اقىل جارىستىرىپ العا باسقان زامانداعى ۇستاز تۇلعاسى
ادامزات كۇش جارىستىرىپ ەمەس، اقىل جارىستىرىپ العا باساتىن مىنا زاماندا ۇستازدىڭ قانشالىقتى دەڭگەيدە ءبىلىمدى دە بىلىكتى، تالاپشىل دا پاراساتتى بولۋى كەرەكتىگى وزدىگىنەن بەلگىلى. وسىندايدا ەلباسىمىز ن.ءا.نازارباەۆتىڭ: «اقىل تابىلماي، ەشتەڭە تابىلمايدى. وي جەتىلمەي تۇرىپ، ار-نامىس شىڭدالمايدى. ار-نامىسسىز ازامات، وزگەلەردىڭ كوسەگەسى تۇگىلى، ءوزىنىڭ كوسەگەسىن كوگەرتە المايدى. ونسىز ۇلتتىق سانا مەن ۇلتتىق نامىس تا تۇل»، - دەگەن ءسوزى ەرىكسىز ەسكە ورالادى. ال، سول اقىلدىڭ - تاربيە مەن بىلىمنەن كەلىپ تۋىندايتىنىن ەسكەرسەك، ۇستازدار قاۋىمىن ادام بولمىسىنىڭ ينجەنەرى دەپ باعالاۋعا تۋرا كەلەدى.
ادامزات كۇش جارىستىرىپ ەمەس، اقىل جارىستىرىپ العا باساتىن مىنا زاماندا ۇستازدىڭ قانشالىقتى دەڭگەيدە ءبىلىمدى دە بىلىكتى، تالاپشىل دا پاراساتتى بولۋى كەرەكتىگى وزدىگىنەن بەلگىلى. وسىندايدا ەلباسىمىز ن.ءا.نازارباەۆتىڭ: «اقىل تابىلماي، ەشتەڭە تابىلمايدى. وي جەتىلمەي تۇرىپ، ار-نامىس شىڭدالمايدى. ار-نامىسسىز ازامات، وزگەلەردىڭ كوسەگەسى تۇگىلى، ءوزىنىڭ كوسەگەسىن كوگەرتە المايدى. ونسىز ۇلتتىق سانا مەن ۇلتتىق نامىس تا تۇل»، - دەگەن ءسوزى ەرىكسىز ەسكە ورالادى. ال، سول اقىلدىڭ - تاربيە مەن بىلىمنەن كەلىپ تۋىندايتىنىن ەسكەرسەك، ۇستازدار قاۋىمىن ادام بولمىسىنىڭ ينجەنەرى دەپ باعالاۋعا تۋرا كەلەدى.
مەن دە ءوزىمنىڭ ءوسىپ-جەتىلۋ جولىمدا كوپتەگەن ۇستازداردىڭ الدىنان ءوتتىم. ايتقاندارىن تىڭداپ، ۇزاق جىلدار بويى وزىمە قاجەتتىسىن بويىما ءسىڭىرىپ كەلدىم. سودان بەرى ارادا كوپتەگەن جىلدار وتسە دە كەشەگى بەت-بەينەلەرى بۇرىنعىدان دا جارقىراي تۇسەتىن ۇستازدارىم بارشىلىق. ولاردى ويىما العاندا بالالىق، بوزبالالىق شاقتارىمنىڭ ءتاتتى دە قىزىقتى ەستەلىكتەرى كۇنى كەشەگىدەي كوز الدىما تىزبەكتەلەدى. مۇندايدا كوڭىلىم كوتەرىلىپ، وتكەن شاقتىڭ ادەمى اسەرلەرىنەن مارقايىپ قالامىن.
جۇرەگىمە سىر، كوڭىلىمە نۇر سىيلاعان سونداي ۇستازدارىمنىڭ ءبىرى، كەزىندە ءوزىم وقىعان الماتى قالاسىنداعى اباي اتىنداعى رەسپۋبليكالىق مامانداندىرىلعان دارىندى بالالارعا ارنالعان قازاق ءتىلى مەن ادەبيەتىن تەرەڭدەتە وقىتاتىن مەكتەپ-ينتەرناتىنىڭ مۇعالىمى، مەملەكەتتىك جوعارى ماراپاتتاۋلاردىڭ يەگەرى، تاريح جانە قوعامتانۋ پاندەرىنەن ءدارىس بەرگەن اپايىم ورىنشا قارابالينا-قازىباەۆانىڭ تارتىمدى تۇلعاسى ءاردايىم ءجۇرەگىمدە جۇرەدى. ويتكەنى، ۇلاعاتتى ۇستازىمنىڭ ومىرىمە وشپەستەي ءىز قالدىرعانىن مەن بۇرىننان-اق سەزىنىپ جۇرەتىنمىن.
ول كىسىنىڭ وقۋشىلارعا وقيتىن ءدارىستەرى وتە جوعارى دەڭگەيدە وتەتىن ەدى. وقۋلىقتاعى ماتەريالدارعا قوسىمشا ادەبيەتتەردى مولىنان پايدالاناتىن. شاكىرتتەر دە بەلگىلى ءبىر دەڭگەيدەگى پسيحولوگتار ەمەس پە؟! ءبىز دە ۇستازىمىزدى وزگە مۇعالىمدەرمەن سالىستىرىپ، شوقتىعى بيىك ورىنشا اپايىمىزدى ۇستازدارىمىزدىڭ اراسىنداعى كوشباسشى دەپ مويىندايتىنبىز.
مەن دە مۇعاليما اپايىمىزدىڭ وتە تالاپشىل ەكەندىگىن بىردەن ءتۇسىندىم. ءۇي تاپسىرماسىن سۇراعاندا، وتكەن تاقىرىپتى وقۋشىلاردىڭ قانشالىقتى يگەرگەندىگىن ءبىلۋ ءۇشىن ءبارىمىزدى ورنىمىزدان تۇرعىزىپ، وقۋشىلاردىڭ جاۋاپتارى ءبىرىن-ءبىرى ۇنەمى تولىقتىرىپ وتىرۋى قاجەتتىگىن ءجيى-ءجيى ايتاتىن. ءسويتىپ، ءبىزدىڭ سانامىزدى بارىنشا مول بىلۋگە شابىتتاندىرىپ، عىلىم دەگەننىڭ ءتۇپسىز تەرەڭ الەم ەكەندىگىن ۇعىندىرۋعا نيەتتەندى. ول كىسى جانە دە وقۋشىنىڭ رۋحاني جاعىنان ۇزدىكسىز كەمەلدەنۋىنە كوپ كوڭىل ءبولدى.
الدىڭعى سىنىپتاردا اۋىل مەكتەپتەرىندە وقىپ كەلگەندەرگە مۇنداي جوعارى تالاپتاردىڭ العاشقى كەزدە اۋىر تيەتىنى دە راس. سونى سەزە قوياتىن سۇيىكتى ۇستازىمىز ساباق ۋاقتىسىنان تىس كەزدە ولارمەن قوسىمشا جۇمىس جۇرگىزىپ، تەز ارادا قاتارعا قوسىلۋلارىنا ۇيىتقى بولاتىن.
سونداي-اق، ورىنشا اپايىمىزدىڭ تەك ءوز پاندەرىن وتكىزۋمەن عانا شەكتەلىپ قالماي، مەكتەپ-ينتەرناتتىڭ ءومىرىنە دە قاتتى كوڭىل ءبولىپ، ءاردايىم قوعامدىق جۇمىستاردىڭ قاق ورتاسىندا جۇرەتىندىگىن ءبارىمىز بىلەتىنبىز. قازاقستانداعى ورتا ءبىلىم بەرەتىن وقۋ ورىندارىنىڭ جان-جاقتى جۇمىستارىن العا باستىرۋعا بايلانىستى شىققان ۇكىمەت قاۋلىلارىنىڭ، ءبىلىم بەرۋ سالاسىنداعى جوعارى مەكەمەلەردىڭ نۇسقاۋلارىنىڭ ورىندالۋىن جۇزەگە اسىرۋعا ايانباي اتسالىساتىن. ەس ءبىلىپ قالعان بىزدەر وسىنىڭ ءبارىن جۇرەگىمىزبەن سەزىنىپ، بولاشاقتا ءدال وسى جانداي قوعامىمىزدىڭ بەلسەندى مۇشەسى بولۋعا ەلىكتەيتىنبىز.
اياۋلى دا ارداقتى ۇستازىمىزدىڭ: «بىزدەر، وسىنداعى ۇستازدار ۇجىمى ۇلتىمىزدىڭ ءتىلىن، ادەبيەتىن، تاريحىن تەرەڭدەتە وقىتىپ، ونى ۇلتتىق ءتاربيەمەن ۇشتاستىرىپ، شاكىرتتەرىمىزدىڭ ءدۇنيەتانىمىن كەڭەيتۋگە تىرىسامىز. وقۋشىلارىمىز دا اۋىلدا تۋىپ، انا ءتىلىنىڭ مايەگىن ەمىپ، ۇلتىمىزدىڭ اقىل ءسوزى مەن اسىل وسيەتىن ەستىپ، سالت-ءداستۇرىمىزدىڭ شاپاعاتىنا شومىلىپ وسكەندىكتەن شابىستارىنا قامشى سالدىرمايدى. جانە العان تاربيەلەرىنىڭ جارقىن كورىنىسى رەتىندەگى ولاردىڭ ساباق ايتۋلارى، كىشىپەيىلدىلىكتەرى، جاراسىمدى ءجۇرىس-تۇرىستارى، ءبارى-ءبارى مۇندا كەلگەندەردىڭ قىزىعۋشىلىعىن تۋعىزادى»، دەپ بىزدەردى جىگەرلەندىرە ايتقان سوزدەرى وسى كۇنگە دەيىن سانامىزدا جاڭعىرۋدا.
سول كەزدىڭ وزىندە-اق رەسپۋبليكاداعى ماڭدايالدى ورتا ءبىلىم بەرۋ ورداسىنا اينالعان مەكتەپ-ينتەرناتىمىز شەتەلدەن كەلگەن قوناقتارعا ۇلگى رەتىندە كورسەتىلەتىن. شۋاقتى شارالاردىڭ بارلىعى وقۋشىلاردىڭ بويىندا جاقسى ادامي قاسيەتتەردى قالىپتاستىرۋعا، ىرگەتاسى بەرىك ءبىلىم الۋلارىنا، وتانىنىڭ ناعىز پاتريوتتارى بولىپ ءوسۋلەرىنە مول مۇمكىنشىلىكتەر جاسادى. سول سەبەپتى ولار بۇگىنگى تاڭدا بيلىك ورگاندارىندا، پارلامەنتتە، قۇقىق قورعاۋ جۇيەلەرىندە، اكىمدىكتەردە، بيزنەس سالاسىندا، ونەردە، ءتۇرلى تەلەارنالار مەن گازەت-جۋرنالداردا بەدەلدى قىزمەت جاساپ ءجۇر.
وسىنىڭ بارىنە قاراپ وتىرىپ، ورىنشا اپايىمىزدىڭ ءبىزدىڭ بويىمىزعا تەرەڭ ءبىلىم ءنارىن سىڭىرۋمەن بىرگە، وي-سانامىزدىڭ دا كەڭىستىگىن كەڭەيتكەنىن جاقسى تۇسىنەمىز. سوندىقتان، بولمىسى بولەك ناق وسى ورىنشا اپايىمىز ءبىزدىڭ ىشكى جاندۇنيەمىزدە سالاۋاتتى سىلكىنىس جاسادى دەسەك، ارتىق ايتقاندىعىمىز ەمەس. «جاقسى مۇعالىم مەكتەپكە جان كىرگىزەدى» دەگەن جۇرەك جىلىتار جارقىن ءسوز وسىنداي جاسامپاز جاندارعا ارنالىپ ايتىلسا كەرەك.
كەيىنگى تىرشىلىكتە دە اياۋلى ۇستازىممەن اراداعى قارىم-قاتىناسىمىز ۇزىلگەن جوق. سول سەبەپتى ول كىسىنىڭ اينالاسىندا بولىپ جاتقان جاقسىلىقتاردان حاباردارمىن. بۇكىل ءبىتىم-بولمىسىنا قانىعىپ، ءوز ارمانىنىڭ اسقار شىڭىنا كوتەرىلگەن تولاعاي تۇلعانىڭ اق اجارىن تەرەڭىرەك تاني ءتۇستىم.
كەزىندە بىرەۋدى اتۋعا، بىرەۋدى سوتتاۋعا، بىرەۋدى قۋعىن-سۇرگىنگە ۇشىراتۋعا قاتىستى جۇرگىزىلگەن سۇرقيا ساياساتتىڭ سالدارىنان باستارى بايگەگە تىگىلگەن اتا-انالارى رەپرەسسيانىڭ قۇربانى بولىپتى. سوعان سايكەس، سول شاڭىراقتاعى بالالار دا جاستايىنان قيىنشىلىقتىڭ اششى ءدامىن اياۋسىز تاتقان ەكەن. ۇلى وتان سوعىسى كەزىندەگى اۋىرتپاشىلىق تا ومىرلەرىندە ءوزىنىڭ وشپەستەي ءىزىن قالدىرعان. وسىنداي ءجانە باسقا دا جاعدايلارعا بايلانىستى اياۋلى ۇستازىمنىڭ جەكە باسىنان كەشىرگەن تاۋقىمەتكە تولى تاعدىرىنا قانىعىپ، سونىڭ ءبارىن جەڭە بىلگەن قارشاداي عانا قازاق قىزىنىڭ قايسارلىعىنا تاڭ قالدىم. قايعى ارقالاسا دا قايراڭدا قالماي، قايىعىنىڭ ەسكەگىن دۇركىرەگەن اعىسقا قارسى ەسىپ، سول اعىسقا قارسى ەكپىندەتە جۇزگەن جانە ءومىردەگى ەڭ ءبىر سالماقتى دا جاۋاپتى ماماندىقتى مەڭگەرىپ، سونىڭ ەڭ شىرقاۋ شىڭىنا كوتەرىلە بىلگەن بولمىسىن بۇگىنگى كۇننىڭ باتىرلارىنىڭ قاسيەتىنە تەڭەدىم. ءسويتىپ، جاسامپاز جانعا دەگەن قۇرمەتىم مەن سۇيىسپەنشىلىگىم بۇرىنعىدان الدەقايدا ەسەلەنە ءتۇستى. ول مەن ءۇشىن بۇكىل قازاق حالقىنىڭ باعىنا جاراتىلعان ءبىرتۋار تۇلعاعا اينالىپ شىعا كەلدى.
كەيىننەن بىلگەنىمدەي، ۇلاعاتتى ۇستازىمنىڭ شىققان جەرى وتە تەكتى ورتا ەكەن. بويىنداعى تاۋسىلماس قۋات كوزى وسىناۋ تەكتىلىكتەن باستاۋ العان-اۋ دەپ توپشىلادىم.
تىزە بەرسە ماشاقاتى مول بەينەتتى ەڭبەگىنىڭ زەينەتىن كورىپ وتىرعان ورىنشا اپايدىڭ العان اسۋلارى دا از ەمەس ەكەن. سولاردىڭ باستى-باستىسىنا توقتالا كەتسەك، اتالمىش مەكتەپ-ينتەرناتتا تابانى كۇرەكتەي 57 جىل ۇستازدىق قىزمەت اتقارعان اسىل جان رەسپۋبليكامىزداعى وزات ۇستازداردىڭ قاتارىنان قۇرمەتتى ورىن الىپتى. تاباندىلىققا تولى ەڭبەگى، قوعامدىق جۇمىستارداعى بەلسەندىلىگى ءۇشىن 1968 جىلى «قازاق كسر وقۋ-اعارتۋ ءىسىنىڭ ۇزدىگى»، 1983 جىلى «كسرو وقۋ-اعارتۋ ءىسىنىڭ ۇزدىگى» اتانعان. 1965 جىلدان بەرى «اعا مۇعالىم»، «مەتوديست-مۇعالىم» اتانعان. ەلباسىنىڭ جارلىعىمەن 1998 جىلى «قازاقستاننىڭ ەڭبەك ءسىڭىرگەن قىزمەتكەرى» اتاعىن يەلەنىپ، «قازاقستان رەسپۋبليكاسىنىڭ كونستيتۋتسياسىنا 10 جىل»، «استاناعا 10 جىل» مەدالدارىمەن جانە كوپتەگەن ناگرادالارمەن ماراپاتتالعان. مەنىڭ ويىمشا، ەڭ باستىسى - ول كىسىگە دەگەن مىڭداعان وقۋشىلارىنىڭ شەكسىز العىسى مەن حالقىنىڭ بەرگەن اق باتاسى دەپ بىلەمىن.
ورىنشا جولمۇراتقىزىنىڭ 1978 جىلدان باستاپ رەسپۋبليكالىق باسىلىمداردا ماقالالارى جاريالانىپ، تەلەديداردان، قازاق راديوسىنان ءسويلەگەن سوزدەرى التىن قورعا الىنعان. 1998 جىلى شىققان «قازاقتار» ەنتسيكلوپەدياسىنىڭ 9-تومىنا ماقالالارىنىڭ كورسەتكىشتەرى ەنگىزىلگەن. ول كىسى ۇستازدىق قىزمەتىن جازۋشىلىقپەن جالعاستىرعان ادام. پەداگوگتەر ءومىرىنە ارنالعان «ۇستاز جۇگى قاشاندا اۋىر»، «ۇستاز باقىتى»، «تاعدىر» جانە ومىرباياندىق حيكايالاردى باياندايتىن «جۇرەك سىرى» كىتاپتارىنىڭ اۆتورى. ەلباسىنىڭ جەكە قابىلداۋىندا بولىپ، ءوزىنىڭ «ۇستاز باقىتى» اتتى كىتابىن سىيعا تارتقان.
اياۋلى ۇستازىمنىڭ ەرەكشە قۇرمەتكە يە بولۋىنا كەزىندە قازاقستان كومپارتياسى ورتالىق كوميتەتىندەگى جوعارى لاۋازىمدى قىزمەتكە دەيىن كوتەرىلگەن ومىرلىك جارى كاكىمجان قازىباەۆتىڭ دا تيگىزگەن سەپتىگى مول. جوعارى شەندەگى لاۋازىم يەسى بولسا دا ءاردايىم ءوزىن قاراپايىم ۇستايتىن پاراساتتى جاننىڭ شۋاقتى شاراپاتى الدىنا كەلگەن مىڭداعان ادامداردىڭ جۇرەگىنە نۇر سىيلادى. ول جونىندە حالىق اراسىندا جاقسى ەستەلىك، اڭگىمەلەر ايتىلىپ ءجۇر.
ءوزىنىڭ ونەگەلى ومىرىندە تەك ءىرى باسشى عانا ەمەس، سونىمەن بىرگە قولتاڭباسى جارقىراعان جۋرناليست، قالامىنىڭ قارىمى كەڭ جازۋشى جانە بەدەلدى قوعام قايراتكەرى رەتىندە دە تانىلعان كاكىمجان قازىباەۆپەن بالداي ءتاتتى عۇمىر كەشكەن ورىنشا جولمۇراتقىزى ەكى ۇل مەن ءبىر قىزدىڭ اناسى اتانعان. ۇلى نۇرتاس كاكىمجانۇلى قاي قىرىنان الساق تا العىرلىق تانىتىپ، پرەزيدەنتتىڭ ءىس باسقارماسى ورتالىق كلينيكالىق اۋرۋحاناسى باس ءدارىگەرىنىڭ حيرۋرگيا ءىسى جونىندەگى ورىنباسارى بولىپ، 60-تان اسا عىلىمي ەڭبەك جازعان. «قۇرمەت» وردەنىنىڭ، «ەڭبەكتەگى ەرلىگى ءۇشىن» مەدالىنىڭ يەگەرى-ءتىن. ءبىر وكىنىشتىسى، وتاندىق مەديتسينادا وزىق مامان سانالاتىن شاراپاتى مول جان ومىرمەن ەرتە قوش ايتىستى. ەكىنشى ۇلى باتىر كاكىمجانۇلى دا ءوز ءىسىنىڭ بىلگىرى، بەلگىلى جۋرناليست. قىزى نارگۇل - كاسىپكەر، ۇلگىلى وتباسىنىڭ ۇيىتقىسى.
ورىنشا جولمۇراتقىزىنىڭ ۇستازدىقتان باسقا العان اسۋى - ول بۇگىندە ارداقتى انا جانە نەمەرەلەرىنىڭ ساعىنىشىنا سايا بولا بىلگەن اياۋلى اجەسى. جانە ءبىر ايتقىم كەلەتىنى، قۇرمەتتى ەڭبەك دەمالىسىنا شىقسا دا جانى جاي تاپپايتىن اپامىز 2012 جىلدىڭ 20 قازانىندا ءوزى بۇكىل سانالى عۇمىرىن ارناعان سۇيىكتى قارا شاڭىراعى اباي اتىنداعى رەسپۋبليكالىق مامانداندىرىلعان دارىندى بالالارعا ارنالعان قازاق ءتىلى مەن ادەبيەتىن تەرەڭدەتە وقىتاتىن مەكتەپ-ينتەرناتتىڭ 55 جىلدىق مەرەيتويىنا قاتىسىپ، تەبىرەنە ءسوز سويلەدى. ءدال سول كۇنى مەكتەپ-ينتەرناتتىڭ كەڭ اۋلاسىندا اشىلعان اباي اتامىزدىڭ ەسكەرتكىشى دە ءبىر كەزدە ورىنشا اپايىمىزدىڭ باستاماسىمەن قولعا الىنعان بولاتىن.
جۋىردا عانا ەلباسى ن. ءا. نازارباەۆتىڭ «قازاقستان ءبىلىم قوعامى جولىندا» اتتى ينتەراكتيۆتى ءدارىسىن بۇكىل قازاقستاندىقتار تىڭدادى. «ءبىلىم بەرۋ ءىسى» دەگەندە ىشكەن اسىن جەرگە قوياتىن ورىنشا جولمۇراتقىزى دا ۇلت باسشىسىنىڭ باستامالارىنىڭ ورىندالۋىنا وزىندىك ۇلەسىن قوسىپ، ءوزىنىڭ سۇيىكتى قارا شاڭىراعىنىڭ قازىرگى ديرەكتورى مۇحتار بوتابايۇلى يبرايموۆپەن وي ءبولىسىپ، بويىنداعى پەداگوگيكالىق باي تاجىريبەسىن مەكتەپتەگى وقۋ، تاربيە ءىسىن ودان ءارى العا باستىرۋعا باعىشتاۋدا. ياعني، مەكتەپ باسشىسى مەن ونداعى ەڭبەك ۇجىمىنا رۋحاني جەتەكشىلىك جاساپ ءجۇر. سونىسىنا قاراپ، بىزدەر، ورىنشا اپايدىڭ وسىدان قىرىق جىل بۇرىنعى شاكىرتتەرى - ءوز ۇستازىمىزدى ۇلى ادامداردىڭ قاتارىنا قوسا سويلەۋدى ارتىق كورمەيمىز.
ءوز باسىم قايدا جۇرسەم دە ول كىسىنىڭ ماعان دەگەن قامقورلىعىن، سۇيىسپەنشىلىگىن سەزىنەمىن. ورنى دارا اقىلشىم رەتىندە ءارتۇرلى ماسەلەلەرگە بايلانىستى كەڭەسىپ تۇرامىن. ءار كەزدەسۋىمىز ساناما ۇلكەن اسەر ەتىپ، بويىما قۋات قۇيادى. جۇزدەسۋلەردەگى اڭگىمەدەن كەيىن تەرەڭ ويلارعا كەتىپ، قالاي ول كىسىنىڭ سەنىمىن اقتاپ شىقسام دەگەن ويلار بويدان كەتپەيدى.
بايقاپ ءجۇرمىن، ۇستازىم مەنىڭ ءومىرىمنىڭ، ىستەگەن ىستەرىمنىڭ بارلىق جاعىنا مۇقيات قاراپ، زور كوڭىل ءبولىپ ءجۇر. وقۋشىلارىنا بالالارىنان ارتىق كوڭىل ءبولىپ جۇرگەن مۇعالىمىڭە قالاي قايران قالمايسىڭ.
قانشا قارمانسام دا ورىنشا جولمۇراتقىزىنداي دارىندى دا ارداگەر ۇستازىمنىڭ الىپ تا زاڭعار بەينەسىن تولىقتاي اشۋ قيىنعا تۇسەتىنىن سەزەمىن. ول قالىڭ-قالىڭ كىتاپتاردىڭ ەنشىسىندەگى امانات ەكەندىگىن دە جاقسى تۇسىنەمىن.
ال، مەنىڭ بۇل شاعىن ماقالادا باستى ايتقىم كەلگەنى - ۇلاعاتتى ۇستاز دارەجەسىنەن الدەقاشان اسىپ ءتۇسىپ، تانىمال ەل اناسى دەڭگەيىنە جەتكەن جاسامپاز جاننىڭ بۇگىنگى كۇنى ءبىر عاسىرلىق ادام عۇمىرىنىڭ سەكسەن دەگەن التىن ارالىنىڭ تورىنەن ورىن الىپ جاتقاندىعى ەدى. سول سەبەپتى، كوڭىل قوشىن كەلتىرەتىن مەرەيتويعا شاكىرت رەتىندەگى وزىندىك ءۇنىمدى قوسىپ، تاعدىرىما كوك جۇزىندەگى «قۇس جولىنداي» باياندى باعىت-باعدار كورسەتكەن ارداقتى اپايىمنىڭ الداعى بارلىق اشىق كۇندەرىنە - سىر بەرمەس مىقتى دەنساۋلىق، توقىراۋ مەن قارتتىققا مويىنۇسىنباعان سەرگەك ءىس-ارەكەتتەر تىلەيمىن! كوگەرشىننىڭ تىلەۋىندەي پەرىشتە پەيىلى مەن ءالى دە بولسا جاس ۇرپاق تاربيەسىنە تيگىزەر شاراپاتىنىڭ مولدىعىنا قاراي - ءومىرىڭىز ورگە وزىپ، ۇستازدىق سۇيىكتى ورتاڭىز بەن اۋلەتتىك باقىتتى شاڭىراعىڭىزدىڭ شامشىراعى بولا بەرىڭىز دەگىم كەلەدى!
ءادىل شاياحمەتوۆ،
قازاقستان رەسپۋبليكاسى ۇلتتىق قاۋىپسىزدىك كوميتەتى اكادەمياسىنىڭ باستىعى، گەنەرال-لەيتەنانت، ەۋرازيا مەملەكەتتىك ۋنيۆەرسيتەتىنىڭ قۇرمەتتى پروفەسسورى.
الماتى.
"اباي-اقپارات"
