ۋكراينا سوعىسى قايتا پوزيتسيالىق سيپاتقا ۇلاستى. حەرسون جانە زاپاروجە ماڭىنداعى شابۋىل قارقىنى باسەڭدەدى.

بۇل ۋكراينانىڭ ناقتى شابۋىل ەمەس، قارسىلاستىڭ قورعانىس شەبىنىڭ وسالررىق بەردى تۇسىن انىقتاۋ وپەراتسياسى ەكەنى ايقىندالدى. سوعان قاراماستان ۋكراينا اسكەرى 5 ەلدى-مەكەندى ازات ەتىپ، حەرسوننىڭ سولتۇستىك بولىگىنە اپاراتىن كوپىرلەر مەن وتكەلدەردى جويا ءبىلدى. وسى ارقىلى 6 مىڭعا جۋىق رەسەي اسكەرى قورشاۋدا قالۋ قاۋپىندە تۇر. ال ۋكراينا ولارعا كومەك جەتكىزۋ مۇمكىندىكتەرىن جويۋ ماقساتىندا اسكەري نىسانداردى اتقىلاۋدى جالعاستىرۋدا.

وسى رەتتە كيەۆكە ماگاتە وكىلدەرى كەلدى. رافاەل گروسسي باستاعان توپ زاپاروج اەس-ىنە باراتىن جولدا بىرنەشە مارتە توقتاۋعا ءماجبۇر بولدى. سەبەبى رەسەي اسكەرى اەس-قا باراتىن جولدا اتىس-شابىستى كۇشەيتىپ، "اەس ماڭىنا ۋكراينا دەسانتى ءتۇسىرىلدى، ولار شابۋىل جاساۋدا" دەپ مالىمدەدى. الايدا بۇل اقپاراتتى راستايتىن فوتو-ۆيدەو ۇسىنبادى. 1-قىركۇيەك كۇنى ەنەرگودار قالاسىن اتقىلاپ، ماگاتە ميسسياسىنىڭ ىسكە اسپاۋىنا بارلىق جاعدايدى قاراستىردى.

ۋكراينا اەس-قا ماگاتە وكىلدەرى عانا كىرگەنىن، ۋكراينانىڭ جۋرناليستەرى مەن باتىس تىلشىلەرى كىرە الماعانىن ايتتى. ماگاتە وكىلدەرى اەس-ءتى تەك رەسەي اسكەرى رۇقسات ەتكەن مارشرۋت بويىنشا عانا قارادى. ميسسيا باسشىلىعى قانداي دا ءبىر مالىمدەمە جاساۋدان باس تارتتى، تەك ميسسيانىڭ ماقساتى يادرولىق اپاتتىڭ الدىن الۋ ءۇشىن جاسالىپ وگتىرعانىن ايتتى. اەس-ءتى تولىق تەكسەرۋ ءۇشىن 3-قىركۇەيككە دەيىن توپتىڭ بەس مۇشەسى اەس-تە قالدىرىلدى. ناقتى اقپاراتتاردى ەندىگى اپتادا جاريالاۋ جوسپارلانۋدا. ول بويىنشا بۇۇ-دا ارنايى بايانداما وقىلۋى مۇمكىن.

دونباسس باعىتىندا دا سوعىس پوزيتسيالىق نەگىزگە كوشتى. ۋكراينا اسكەرى ەكى باعىتتا قارسى شابۋىل جاساۋعا تىرىسىپ باعۋدا. ال پۋتين كۇنى كەشە "15 قىركۇيەككە دەيىن دونباسستى تولىق باسىپ الۋعا بۇيرىق بەرگەن" دەيدى تاۋەلسىز اقپارات كوزدەرى. الايدا سوڭعى ۋاقىتتى رەسەي اسكەرىنىڭ شىعىنى ەسەلەپ ارتۋىنا بايلانىستى، ەكى اپتادا دونەتسك وبلىسىن الۋ مۇمكىن ەمەس دەيدى ماماندار. ول ءۇشىن رەسەيدە جاساقتالعان شابۋىلداۋشى قۇرام از، ال كاسىبي اسكەردىڭ باسىم بولىگى جارالانعان، قازا تاپقان. امان قالعاندارىنىڭ اسكەري رۋحى تومەن.

رەسەي اسكەرىنىڭ ۋاقىتشا وككۋپاتسياسىندا تۇرعان ۋكراينانىڭ لۋگانسك، دونەتسك، حاركوۆ، زاپاروجە، حەرسون وبلىستارىنىڭ ءبىر بولىگىندە وقۋشىلار رەسەيلىك باعدارلامامەن وقۋ جىلىن باستادى. وندا "قۇتقارۋشى رەسەي مەن وزبىر ۋكراينا" جايلى دارىستەر وقىلدى.

ال ۇلىبريتانيانىڭ اسكەري ساراپشىسى مايكل كلاركتىڭ پايىمداۋىنشا، ۋكراينا حەرسون قالاسىن سوعىسسىز الۋى مۇمكىن. ول ءۇشىن قالانىڭ قورشاۋدا قالۋ مۇمكىندىگىن ارتتىرۋ كەرەك، سول ساتتە رەسەي اسكەرى وزدىگىنەن شەگىنەدى. بۇل كوپتەگەن بولجامنىڭ ءبىرى عانا، الايدا ىسكە اسۋى مۇمكىن نۇسقا دەيدى ماماندار.

Abai.kz