قاراباقتا قايتا قان توگىلدى. ەكى جىل بۇرىن 44 كۇنگە سوزىلعان الاپات سوعىس وشاعىندا تاعى اتىس بولدى. باسقىنشى ارميان اسكەرى تاعى دا كەلىسىمدى بۇزىپ، كەلىسسوزدى ورىندامادى. 

2020 جىلى 9-قاراشادا ارمەنيا، رەسەي جانە ازەربايجان ۇشجاقتى كەلىسىم جاساعان بولاتىن. كەلىسىمگە ساي ارمەنيا قاراباقتاعى جەتى اۋداننىڭ بەسەۋىن ءوز ەركىمەن قايتارۋى ءتيىس ەدى. ال قالعان ەكى اۋدان بەس جىلدىڭ ىشىندە بىرتىندەپ قايتارىلۋى قاجەت. ازەربايجان سوعىستا ءتورت اۋداندى ۇرىسپەن السا، قالعان بىرەۋىن كەلىسىممەن قايتاردى. قاراباقتىڭ جۇرەگى سانالاتىن شۋشا قالاسىن قايتارعان سوڭ، ەرەۆان ەرىكسىز كەلىسسوز ۇستەلىنە وتىرىپ، شارتتاردى ورىنداۋعا كەلىستى. الايدا ءالى كۇنگە دەيىن قۇجاتتا جازىلعان مىندەتتەمەلەردى تۇلكىبۇلاڭعا سالىپ، ورىنداماي كەلەدى.

كەلىسىم بويىنشا ارمەنيا قاراباقتاعى بارلىق اسكەرىن شىعارۋى ءتيىس بولاتىن. انە-مىنە دەپ سوزبالاقتاعان ارمەنيا، ماۋسىم ايىندا بارلىق اسكەرىن اكەتەمىز دەپ ۋادە بەرگەن ەدى، الايدا ادەتتەگىدەي ۋادەسىن ورىندامادى. ماۋسىمدا كۇزدە شىعارامىز دەپ مالىمدەدى. وسىلايشا ۋاقىت سوزىپ كەلەدى.

كەلىسىمنىڭ تاعى ءبىر تۇسىندى ولار مينالانعان ايماقتىڭ كارتاسىن باكۋگە بەرۋ كەرەك بولاتىن. الايدا بەرگەن كارتالارىنىڭ دالدىگى جيىرما پايىزعا دا جەتپەيتىنى انىقتالدى، ياعني وسى ارقىلى ولار ازەربايجان ساپەرلارىن ميناعا ايداپ سالماق بولدى. بۇل ازەربايجان بيلىگىنىڭ تالابىن مازات ەتۋ ىسپەتتەس قابىلداندى.

تامىز ايىنىڭ باسىندا ارمەنيا قاراباقتا قاقتىعىستى ۋشىقتىرىپ، جاعدايعا رەسەي اسكەرى مەن ۇقشۇ اسكەرىن تارتۋ ماقساتىندا بىرنەشە ارانداتۋ ارەكەتىنە باردى. رەسەي بىتىمگەرلىك كۇشتەرىنىڭ باقىلاۋىندا تۇرعان ايماقتا ارمەنيا ارانداتۋ جاساپ، ازەربايجان اسكەرىنىڭ پوزيتسيالارىن اتقىلادى. سالدارىنان ءبىر سارباز قازا تاۋىپ، بىرنەشەۋى جارالاندى. باكۋ قارىمتا سوققى جاساۋعا ءماجبۇر بولىپ، "كەك" اتتى وپەراتسيانى جاريالادى. ول بويىنشا حودجالى ايماعىن باقىلاۋعا بولاتىن "قىرىققىز" بيىكتىگى مەن وزگە ءتورت بيىكتىكتى قايتارىپ الدى. ارمەنيانىڭ اسكەري بەكەتتەرىنە سوققى جاساپ، اسكەري شتابىن اتقىلادى. باسقىنشىنىڭ وننان استام ساربازى قازا تاۋىپ، جاراقات الدى. ارتيللەريا جانە بروندى تەحنيكالارى تالقاندالدى.

ازەربايجان ارمەنيانى كەلىسىمدى بۇزدى دەپ ايىپتادى. ارمەنيا كەرىسىنشە كىنانى باكۋگە ءۇيىپ-توگۋدە. ۇقشۇ بولسا ەكى جاقتى كەلىسىمگە كەلۋگە شاقىرۋدا. ارمەنيادا قاراباق سوعىسىنان كەيىن ساياسي داعدارىس ۋشىقتى. "پاشينياندى تاقتان تايدىرىپ، قاراباقتى باسىپ الامىز" دەيتىن رەۆانشتىق كۇشتەر كۇش الۋدا. بۇل ارمەنيا ەلىن تولىق كۇيرەتۋى مۇمكىن.

ازەربايجان قاراباقتىڭ قايتارىلعان اۋداندارىندا قۇرىلىس جۇمىستارىن جۇرگىزۋدە. شۋشا قالاسىندا قارقىندى تۇردە ءتۇرلى نىساندار سالىنۋدا. جاۋ قولىنان ازات ەتىلگەن اۋدانداردى مينادان تازارتۋ ىسكە اسۋدا. فيزۋلي اۋدانىندا حالىقارالىق تالاپقا ساي اۋەجاي اشىلدى. بۇل باكۋدىڭ اتالمىش ايماقتى قالاي دامىتۋعا مۇددەلى ەكەنىن كورسەتەدى.

Abai.kz