«قيالشىلدار كلۋبى»
نەمەسە رەفورمالار كوشى نەگە جىلجىمايدى؟
وسى بىزدە بيلىك ماڭايىنداعى، سونىڭ ىشىندە، پرەزيدەنت جانىنداعى كونسۋلتاتيۆتىك-كەڭەستىك قۇرىلىمدار تىم كوبەيىپ كەتكەن جوق پا؟
مىنە، كەشە عانا رەفورمالار جونىندەگى جوعارعى كەڭەستىڭ كەزەكتى وتىرىسى ءوتتى.
جاسىراتىنى جوق، وسى قۇرىلىم قۇرىلعاندا ءوز باسىم: «پارلامەنت پەن ۇكىمەتتىڭ ءتۇرى اناۋ. جوعارىدان ءبىر پارمەن بولماسا، ورنىنان قوزعالا قويمايدى. وكىمەت ماڭىنداعى قىرۋار قوعامدىق قۇرىلىمداردىڭ دا باعاسى بەلگىلى: ءبارى دە نازارباەۆ تۇسىندا قۇرىلعان، سونىڭ سويىلىن سوققان، ەندى كەلىپ رەفورماشىل بولا قويماس. ءبىر نارسە شىقسا، پرەزيدەنت توقاەۆ ءوزى جاساقتاعان وسى كەڭەستەن شىعار»، - دەگەن سىڭايدا پىكىر بىلدىرگەن ەدىم (راس، ءبىر عانا سىن-ەسكەرتپە ايتقانمىن، ويتكەنى جك قۇرامىندا نەگىزىنەن شەنەۋىكتەر بار ەكەن دە، قوعامدىق ۇيىمدار وكىلدەرى جوقتىڭ قاسى ەكەن، بىراق ول سىنىما كىم قۇلاق استى دەيسىز).
سول رجك قۇرىلعانىنا 2 جىل بوپ قالىپتى.
وسىنشاما ۋاقىت ىشىندە ول نەسىمەن ەستە قالدى؟ ءوزى سىندى باسقا كەڭەسشى ورگانداردان نەسىمەن ەرەكشەلەندى؟
ءوزىن «رەفورماتورمىن» دەپ اتاعان پرەزيدەنتتىڭ ەلدە رەفورمالاردى شىنداپ قولعا الۋىنا سەپتىگىن تيگىزەتىن نەندەي ناقتى باستامالار كوتەردى؟
ەڭ باستىسى – رەفورمالاردىڭ (نەمەسە ولاردىڭ يميتاتسياسىنىڭ) قىزىعىن دا، شىجىعىن دا كورەتىن قاراپايىم حالىق ەمەس پە؟!
ولاي بولسا، ەڭ الدىمەن، ءوز جوسپارلارى مەن جوبالارىمەن سول حالىقتى جان-جاقتى ءارى كەڭىنەن تانىستىرماي ما؟
قاراپ وتىرساڭىز، رجك جۇمىسى تۋرالى جان-جاقتى ءارى جۇرت تۇشىنار اقپارات جوق! قۇددى ءبىر بارشا جۇرتتان جاسىرىنىپ، ايدالاداعى بۋنكەردە جاتىپ الىپ، قۇجاتتار جازىپ جاتقان سىقىلدى. كەشەگى جيىن تۋارلى اقپاراتتى دا رەسمي ءباسپاسوز رەليزىنەن عانا الدىق.
سويتسەك، كەشە دە بىرقاتار ماڭىزدى ماسەلەلەر قاراستىرىلىپتى: قارجى سالاسى، ناقتى ەكونوميكانى قارجىلاندىرۋ، اەس سالۋ، ەڭبەك ميگرانتتارىنىڭ جاعدايى.
ءسوز جوق، وزەكتى پروبلەمالار.
بىراق، كۇن تارتىبىندەگى ماسەلەلەر بويىنشا باياندامالار جاساپ جاتقان كىمدەر؟ وسى سالاعا جاۋاپتى مينيسترلەر!
رەفورمالارعا قارسى كوڭىل-كۇيدىڭ ءبىر نەگىزى ناق سول سالا باسشىلارىندا جاتىر ەمەس پە؟ ويتكەنى، رەفورما، ياعني وزگەرىس، جاساۋ ءۇشىن، ەڭ الدىمەن، ناقتى سالاداعى جاعدايعا جانە سالالىق مينيسترلىكتىڭ جۇمىسىنا مەيلىنشە وبەكتيۆتى باعا بەرىلۋى ءتيىس. كەمشىلىكتەردىڭ بەتى اشىلۋى كەرەك، سودان كەيىن عانا ولاردى جويۋدىڭ جولدارى اتالادى ەمەس پە؟
قاي مينيستر ءوز جۇمىسىنا قاتىستى سىن ايتادى؟!
ولاي بولسا، بۇل وتىرىستىڭ ۇكىمەت ماجىلىسىنەن نە ايىرماشىلىعى بار؟ رجك ۇكىمەت جۇمىسىن قايتالاپ وتىرعان جوق پا؟
سونىمەن بىرگە، كەز كەلگەن رەفورمانىڭ ەڭ باستى قوزعاۋشى كۇشى – حالىق! ولاي بولسا، ەكونوميكا، الەۋمەتتىك جانە قۇقىقتىق، قوعامدىق-ساياسي سالالارداعى بولاشاق رەفورمالاردىڭ جوبالارى نەگە اشىق تۇردە، مۇددەلى توپتاردىڭ، بىلىكتى ماماندار مەن تاۋەلسىز ساراپشىلار، بەلسەندى ازاماتتاردىڭ قاتىسۋىمەن تالقىلانبايدى؟
قازىرگى زىمىران زاماندا رجك مۇشەلەرى تەلەەكراننان تۇسپەي، ينتەرنەت پەن الەۋمەتتىك جەلىلەردە وزدەرى پرەزيدەنتكە ۇسىنعالى جاتقان ءاربىر باستامانى قوعاممەن بىرگە قىزۋ تالقىلاپ، ەلدىڭ قوعامدىق-ساياسي ءومىرىنىڭ ەڭ باستى نيۋسمەيكەرلەرىنە اينالۋى ءتيىس ەمەس پە؟
بىزدە بولسا، ونداي جوق!
ايتپەسە، ياعني سول رەفورمالاردىڭ جەمىسىن كورۋ جازعان قوعاممەن كەڭەسىپ، كەلىسىپ، تون پىشپەسە، بۇل كەڭەس، توقاەۆتىڭ ءوزى ايتقانداي، «قيالشىلدار كلۋبىنا» اينالىپ كەتۋى دە عاجاپ ەمەس!
ال قيالشىلدىق پەن قياليلىقتىڭ اراسى – ءبىر قادام!
ءامىرجان قوسان
Abai.kz
