توپتار سىرتىنان «يۋجان» دەپ ات قويىپ ايدار تاققان زاۋىتبەك تۇرىسبەكوۆ وڭتۇستىك قازاقستان وبلىسىنىڭ تۋماسى. قاعاز تىلىمەن ايتساق، ەڭبەك جولىن ءوزى تۋىپ-وسكەن تۇلكىباس اۋدانىندا لكجو-نىڭ حاتشىسى بولىپ باستاعان. كەڭەس وداعىنىڭ تۇسىندا اتقا ءمىنىپ، اۋىزعا ىلىككەن تۇرىسبەكوۆ مىرزا بۇگىندە جۇلدىزى جانعان ازاماتتاردىڭ قاتارىندا كەلەدى. 1993 جىلى قر جوعارىعى كەڭەسىنىڭ دەپۋتاتى بولدى.  1993-1997 جىلدارى وڭتۇستىك قازاقستان وبلىسىنىڭ اكىمى دەگەن جارتى پاتشانىڭ قىزمەتىن اتقاردى. 1997-99 جىلدار ارالىعىندا ميگراتسيا جانە دەموگرافيا اگنەتتىگىنىڭ توراعاسى بولىپ جۇرگەن جەرىنەن پرەزيدەنت اكىمشىلىگى اپپارت باسشىسىنىڭ ورىنباسارى بولىپ شىعا كەلدى. اپپاراتتىڭ اۋاسىن ءبىر جىلداي جۇتىپ سوسىن مەملەكەتتىك قىزمەت ىستەرى جونىندەگى اگەنتتىكتى باسقاردى. پرەزيدەنتتىڭ ارنايى جارلىعىمەن 2003-2005 جىلدارى ىشكى ىستەر ءمينيسترى دەيتىن لاۋازىمدى قىزمەتتى اتقارىپ تاستادى. 2007 جىلدان بەرى ديپلوماتيالىق ميسسيانى موينىنا جۇكتەپ وكپە تۇسىمىزداعى وزبەكستاندا توتەنشە جانە وكىلەتتى ەلشى بولىپ وتىر. 58 جاستا.

زاۋكەڭ وڭتۇستىكتەگى باۋىرلارىمىزدىڭ وتكىرلىگىن، ابجىلدىگىن، ازىلگە جۇيرىك ايتقىشتىعىن، ساۋدا ساتىققا ەپتىلىگىن بويىنا مولىنان سىڭىرگەن ازامات. ونىڭ نەگىزگى بيزنەسى شىمكەنتتەگى ءىرى ساۋدا نىساندارى  مەن كاسىپورىندارعا شوعىرلانعان. شىرايلى شىمقالانىڭ اتىن سۇراپ تۇرعان اعايىن تۋىسقا دا باي ادام.

زاۋتبەك تۇرىسبەكوۆ وڭتۇستىكتىڭ بيلىگى ءۇشىن قوڭىرات رۋىمەن باسەكەگە ءتۇسىپ وتىراتىن دۋلات رۋىنىڭ بەل بالاسى. كەشەگى مارقۇم اسانباي اسقاروۆتان قالعان ەل بيلەۋ مەكتەبىنىڭ ۇزدىك تۇلەكتەرىنىڭ ءبىرى. سول سەبەپتەن دە  باسەكەلەستەرى كوپ، ءارى ءارتۇرلى قاڭقۋ سوزدەرگە ىلىگىپ جۇرەتىن ادام. ونىڭ ەسىمى تەمىرتاس تىلەۋلەسوۆتىڭ «شىمكەنتتىك مافيا» اتتى كىتابىندا ءجيى كەزدەسەدى.

زاۋتبەك قاۋسبەكۇلى ۆيتس-پرەمەر ومىرزاق شوكەەۆپەن پىكىرلەس ادام دەيدى بىلەتىندەر. ماسكەۋگە ەلشىلىككە بارۋ- قازاقستانداعى مەملەكەتتىك قىزمەتكەر ءۇشىن ۇلكەن مارتەبە سانالادى. دەمەك، زاۋكەڭنىڭ وسى زاۋلاعانى زاۋلاعان بولىپ ەسەپتەلۋگە ءتيىس. ال، قىرعىزستانعا ەلشى بولىپ بەيبىت يساباەۆ باراتىن كورىنەدى. ونىڭ پرەزيدەنتتىڭ ءباسپاسوز قىزمەتىنىڭ جەتەكشىلىگىنەن اياق استى بوساۋىنىڭ سەبەبى ءالى بەلگىسىز.

«اباي-ينفورم».