اعىمداعى جىلدىڭ 14-17 تامىز كۇندەرى جيدەبايداعى «اباي-شاكارىم» مەموريالدىق كەشەنىندە جالپى ءبىلىم بەرەتىن مەكتەپتەردىڭ ءبىلىم الۋشىلارىنىڭ اراسىندا ءححىىى رەسپۋبليكالىق اباي وقۋلارى ءوتتى.

قازاق حالقىنىڭ ادەبي مۇراسىن ناسيحاتتاۋ، وقۋشىلاردىڭ كلاسسيكالىق قازاق ادەبيەتىن وقۋعا قىزىعۋشىلىعىن ارتتىرۋ، اباي مەن شاكارىم شىعارماشىلىعىن ناسيحاتتاۋ، وقۋشىلاردىڭ ەستەتيكالىق تالعامىن، شىعارماشىلىق قابىلەتتەرىن دامىتۋ، ۇلى اقىنداردىڭ پوەزياسىنا، رۋحاني مۇراسىنا دەگەن سۇيىسپەنشىلىككە تاربيەلەۋدى ماقسات تۇتقان بايقاۋ ءۇش كەزەڭنەن تۇرادى: اۋداندىق (قالالىق), وبلىستىق جانە رەسپۋبليكالىق (قورىتىندى).

اباي وقۋلارىنىڭ رەسپۋبليكالىق كەزەڭىنە قازاقستاننىڭ بارلىق وبلىستارىنان، نۇر-سۇلتان، الماتى جانە شىمكەنت قالالارىنان، رەسپۋبليكالىق ءبىلىم بەرۋ ۇيىمدارىنان، «نازارباەۆ زياتكەرلىك مەكتەپتەرى» دببۇ-دان كوماندالار قاتىستى. اباي وقۋلارىنىڭ رەسپۋبليكالىق قورىتىندى كەزەڭىنە ءوز وبلىسىنىڭ جەڭىمپازى اتانعان، اباي شىعارمالارىن جەتىك بىلەتىن، ءوز مەكتەپتەرىنەن وزىپ شىققان تالانتتى 126 وقۋشى 6 نوميناتسيا بويىنشا بايگەگە ءتۇسىپ، باقتارىن سىنادى.

اباي وقۋلارىنىڭ قاتىسۋشىلارىنا مازمۇندى مادەني - تانىمدىق باعدارلاما دايىندالدى: سەمەي قالاسىندا بيولوگيالىق ورتالىقتى ارالاپ، اباي ەسكەرتكىشىنە گۇل شوقتارىن قويدى جانە سەمەي يادرولىق پوليگون قۇرباندارىنا ارنالعان ەسكەرتكىشكە تاعزىم ەتتى. سونداي-اق، اباي اۋدانىنىڭ شەكاراسىندا اباي اۋدانىنىڭ اكىمشىلىگى، ءبىلىم بەرۋ ءبولىمى بارلىق قوناقتاردى قۇشاق جايا قارسى الدى. قاتىسۋشىلار مەن جەتەكشىلەر بورلىدەگى اباي جانە م.اۋەزوۆ مۇراجايىنا جانە سىرت قاسقابۇلاقتاعى ابايدىڭ تۋعان جەرىنە ساياحات جاساپ، «ەڭلىك-كەبەك»، شىلىكتى كەزەڭدەگى تەاترلاندىرىلعان كورىنىستەردى تاماشالادى. اباي وقۋلارىنىڭ وتكىزىلۋ بارىسىندا جيدەبايداعى «اباي-شاكارىم» مەموريالدىق كەشەنىنىڭ جانىنان 10-نان استام كيىز ءۇي كوتەرىلىپ قاتىسۋشىلار اشىق اسپان اياسىندا تاماقتاندى. وقۋشىلار ءوز ونەرلەرىن اشىق امفيتەاتردا كورسەتتى. ءححىىى رەسپۋبليكالىق اباي وقۋلارىنىڭ اشىلۋ سالتاناتى قاراۋىلداعى اباي اۋداندىق مادەنيەت ۇيىندە وتسە، جەڭىمپازدار مەن جۇلدەگەرلەردى ماراپاتتاۋ ءراسىمى جيدەبايداعى «اباي-شاكارىم» مەموريالدىق كەشەنىنىڭ اشىق امفيتەاترىندا ءوتتى.

اباي وقۋلارىنىڭ جەڭىمپازدارى مەن جۇلدەگەرلەرى اتانعان 57 وقۋشى قازاقستان رەسپۋبليكاسى ءبىلىم جانە عىلىم مينيسترلىگىنىڭ ءى، ءىى، ءىىى دارەجەلى ديپلومدارىمەن جانە التىن، كۇمىس، قولا مەدالدارىمەن ماراپاتتالدى. ونىڭ ىشىندە ءى دارەجەلى ديپلومعا - 12 وقۋشى، ءىى دارەجەلى ديپلومعا - 19 وقۋشى، ءىىى دارەجەلى ديپلومعا – 26 وقۋشى يە بولدى. ورىن العان قاتىسشۋىلارعا باعالى سىيلىقتار دا تاپسىرىلدى. ءبىرىنشى ورىنعا قۇلاققاپ/ناۋشنيكي، ەكىنشى ورىنعا سمارت-بىلەزىك، ءۇشىنشى ورىنعا «پاۋەر بەنك» زاريادتاعىش قۇرىلعى تابىستالدى.

سونىمەن قاتار، «دارىن» رەسپۋبليكالىق عىلىمي-پراكتيكالىق ورتالىعىنىڭ گراموتالارمەن 28 وقۋشى ماراپاتتالدى جانە بارلىق قاتىسۋشىلارعا سەرتيفيكاتتار مەن «دارىن» لوگوتيپى بار فۋتبولكالار بەرىلدى جانە جەڭىمپاز بەن جۇلدەگەر دايىنداعان جەتەكشىلەرگە العىس حات تابىستالدى.

Abai.kz