ەرمەك تۇرسىنوۆ، كينورەجيسسەر، ستسەناريست: الاشتىقتار قازاقتىڭ قاسيەتتى گەندىك كودىن، تەگىن، رۋحىن ساقتاعان لەك ەدى
- ەرمەك اعا، وزىڭىزبەن اڭگىمەلەسەر الدىندا مەن مۇمكىندىگىنشە ءسىزدىڭ بۇرىن باسپاسوزدەرگە بەرگەن سۇحباتتارىڭىزدى وقىپ، بولمىسىڭىزدى تانىتارلىق ءبىرشاما ماعلۇمات الدىم. كوپ نارسەنى اشىق ايتىپسىز، اشىنا ايتىپسىز. ءۇستىرت قاراعان ادام بالكىم، «قازاقتى سونشا جەرگە ۇرىپ، تىقسىرعانى نەسى؟» دەۋى مۇمكىن، بىراق مەن، كەرىسىنشە ۇلى اباي اتامىزدىڭ «قالىڭ ەلىم، قازاعىم، قايران جۇرتىم» دەپ سىرت كەيىپتە قازاققا ۇرىسقانداي بولعانىمەن، ار جاعىنان جىلاپ تۇرعان، جانى كۇيىپ، شىرقىراپ تۇرعان بولمىسىنا ۇقساستىقتى كوردىم سىزدەن. فيلمدەرىڭىزدىڭ دە اتاۋى «كەلىن»، «شال»، ەندى تۇسىرگەلى جاتقان «كەنجە»، ياعني، قازاق ءۇشىن - كيەلى ۇعىمدار. ولاي بولسا، اڭگىمەمىزدى قازاق دەگەن ۇلتىمىز جايىنان باستاساق. قازىرگى ءبىزدىڭ بولمىسىمىز قانداي وسى؟ ءبىز كىمبىز قازىر؟ ءسىز ماسەلەن، (سۇحباتىڭىزدا) قازاق ۇلتىنىڭ بولاشاعىنا كۇمانمەن قارايتىنىڭىزدى ايتىپ قالىپسىز. سوندا راسىندا، ءبىزدىڭ الدىمىزدا ءبىر جىلت ەتكەن ساۋلەنىڭ قالماعانى ما؟
- ەرمەك اعا، وزىڭىزبەن اڭگىمەلەسەر الدىندا مەن مۇمكىندىگىنشە ءسىزدىڭ بۇرىن باسپاسوزدەرگە بەرگەن سۇحباتتارىڭىزدى وقىپ، بولمىسىڭىزدى تانىتارلىق ءبىرشاما ماعلۇمات الدىم. كوپ نارسەنى اشىق ايتىپسىز، اشىنا ايتىپسىز. ءۇستىرت قاراعان ادام بالكىم، «قازاقتى سونشا جەرگە ۇرىپ، تىقسىرعانى نەسى؟» دەۋى مۇمكىن، بىراق مەن، كەرىسىنشە ۇلى اباي اتامىزدىڭ «قالىڭ ەلىم، قازاعىم، قايران جۇرتىم» دەپ سىرت كەيىپتە قازاققا ۇرىسقانداي بولعانىمەن، ار جاعىنان جىلاپ تۇرعان، جانى كۇيىپ، شىرقىراپ تۇرعان بولمىسىنا ۇقساستىقتى كوردىم سىزدەن. فيلمدەرىڭىزدىڭ دە اتاۋى «كەلىن»، «شال»، ەندى تۇسىرگەلى جاتقان «كەنجە»، ياعني، قازاق ءۇشىن - كيەلى ۇعىمدار. ولاي بولسا، اڭگىمەمىزدى قازاق دەگەن ۇلتىمىز جايىنان باستاساق. قازىرگى ءبىزدىڭ بولمىسىمىز قانداي وسى؟ ءبىز كىمبىز قازىر؟ ءسىز ماسەلەن، (سۇحباتىڭىزدا) قازاق ۇلتىنىڭ بولاشاعىنا كۇمانمەن قارايتىنىڭىزدى ايتىپ قالىپسىز. سوندا راسىندا، ءبىزدىڭ الدىمىزدا ءبىر جىلت ەتكەن ساۋلەنىڭ قالماعانى ما؟
- ءيا، بەت-جۇزىڭە قاراماي تىك ءسويلەيتىنىم بار، وعان حاقىم دا بار دەپ ويلايمىن. بىراق مەن وزىمە سۇراق قويىلعاندا عانا پىكىر ايتامىن، ءوز بەتىمشە ەشتەڭەگە ارالاسپايمىن. ونىڭ ۇستىنە ەۋروپا، اقش، تاياۋ شىعىستا ءبىراز جىل تۇرعاندىقتان، وزىمىزدەگى جاعدايدى وزگە ەلدەرمەن سالىستىرا دا الامىن. ول تارازىلاۋىم كوبىنە ءبىزدىڭ پايدامىزعا ەمەس. سوندىقتان مەن وزگەنى وكپەلەتۋ ءۇشىن ەمەس، ءوز وكپەمدى ايتۋ ءۇشىن جاق اشامىن. وسىنداي باي ەلدە تۇرىپ كەدەيلەردىڭ بولۋى وزەگىمدى ورتەيدى. كارى قويدىڭ جاسىنداي عۇمىرى قالعان قارتتارىمىزدىڭ تەك زەينەتاقىعا كۇنەلتەتىنى وكىنتەدى. ولار بۇل ومىردە ەش جاقسىلىق كورمەدى. قيلى زاماندا ومىرگە كەلدى، ەسكى كيىمنىڭ ءوزىن لاقتىرىپ تاستاي الماي، جاماپ كيدى ولار. ءوزىم دە اعالارىمنان قالعاندى سۇيرەتىپ ءجۇرىپ ءوستىم.
ابايدىڭ زامانىنان بەرى جان دۇنيەمىز ەش وزگەرمەگەنىنە كۇيىنەمىن. اباي قازاقتى جالقاۋ، ماقتانشاق، قىڭىر، قاراڭعى، ەكىجۇزدى، شىر ەتپە، كەۋدەمسوق ەتىپ سيپاتتادى ەمەس پە... وسى ءۇشىن ابايدى كىم جاقسى كورىپ ەدى؟ قازاق تەك ماقتاعاندى جاقسى كورەدى. ايتىڭدارشى، نە وزگەردى؟ شىن كەلبەتىمىز سول بولسا نەگە مەن دە قازاعىم تۋرالى اشىنىپ سويلەمەۋىم كەرەك؟ انا بالاسىن بۇزىقتىعى ءۇشىن ۇرعاندا، قايسىسىنىڭ جانى قاتتىراق اۋىرادى؟ اكە ۇلىن ماسقارا ءىسى ءۇشىن سوگىپ جاتقاندا، قايسىسى قاتتىراق ۇيالىپ، نامىستانادى؟ كەيدە قاتتى ايتاتىنىم راس، بىراق سول سوزدەرىمنىڭ استارىنا ءۇڭىلسىن...
- سىزدىڭشە، قازىرگى كوزى تىرىلەردەن ۇلت زيالىسى دەپ كىمدەردى اتاي الامىز؟ جالپى، زيالى دەگەن قانداي بولۋى كەرەك؟ الاش زيالىلارى جايلى نە ويلايسىز؟ سول سەكىلدى كوزى كەتكەن ءبىزدىڭ قادىرلىلەرىمىزدەن قاي تولقىندى، كىمدەردى جوقتايسىز؟ كىم جەتىسپەيدى مىنا قوعامعا، اباي ما، ءاليحان با، بولماسا وتكەندەر ءوتتى، بىزگە ءتىپتى جاڭاشا زيالى توپ كەرەك پە؟ ول قانداي بولۋى كەرەك؟ ءتىلى، ءدىنى، مەنتاليتەتى قانداي قۇندىلىقتارعا قۇرىلعانى ابزال؟
- جاقسىلار بار. بىراق وتە از. كوزى تىرىلەردەن گەرولد بەلگەردى مىسال ەتە الامىن. قازاق ادەبيەتىنە گەرا اعا سىندى ەڭبەك سىڭىرگەن ادامدار از. ازىرگە ونى تۇسىنبەيمىز، قادىرلەمەيمىز، ال ۋاقىتى كەلگەندە باسىمىزدى ۇرعىلاپ: «قانداي التىن ادام ەدى! باعالاماپپىز عوي. بايعۇستىڭ ءومىرى تار پاتەردە ءوتىپتى عوي، كىتاپتارى مەن جازبالارىن قويار جەر تاپپاي قينالىپتى...» دەپ بايبالام سالامىز ءالى-اق. ەتىمىز ۇيرەنىپ كەتكەن ەسكى اۋەن بۇل. ال و دۇنيەلىك بولعانداردان ءوزىم ارالاسقان قال-اعاڭدى ايتار ەدىم. ول تەك اسقان ءبىلىمدار ادام عانا ەمەس، ومىرگە مىسقىلمەن قاراي الاتىن ازامات ەدى. ەڭ باستىسى، وزىنە دە سىنمەن قاراي الاتىن. ال ءبىز قازىر ءوزىمىزدى تىم جوعارى باعالايمىز، اسىل بولمىسىمىزعا سىن ايتقاننىڭ ساعىن سىندىرعانشا تىنبايمىز. جاراسقان ءابدىراشەۆپەن دە جاقسى ارالاستىم. قازاقتىڭ ماڭدايىنا بىتكەن ەڭ قورعانسىز، ەڭ اقجارقىن، ەڭ شىنايى، ناعىز اقىنداردىڭ سوڭعىلارىنىڭ ءبىرى سول شىعار. ورالحان بوكەي. ول كىسىمەن بولعان اڭگىمەلەرىمىز ەسىمە تۇسسە، جانىم جىلىپ سالا بەرەدى. قۇداي بەرگەن قالامگەر ەدى. ال اقسەلەۋ سەيدىمبەكوۆ ەكەۋمىز جازۋشىلار وداعىنىڭ ءبىر كابينەتىندە وتىردىق: شاكارىم، ماعجان، جۇسىپبەك، احمەت، مىرجاقىپتاردى اۋداردىق. ءبىلىمدار ازامات ەدى، ەكەۋمىز ءجيى ايتىسىپ قالاتىنبىز. ءتىپتى ايعايلاسقان دا كەزدەرىمىز بولدى. بىراق، بۇل ايعايدىڭ ماقساتى يگى ەدى. قازىرگىدەي بەتجىرتىس ەمەس... ءبىز «قايسىمىزدىڭ بابامىز كەرەمەت بولدى، قايسىمىزدىڭ قانىمىز تازا، قايسىمىزدىڭ مارقۇمدارىمىز مىقتى؟» دەگەن سىندى ۇساق-تۇيەككە باس قاتىرمايتىنبىز. ءبىزدىڭ پىكىرتالاستىڭ ورەسى باسقا ەدى. سايىن اعا دا، ءوز تۋىسىم باققوجا مۇقاي دا، كامال جانە ساعات اعالار، سەيداحمەت اعا. ءبارى ەسىمدە. شىنايى ازاماتتار ەدى. قازىر ونداي تەكتىلەر از... زيالى اتانىپ جۇرگەندەرىمىزدىڭ ساپاسى ءتۇسىپ كەتتى. الاشوردالىق ارىستارمەن سالىستىرۋعا كەلمەيدى: دۇنيەتانىمدارى تار، ءبىلىمى تاياز، تاۋەكەلشىلدىك جوق. الاشتىقتار قازاقتىڭ قاسيەتتى گەندىك كودىن، تەگىن، رۋحىن ساقتاعان لەك ەدى. تاڭداۋلىلار. ولاردىڭ ۇلى ميسسياسى دا، ۇلى قاسىرەتى دە وسىندا. مۇنى وزدەرى دە بىلگەن. سوندىقتان قازىرگىلەر تۋرالى ءسوز شىعىندامايىن، ايتپەسە، تالايدىڭ شامىنا شوق تۇسىرەرمىن. كەرەگى نە؟ مەن «ءبارى جامان» دەگەننەن بىردەڭە وزگەرە مە؟ مۇنى ءبارى كورىپ تە، ءبىلىپ تە ءجۇر. مادەنيەتىمىز ۇلكەن داعدارىسقا ۇشىراعان. شىنايى مادەني شاراعا ارالاسقىڭ كەلەدى... جوق! جارامساق جيىندار، ادام ۇيالاتىن وتىرىستار. بۇل - تابيعي قۇبىلىس، سەبەبى مادەنيەت شىنايى ومىردەن وقشاۋلانىپ كەتە المايدى، ول دا زامان تەلىگەن ارسىز ەرەجەلەردىڭ جەتەگىنە ەرەدى. قازىر - توبىرعا ءۇمىت ارتقان كەزەڭ. ادامداردىڭ ميىن ءوشىرىپ، سەزىمىن عانا قالدىرعان. ينستينكتەرىن كۇشەيتكەن.
اباي دەيسىز. قايداعى، اباي؟ اباي دا، ءاليحان مەن مۇستافا دا قازىرگى زامانعا تاپ بولسا، ءومىر سۇرە الماس ەدى. ولاردى كىم تىڭداسىن؟ ءبىزدىڭ ءومىر - ءبارى ساتىلاتىن، ءبارى ساتىپ الىناتىن قارا بازار. شۋىل كۇشتى، جالقىلاردىڭ ءۇنىن كومىپ كەتەدى. سوندىقتان مەنىڭ ىستەپ جۇرگەنىمدى شوك تەراپياسى دەسە بولار. ول اۋىرتادى، بىراق امال نە، ادامداردى سەلت ەتكىزۋدىڭ باسقا امالى قالمادى. ال بىزدە ءبارى كەرەمەت دەپ، كوپتىڭ انىنە قوسىلىپ كەتۋگە ارىم جىبەرمەيدى.
- ءسىز رەجيسسەرلىككە كەلمەستەن بۇرىن جۋرناليست تە، مەديا سالاسىندا باسشى دا بولدىڭىز، سونىمەن قاتار شىعارماشىلىقتى قاتار الىپ ءجۇرىپ، «پرەليۋديا»، «تامگا»، «مامليۋك» سەكىلدى كىتاپتار مەن «ابىلقايىر حان»، «مۇستافا شوقاي»، «ءسىز كىمسىز، كا مىرزا؟» سىندى فيلمدەردىڭ ستسەناريلەرىن جازدىڭىز. سوڭىندا بارىپ باي تاجىريبەمەن كينوعا كەلدىڭىز. اڭگىمەمىزدى قازاق كينوسىنا ويىستىرساق، «كينومىز العا دامىپ جاتىر» دەيدى كەيبىر كينوگەرلەرىمىز، بىراق كورىپ وتىرعان فيلمدەرىمىزدىڭ سيقى: بىرىندە قازاق - القاش، ەكىنشىسىندە - جەتىم بالالار ۇيىنەن شىققان ءمۇساپىر قىز، ءۇشىنشىسى - كيىز ۇيدەن ءالى شىقپاعان بايىرعى قازاق. تاپتاۋرىن ستسەناريلەر. شىن مانىندە، بۇگىنگى قازاق باسقا عوي: وليگارح، ءبىرى - ءدىندار، تاعىسىن تاعى. ەندەشە، نەگە ءبىز ەل بايلىعىن ساتىپ، شەتەل اسىپ كەتكەن مىرزالار جايلى نەگە تۇسىرمەيمىز؟ نەمەسە «اڭقاۋ ەلدىڭ ارامزا مولدالارى» جايلى نەگە تۇسىرمەيمىز؟ قورقامىز با؟ كىمنەن؟ الدە ورەمىز جەتپەي مە؟
- كينومىزدى قازىر ءبارى ەزىپ جاتىر، سوندىقتان مەن ەشتەڭە دە ايتپاي-اق قويايىن. بۇل جايلى ءوز پىكىرىم بار: جەتكەن جەتىستىك تە بار، بىراق ءبارى كەرەمەت ەمەس. شيەلەنىسكەن شارۋا جەتەرلىك. الايدا ءبىر نارسەنى اشىپ ايتا الامىن. ەلدىڭ ءبارى شەتەلگە قاشىپ جاتقاندا مەنىڭ شەتەلدەن ورالۋىمنىڭ دا سەبەبى سوندا. وزىمە جايلى جۇمىس، جاقسى ءومىر ۇسىنعان جات مەملەكەتتە تىپ-تىنىش جاتا بەرۋىمە بولار ەدى. كينونى ول جاقتا دا تۇسىرۋگە بولادى. بىرەۋگە ءوز دۇنيەتانىمىمدى تاڭىپ، ۇيرەتكىم كەلمەيدى. تەك ءوز كۇمانىمدى ورتاعا سالامىن. ويىممەن بولىسەمىن. سودان ۇندەستىك تاپقان ادام نە ىستەۋ كەرەكتىگىن ءوزى تۇسىنەدى. مەنىمەن تىلدەسكەننەن كەيىن بىلىكتىلىك ىزدەسە، الەمدى، ءوزىن زەرتتەي باستاسا، كەيبىرەۋلەردىڭ جالدامالى پيار-مەنەدجەرلەرى ارقىلى تاڭعان تاقىرىپتاردى قوڭىرسىتۋىن قويسا... ءبىر سوزبەن ايتقاندا توقتاسا، ويلانسا، ماعان سول جەتكىلىكتى. اسقازان، جۇرەك، بوكسەنىڭ قايسىسى ماڭىزدىراق ەكەنىن ءوزى تاڭداسىن.
- وسى، جىل سايىن بالەننىڭ اتىنداعى، تۇگەننىڭ اتىنداعى دەپ كينو، تەاتر فەستيۆالدەرى ءوتىپ جاتادى. سونىڭ ءبارى نە ءۇشىن؟ نە بەرەدى ول ءبىزدىڭ مادەنيەتىمىزگە؟ كاسىبي مامان رەتىندە وسىنى ءتۇسىندىرىپ بەرە الاسىز با؟
- دۇنيەجۇزىندە جىلىنا جۇزدەگەن، مىڭداعان كينوفەستيۆالدەر وتەدى. ەۋروپانىڭ ءار قالاسىندا ءبىر ماقساتتى دىتتەگەن بىرنەشەۋى وتەدى. اتاپ ايتامىن، ماقساتى بار. بىراق، بايقاۋىمشا، بىزدەگى ونداي شارالاردىڭ كەيبىرى تەك «وتكىزدىك» دەگەن اتاق ءۇشىن عانا ۇيىمداستىرىلاتىن سياقتى. ماسەلەن، ەكشن-فيلمدەر فەستيۆالى. بىزدە ەكشن-فيلمدەر بۋدا-بۋداسىمەن ءتۇسىرىلىپ جاتىر ما؟ تيمۋر مەنىڭ جاقىن جولداسىم، قۇرمەتتەيمىن. بىرگە جۇمىس تا ىستەگەنبىز. وتە كاسىپقوي مامان. كەزىندە «قازاقفيلمنىڭ» دالىزىندە سىزبالارىن كوتەرىپ جۇرەتىن جىگىتتى كابينەتتەن كابينەتكە قۋالاۋشى ەدى. ەندى الدىنا قىزىل كىلەم جايىپ ابىگەر. مەن ونىڭ جەتىستىككە جەتكەنىنە قۋانىشتىمىن. تيمۋر ءوز وتانداستارىڭ قۇرمەتتەۋى ءۇشىن جات جۇرتتى مويىنداتۋىڭ كەرەك ەكەنىن تاعى ءبىر دالەلدەدى.
فەستيۆال، بايقاۋ دەگەندەر جاستاردىڭ باعىن اشۋ ءۇشىن، كاسىبي دەڭگەيدى كوتەرۋ، جاڭانى ۇيرەنۋ ءۇشىن ۇيىمداستىرىلۋى كەرەك. شىن جەتىستىگىڭدى كورسەتىپ بەرەدى. فەستيۆال دەگەن توي ەمەس. بۇل جۇمىس شاراسى. ەڭ ماڭىزدىسى ول جەكە ادامداردىڭ جەكە جۇمىسى بولماي، مەملەكەتكە قىزمەت ەتۋى كەرەك.
- ءسىز قانشاما جىل شەتەلدە، اتاپ ايتقاندا سيريا، يوردانيا سەكىلدى يسلام ەلدەرىندە ءومىر ءسۇردىڭىز. شەتتە ءومىر سۇرگەن ادام ەلدەگى ادامنان گورى ەلىن، وتانىن الدەقايدا كەڭىرەك تانيتىنى ءسوزسىز. سول جات ەلدە ءومىر سۇرگەن كەزدەرىڭىزدە، قازاق ەلى، قازاقستان جايلى نە وي ءتۇيدىڭىز؟ ءبىزدىڭ وزگە ەلدەردەن قاي قىرىمىز ارتىق، قاي جاعىنان بىزگە قارنىڭىز اشتى؟ ەلگە قايتا كەلگەن سوڭ قانداي سەزىمدە بولدىڭىز؟ قايتادان شەكارا اسىپ كەتكىڭىز كەلە مە، الدە قانداي دا بولسا وسى ەلدە سۇيەگىڭىزدىڭ قالعانىن قالايسىز با؟
- ەشقايدا كەتپەيمىن، كەتپەك تە ەمەسپىن. بۇل - مەنىڭ جەرىم، مەن ءوز ءۇيىمدە ءجۇرمىن. ەسىمدە، اقش-تا ءومىر سۇرگەن ءبىر جىلىمدا ءوڭ مەن ءتۇس اراسىنداعىداي كۇي كەشتىم. ارالادىم، تانىستىم، وقۋ-شوقۋمەن اينالىستىم، ال ودان سوڭ... ودان سوڭ تۋعان توپىراقتى اڭساي باستادىم. تانىستارىمنان ەلدە جۇرگەندە قىزىعا قويماعان «تاماشانىڭ» بەينەتاسپاسىن جولداۋدى ءوتىندىم. كورىپ وتىرىپ اعىل-تەگىل جىلايمىن. كورشى تۇراتىن قاپ-قارا جىگىتتەر بايقاپ قالىپ «نە كورىپ وتىرسىڭ؟ سپەكتاكل مە؟» دەپ سۇرايدى. «ءيا، سوعان ۇقساس دۇنيە» دەيمىن. ولار «ا، سپەكتاكل بولسا تراگەديا عوي» دەپ دولبارلايدى. «جوق، ءازىل-وسپاق» دەسەم، اڭتارىلىپ قالادى: «وندا نەگە جىلايسىڭ؟». «بۇل قارا يۋمور» دەپ» قۇتىلامىن. «تاماشانىڭ» نە ەكەنىن ولارعا قايتىپ ۇقتىرايىن؟ تاعى جارتى جىلدان سوڭ دوستارىما دومبىرا مەن كۇيلەر سالىپ جىبەرۋ تۋرالى ءوتىنىش جاسادىم. بولمەمدە وتىرىپ الىپ تىڭقىلداتا بەرەتىنمىن. اقىرى «الاتاۋ» مەن «كىشكەنتايدى» ناقىشىنا كەلتىرىپ ورىندايتىن دارەجەگە جەتتىم. ارينە، قارشىعا نەمەسە ايگۇل ۇلكەنباەۆامەن سالىستىرۋعا كەلمەس، بىراق ۇيدەگىلەر اۋزىن اشىپ وتىرىپ تىڭدايتىن...
ال اراب ەلدەرىنە مەن ماملۇكتەر مەن بەيبارىسقا قاتىستى دەرەك جيناۋ ءۇشىن باردىم، ءدىن تاريحىمەن تانىسۋ تۋرالى جەكە ماقساتىم دا بار ەدى. ول ساپاردىڭ پايداسى كوپ بولدى. كوپ جەردى ارالادىم، قۇم اراسىنداعى ءماملۇك بەكىنىستەرى ۇيىندىلەرىنىڭ ماڭىنا قوندىم، قاسيەتتى جەرلەرمەن تانىستىم. نە ءۇشىن دەيسىز عوي؟ مەن ينتەرنەت ارقىلى الىنعان ءبىلىمدى مويىندامايمىن. قولمەن ۇستاپ، كوزبەن كورگەنگە، دەرەكناماشىلار اۋزىنان ەستىگەنگە عانا سەنەمىن. ماملۇكتانۋشىلارمەن، بەيبارىستانۋشىلارمەن، يمامدارمەن، پراۆوسلاۆ پوپتارىمەن، ەۆرەي راۆۆيندەرىمەن، قاريلارمەن تىكەلەي سويلەستىم. حريستياندىق، يۋدەي، يسلام ءدىنىنىڭ شىنايى ماعىناسىن ۇققانداي بولدىم، ءارى جۇرەگىندە قۇدايى بار جاندارعا قۇرمەتىم ارتتى. قۇداي جولىنا شىنداپ تۇسكەن پەندەلەر جاراتقانعا دەگەن ماحابباتىن جارنامالاپ، ونى مەنىكى، سەنىكى دەپ بولمەيدى ەكەن. بۇل جاعىنان ۇيرەنەرىمىز ءالى كوپ، ءبىز ەندى عانا مەشىت سالا باستاعان ەلمىز. بىزدە مەشىت كوپ، ءبارى سۋ جاڭا. بىراق بۇل - جارتىلاي عانا جەتىستىك. ەڭ باستىسى، ول جەردە كىم ۋاعىز ايتاتىنىندا.
- اڭگىمەڭىزگە راقمەت.
الاشقا ايتار داتىم...
ابايدىڭ زامانىنان بەرى جان دۇنيەمىز ەش وزگەرمەگەنىنە كۇيىنەمىن. اباي قازاقتى جالقاۋ، ماقتانشاق، قىڭىر، قاراڭعى، ەكىجۇزدى، شىرت ەتپە، كەۋدەمسوق ەتىپ سيپاتتادى ەمەس پە... وسى ءۇشىن ابايدى كىم جاقسى كورىپ ەدى؟ قازاق تەك ماقتاعاندى جاقسى كورەدى. ايتىڭدارشى، نە وزگەردى؟ شىن كەلبەتىمىز سول بولسا نەگە مەن دە قازاعىم تۋرالى اشىنىپ سويلەمەۋىم كەرەك؟ انا بالاسىن بۇزىقتىعى ءۇشىن ۇرعاندا، قايسىسىنىڭ جانى قاتتىراق اۋىرادى؟ اكە ۇلىن ماسقارا ءىسى ءۇشىن سوگىپ جاتقاندا، قايسىسى قاتتىراق ۇيالىپ، نامىستانادى؟ كەيدە قاتتى ايتاتىنىم راس، بىراق سول سوزدەرىمنىڭ استارىنا ءۇڭىلسىن...
اۆتور: ءماريام ءابساتتار
"الاش ايناسى" گازەتى
