بوريس، سەنىكى دۇرىس ەمەس!
«بوريس، سەنىكى دۇرىس ەمەس!» دەگەن قاناتتى ءسوز كەزىندە كوممۋنيستىك بيۋروكراتيامەن كۇرەسكەن بوريس ەلتسينگە ەگور ليگاچەۆ دەگەن كومپارتيانىڭ ورتودوكس باعىتتاعى باس يدەولوگىنىڭ ازۋىنان شىعىپ، جاڭاشا تاريحتا التىن بولماسا دا، كوممۋنيستەردىڭ جالاۋىنىڭ ءتۇسى ىسپەتتەس – قىزىل ارىپپەن جازىلىپ قالىپ ەدى.
مىنە، سودان بەرى قىرىق جىل ءوتىپتى.
ەندى، مىنە، وسى ءسوزدى ۇلىبريتانياداعى ۇكىمەت داعدارىسىنا قاتىستى «بوريس، سەنىكى دۇرىس ەمەس!»، - دەپ سول ەلدىڭ پرەمەر-ءمينيسترى بوريس دجونسونعا ايتۋعا ءماجبۇرمىز.
ماسەلەنىڭ ءمانىسى مىنادا.
پرەمەر رەتىندە دجونسون پينچەر دەگەن بىرەۋگە تىكەلەي قول ۇشىن بەرىپ جۇرەدى. وسىرەدى، وندىرەدى. ونىڭ مورالدىق كەلبەتى تۋرالى اششى شىندىق – اراققا سالىنعان ءارى كورىنگەنگە كوز سۇزەر ەركەكقۇمار – وعان و باستان ءمالىم بولسا دا، بوريس ونى قولداۋىن توقتاتپايدى، پارتيا مەن ۇكىمەتتەگى اسا جاۋاپتى قىزمەتتەرگە تارتادى.
ءتوزىمنىڭ دە شەگى بار. قانشاما سىن ايتىلسا دا، پرەمەردىڭ تىكەلەي قولداۋىمەن ساياسي كارەراسىن جالعاستىرا بەرگەن پينچەر جاقىندا تاعى دا كوزگە ءتۇسىپتى: كوپشىلىك جەردە اراققا سىلقيا تويىپ الىپ، كوزى تۇسكەن ەكى ەركەككە تيىسكەن ەكەن.
ايتپاقشى، پرەمەردىڭ ءوزى دە بۇعان دەيىن كوۆيدتىك قاتاڭ كارانتين تۇسىندا داۋنينگ-ستريتتەگى ءوز كەڭسەسىندە كوڭىلدى كەشتەر وتكىزىپ كوزگە ءتۇسىپ قالعان-دى.
مىنە، وسىنىڭ ءبارى دجونسوننىڭ پارتيالاس ارىپتەستەرىنىڭ اشۋ-ىزاسىن تۋعىزىپ، ولار توپ-توبىمەن پارتيا قاتارىنان شىعىپ، قىزمەتتەرىنەن كەتە باستادى. بارلىعى 30 ادام!
سويتكەن ولار بوريس دجونسوننىڭ وزىنەن قىزمەتىنەن كەتۋدى تالاپ ەتەدى!
باسىندا قارسىلىق تانىتقان ول ەندى، مىنە، كەشە ءوز ەركىمەن وتستاۆكاعا كەتتى.
الىستاعى ۇلىبريتانياداعى وسى جاعداي تۋرالى مەن نەگە جازىپ وتىرمىن؟
سەبەبى ءبىر: بىزدە شەنەۋنىكتەرگە قاتىستى اڭگىمە بولعاندا، ولاردىڭ مورالدىق، ادامي قادىر-قاسيەتتەرى تۋرالى كوپ ايتا بەرمەيمىز.
سىناساق، نەگىزىنەن ونىڭ قىزمەتى نە اتقارىپ جاتقان ءىسى مەن رەسمي جيىنداردا ايتقان سوزدەرىنە بايلانىستى سىن ايتامىز. ولاردىڭ جەكە ءومىرى جايىندا بىلە بەرمەيمىز.
مەنىڭشە، حالىقتىڭ سالىعىنىڭ ارقاسىندا كۇن كورىپ جۇرگەن كەز كەلگەن ادامنىڭ – اۋىل اكىمىنەن باستاپ پرەزيدەنتكە دەيىن – كەسكىن-كەلبەتى، جەكە ومىرىنە قاتىستى بار اقپارات مەيلىنشە اشىق تا جاريا بولۋى ءتيىس!
ونداي اشىقتىق ۇناماي ما، وندا مەملەكەتتىك قىزمەتتەن كەت، جەكە تىرلىكپەن اينالىس، سول كەزدە سەنىڭ قاي جەردە كىممەن داستارحانداس بولعانىڭدا ەشكىمنىڭ دە شاتاعى بولمايدى!
كوردىڭىز بە، جەكە ومىرىنە قاتىستى ءبىر عانا ىڭعايسىز جايت ءۇشىن شەنەۋنىكتىڭ ءوزى عانا تاياق جەپ قويماي، وعان پروتەكتسيا جاساپ كەلگەن دىرداي ۇكىمەت باسشىسى دا ءوزىن ساياسي قۇرباندىققا شالدى.
ارينە، ءبوريستىڭ: «باسقا ادامنىڭ وقىس قىلىعىنا مەنىڭ ەش قاتىسىم جوق! قىزمەتىمدە قالامىن!»، - دەپ قاسارىسىپ قالۋىنا دا بولاتىن ەدى عوي. بريتان پرەمەرى ويتپەدى. دجەنتلمەندىك تانىتتى. باسقا بىرەۋلەر سەكىلدى كرەسلوعا جابىسىپ قالعان جوق. ويتكەنى، ول جاقتا مورالدىق قۇندىلىقتاردى ورنى بولەك. قوعامدىق پىكىردىڭ سالماعى بولەك.
ايتپەسە، پرەمەر رەتىندە دجونسونعا حالقىنىڭ تاعار ەش كىناسى جوق: ەكونوميكا مەن الەۋمەتتىك سالا دامىپ كەلەدى، عالامدىق داعدارىس پەن پاندەميا قيىندىقتارىنان ەلى امان-ساۋ شىعىپ كەلەدى، الەمدىك ساياساتتاعى ۇلىبريتانيانىڭ ورنى سول قالپىندا. اسىرەسە، ونىڭ ۋكرايناداعى سوعىسقا قاتىستى بەلسەندى پوزيتسياسى بارشا جۇرتتى ءتانتى ەتىپ، ونىڭ حالىقارالىق الاڭداعى بەدەلىن اسپانعا ءبىر شىعاردى.
تەك انەۋبىر پارتيالاسىنىڭ ءوز باسشىسىن ۇياتقا قالدىرعانى بولماسا: ونداي وڭباعانعا قولداۋ كورسەتىپ كەلگەن بوريستىكى شىنىمەن دە دۇرىس بولمادى!
ءامىرجان قوسان
Abai.kz
