بۇرىنعى دەنساۋلىق ساقتاۋ ءمينيسترى ەلجان ءبىرتانوۆ پەن ونىڭ كومەكشىسى ولجاس ابىشەۆتىڭ ءىسى جۋىق ارادا مارەسىنە جەتۋى مۇمكىن. سوت ءبىرتانوۆتىڭ كۋاگەر رەتىندە ۇسىنعان ادامدار ءتىزىمىن قابىلداپ، ءوتىنىشىن قاناعاتتاندىردى. كۋا بولاتىنداردىڭ كوبى – مينيسترلەر. ءبىرتانوۆ ءوزىنىڭ Facebook پاراقشاسىندا بۇرىنعى ارىپتەستەرىنىڭ سوزدەرى سوتتىڭ ادىلەتتى شەشىم قابىلداۋىنا سەبەپ بولاتىنىنا سەنىم ءبىلدىردى.

سونىمەن ءبىرتانوۆتىڭ سوتىندا كىمدەر كۋاگەر بولماق؟ قاراڭىز:

«1. اسقار ۇزاقبايۇلى مامين.

قازاقستان رەسپۋبليكاسىنىڭ بۇرىنعى پرەمەر-ءمينيسترى، مەنىڭ 12-13.06.2020 ج.جامبىل وبلىسىنا قىزمەتتىك ءىس-ساپارىمنىڭ، ونىڭ ىشىندە نۇر-سۇلتان قالاسىنا سانيتارلىق اۆياتسيا بورتىمەن ورالۋىمنىڭ ءمان-جايلارى بويىنشا;

2. قازاقستان رەسپۋبليكاسى پرەمەر-ءمينيسترىنىڭ ورىنباسارى ەرالى لۇقپانۇلى توعجانوۆ 2021 جىلعى قازاندا قر ءتسدياوم جانە قر دسم وكىلدەرىنىڭ قاتىسۋىمەن قر-داعى حورۆاتيا ەلشىلىگىنىڭ، «ەريكسون نيكولا تەسلا» كومپانياسىنىڭ وكىلدەرىمەن كەلىسسوزدەردىڭ جۇرگىزىلۋىنە بايلانىستى;

3. بۇرىنعى قر دەنساۋلىق ساقتاۋ جانە الەۋمەتتىك دامۋ ءمينيسترى تامارا قاسىمقىزى دۇيسەنوۆا ينتەروپەرابەلدىلىك پلاتفورماسىن ازىرلەۋ بويىنشا كونكۋرس وتكىزۋ، «ەريكسون نيكولا تەسلامەن» كەلىسىمشارتقا قول قويۋ، وعان وزگەرىستەر ەنگىزۋ جانە ونى 2017 جىلعى قاڭتارعا دەيىن ىسكە اسىرۋ جاعدايلارىنا بايلانىستى;

4. مۋسين باعدات باتىربەكۇلى, قر تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى، «2020-2022 جىلدارعا ارنالعان پلاتفورمانى ەنگىزۋ جونىندەگى جول كارتاسىن بەكىتۋ تۋرالى» قر دسم-مەن بىرلەسكەن بۇيرىققا قول قويۋ جانە ىسكە اسىرۋ، سونداي-اق ىسكە قاتىسى بار قر دەنساۋلىق ساقتاۋ سالاسىنداعى تسيفرلاندىرۋدىڭ باسقا دا جوبالارىن ىسكە اسىرۋ جاعدايلارى بويىنشا;

5. مارسەلو بورتمان, حالىقارالىق قايتا قۇرۋ جانە دامۋ بانكىنىڭ (دۇنيەجۇزىلىك بانك) دەنساۋلىق ساقتاۋ سالاسىنداعى جوبالار بويىنشا جەتەكشى مامان، كونكۋرستىق راسىمدەردى وتكىزۋ، جەتكىزۋشىنى تاڭداۋ، كەلىسىمشارتقا، قوسىمشا كەلىسىمدەرگە قول قويۋ، ونى ىسكە اسىرۋ جانە اياقتاۋ مەرزىمدەرىن ۇزارتۋ ماسەلەلەرى بويىنشا;

6. باقتىبەك ءجۇمادىل، حالىقارالىق قايتا قۇرۋ جانە دامۋ بانكىنىڭ (دۇنيەجۇزىلىك بانك) جوبالارى بويىنشا اعا مامان، كونكۋرستىق راسىمدەردى وتكىزۋ، ءونىم بەرۋشىنى تاڭداۋ، كەلىسىمشارتقا، قوسىمشا كەلىسىمدەرگە قول قويۋ، ونى ىسكە اسىرۋ جانە اياقتاۋ مەرزىمدەرىن ۇزارتۋ ماسەلەلەرى جونىندە ءسوز سويلەيدى»، - دەپ اتاپ جازدى ەكس-مينيستر ءبىرتانوۆ.

شەنەۋنىكتەر سوتقا ءوز ەركىمەن كەلىپ قاتىسا ما، الدە ءماجبۇرلى شاقىرتۋمەن كەلە مە ونى ۋاقىت كورسەتەدى.

ەلجان ءبىرتانوۆتىڭ ءىسى بويىنشا تەرگەۋ 2021 جىلعى 7 شىلدەدە اياقتالعان بولاتىن. تەرگەۋدىڭ رەسمي شەشىمى بويىنشا، ەكس-مينيستر ءبىرتانوۆ پەن ونىڭ ورىنباسارى ولجاس ابىشەۆ جۇمىس ىستەمەيتىن اقپاراتتىق پلاتفورمانى قابىلداپ العان. قازاقستاننىڭ قارجى مونيتورينگى اگەنتتىگىنىڭ دەرەكتەرى بويىنشا ولار مەملەكەتكە 1,5 ميلليارد تەڭگە زالال كەلتىرىلگەن.

ءبىرتانوۆ بارلىق ايىپتاۋلاردى جوققا شىعارعان ەدى. وزىنە تاعىلعان ايىپتاردى قازاقستان تاراپى حالىقتىڭ مۇقتاج بولىگىن ءدارى-دارمەكپەن تەگىن قامتاماسىز ەتۋ ءۇشىن ساتىپ الاتىن «دارىلىك پرەپاراتتاردى ۇرلاۋدىڭ» بولجامدى سحەماسىمەن بايلانىستىرعان. ول بۇل سحەماعا «شەكارا قىزمەتى مەن قۇقىق قورعاۋ ورگاندارىنىڭ رۇحساتىن پايدالانىپ» ءدارى-دارمەكتى شەتەلگە الىپ شىعاتىن ءىرى فارماتسەۆتيكالىق كومپانيالاردىڭ قاتىسى بار ەكەنىن ايتقان.

ەگەر وسى سوت پروتسەسسى كەزىندە ءبىرتانوۆتىڭ شەتەلدەن شاقىرعان ماماندارى مينيسترلىك قابىلداعان اقپاراتتىق جۇيەنىڭ دۇرىس جۇمىس ىستەيتىندىگىن دالەلدەپ بەرسە، وندا تەك «ساناۆياتسيا ۇشاعىن زاڭسىز پايدالاندى» دەگەن ايىپ قانا قالادى. وسىلايشا، ول ايىپپۇل تولەپ، شارتتى جازامەن سوت زالىنان بوساپ شىعا الادى.

ەلجان ءبىرتانوۆ دەنساۋلىق ساقتاۋ ءمينيسترى قىزمەتىن 2017 جىلعى قاڭتاردان باستاپ 2020 جىلعى ماۋسىمنىڭ سوڭىنا دەيىن اتقاردى. ونىڭ باسشىلىعى كەزىندە كوروناۆيرۋس ينفەكتسياسى تارالىپ، وتە كۇردەلى ۋاقىتقا تاپ كەلدى. سول كەزدە ءبىرتانوۆ الەۋمەتتىك جەلىدەگى پاراقشاسىندا كوروناۆيرۋستىڭ اسقىنعان تۇرىمەن اۋىرعاندىقتان قىزمەتىنەن بوساتۋ تۋرالى ءوتىنىش بەرگەنىن جازدى.

ايجان تەمىرحان

Abai.kz