«جاڭا قازاقستان» دەپۋتاتتار توبى استانانىڭ بۇرىنعى اتاۋىن قايتارۋدى ۇسىندى. مالىمدەمەسى مىنە:

قۇرمەتتى ارىپتەستەر! قادىرلى قاۋىم!

مەملەكەت باسشىسى قاسىم-جومارت كەمەلۇلى توقاەۆ 1 قىركۇيەكتە حالىققا جولداۋىن جاريالاپ، تىڭ باستامالار كوتەردى. سونىڭ ىشىندە، بيىلعى كۇزدە كەزەكتەن تىس پرەزيدەنت سايلاۋىن وتكىزۋ تۋرالى ايتتى.

بۇل ۇسىنىس ساراپشىلار عانا ەمەس، بۇكىل قوعام تاراپىنان قىزۋ پىكىر-تالاس تۋدىرىپ جاتىر. ونى پارلامەنت ماجىلىسىندەگى «جاڭا قازاقستان» دەپۋتاتتىق توبىنىڭ مۇشەلەرى دە تالقىلادى. وسىعان وراي ويىمىزدى ورتاعا سالۋدى ءجون كوردىك.

ءبىرىنشى. بيىل ەلىمىزدە كونستيتۋتسيالىق رەفورما قولعا الىندى. جاڭا، ادىلەتتى قازاقستان قۇرامىز، «ەكىنشى رەسپۋبليكا» مودەلىنە كوشەمىز دەپ جاريالادىق. مەملەكەتتىك جۇيەنى، سونىڭ ىشىندە مەملەكەت باسقارۋ ءىسىن جاڭعىرتۋ قاجەت ەكەنى داۋسىز. ياعني، بۇل – دەموكراتيالىق باسقارۋ مودەلىنە كوشۋگە جول اشاتىن باستاما. سوندىقتان، قايتا سايلانۋ قۇقىعىنسىز 7 جىلدىق ءبىر مەرزىمدى ەنگىزۋ دۇرىس باستاما. ەشكىم پرەزيدەنت بيلىگىن ۇزاق جىلدار بويى يەمدەنبەيدى. بۇل ەلىمىزدىڭ سۋپەرپرەزيدەنتتىك بيلىكتەن تولىق كەتكەنىمىزدى بەكىتە تۇسەدى.

ەكىنشى. قازىر الەمدەگى كەيبىر ەلدەردە مەملەكەت باسشىسىنىڭ وكىلەتتىگىن ۇزارتۋ بويىنشا باستامالار كوتەرىلىپ جاتقان تۇستا، ءبىزدىڭ ەلىمىزدە كەرىسىنشە پرەزيدەنت وكىلەتتىگىن قايتا سايلانۋ قۇقىعىنسىز 7 جىلدىق ءبىر مەرزىممەن شەكتەۋ  – ەلىمىزدىڭ دەموكراتيالىق باعىتتى بەرىك ۇستانعانىن كورسەتەدى.

ۇشىنشىدەن، ەگەر پرەزيدەنت كەزەكتەن تىس سايلاۋدا 5 جىلعا سايلانىپ، سودان سوڭ 7 جىلدىق مەرزىمدى ەنگىزەتىن بولسا، وندا قازىرگى پرەزيدەنتتىڭ ءۇشىنشى مەرزىمگە سايلانۋىنا قۇقىقتىق نەگىزدەر پايدا بولۋى مۇمكىن دەگەن ءارتۇرلى الىپ-قاشپا پىكىر ايتىلۋدا.

سوندىقتان قازىرگى پرەزيدەنت 5 جىلدان كەيىن تاعى دا 7 جىلعا بارۋى مۇمكىن دەگەن كۇماندى سەيىلتۋ ءۇشىن بيىل بىردەن 7 جىلدىق مەرزىمگە سايلانعانى دۇرىس بولار ەدى دەپ ويلايمىز. سوندا اتالعان قۇقىقتىق كولليزيا تۋىندامايدى.

ونىڭ ۇستىنە، مەملەكەت باسشىسى كەزەكتەن تىس سايلاۋ وتكىزبەي، ەكى مەرزىمگە سايلانسا دا، بيىل كەزەكتەن تىس سايلاۋدا 7 جىلعا سايلانسا دا، ونىڭ وكىلەتتىك مەرزىمى 2029 جىلى اياقتالادى. ياعني قازىرگى پرەزيدەنت مەرزىمىنىڭ ۇزاقتىعى وزگەرىسسىز قالادى.

ءتورتىنشى. ءبىز، بۇرىنعى جۇيەنى قالىپتاستىرعان ساياسي كۇشتەردىڭ، ىقپالدى توپ وكىلدەرىنىڭ بيلىككە ۇمتىلىپ وتىرعانىن ۇمىتپاۋىمىز قاجەت. پرەزيدەنتتىڭ قازىر سايلاۋ وتكىزىپ جانە جەتى جىل مەرزىمگە سايلانۋى مەملەكەتىمىزدىڭ قاۋىپسىزدىگى مەن تۇراقتىلىعىن قامتاماسىز ەتۋگە مۇمكىندىك بەرەدى. ول جاڭا ينكليۋزيۆتى ازاماتتىق قوعام قۇرۋعا مۇمكىندىك الادى.

وسى جاعدايلاردىڭ ءبارىن ەسكەرە وتىرىپ، «جاڭا قازاقستان» دەپۋتاتتىق توبى مىناداي مالىمدەمە جاسايدى:

بىرىنشىدەن، ءبىز قازاقستان رەسپۋبليكاسى پرەزيدەنتىن جەتى جىلعا ءبىر مەرزىمگە سايلاۋ باستاماسىن قولدايمىز.

ەكىنشىدەن، كونستيتۋتسياعا وزگەرىستەردى قازىر ەنگىزىپ، پرەزيدەنت سايلاۋىن جاڭا تالاپتارعا سايكەس وسى جىلدىڭ كۇزىندە وتكىزۋ قاجەت دەپ سانايمىز.

جالپى، بۇل مەملەكەتتىك باسقارۋ جۇيەسىن جاڭعىرتىپ، ەلىمىزدى ورنىقتى دامىتۋعا جول اشاتىن ماڭىزدى قادام.

ۇشىنشىدەن، كونستيتۋتسيامىزعا وزگەرىس ەنگىزەتىن بولساق، وندا وسى مۇمكىندىكتى پايدالانا وتىرىپ، اتا زاڭعا تاعى ءبىر اسا ماڭىزدى ماسەلەنى ەنگىزۋ كەرەك. ول – ەلوردانىڭ اتىن قايتا قايتارۋ. ادامنىڭ كوزى تىرىسىندە قالاعا ونىڭ ەسىمىن بەرگەن دۇرىس دەپ ەسەپتەمەيمىز جانە دە قالانىڭ جاڭا اتاۋىن حالىقتا قابىلدامادى.

سوندىقتان تۇڭعىش پرەزيدەنتتىڭ ءوزى ۇسىنعان استانا اتاۋىن قايتا قالپىنا كەلتىرۋ تاريحي ادىلدىك بولار ەدى.

بۇل تۇڭعىش پرەزيدەنتتىڭ باس قالامىزدىڭ قۇرىلىسىن سالدىرۋداعى ەڭبەگىن دە باعالاۋ جانە حالقىمىزدىڭ ۇسىنىس-پىكىرىن دە ەسكەرۋ.

 قادىرلى اعايىن!

قاي زاماندا دا ەل باسىنا كۇن تۋعاندا، حالقىمىز ءبىر باسشىنىڭ اينالاسىنا توپتاسىپ، قيىندىقتاردان دا، سىناقتاردان دا امان-ساۋ شىققان.

قازاقتا «التاۋ الا بولسا اۋىزداعى كەتەدى، تورتەۋ تۇگەل بولسا توبەدەگى كەلەدى» دەگەن جاقسى ءسوز بار. قازىر – ارازداساتىن ۋاقىت ەمەس، بىرىگەتىن ۋاقىت، تالاساتىن ۋاقىت ەمەس، تاتۋلاساتىن ۋاقىت!

سوندىقتان بارشا كوزى اشىق، كوكىرەگى وياۋ ازاماتتارىمىز بىرلەسىپ، وتانىمىزدى الداعى سىناقتاردان ابىرويمەن الىپ شىعايىق!

Abai.kz