دالا ورتىنەن زارداپ كورگەن قوستاناي وبلىسىنىڭ تۇرعىندارىنا اتىراۋلىقتار 30 توننا گۋمانيتارلىق كومەك جىبەردى. وبلىس اكىمى سەرىك شاپكەنوۆتىڭ تاپسىرماسى بويىنشا اتىراۋ قالاسى مەن اۋدانداردا ارنايى شتابتار قۇرىلدى.

شتاب وكىلدەرى بۇگىن تاڭعى ساعات 9:00-دەن باستاپ ازىق-تۇلىك، كيىم-كەشەك، جەكە گيگيەنالىق قۇرالدار مەن توسەك-جابدىق جيناپ، كولىكتەرگە تيەپ جىبەردى، دەپ حابارلايدى وبلىس اكىمىنىڭ ءباسپاسوز قىزمەتى.

قايىرىمدىلىق شاراسىنا تۇرعىندار، اكىمدىك قىزمەتكەرلەرى مەن ءماسليحات دەپۋتاتتارى، جەرگىلىكتى كاسىپكەرلەر مەن ەرىكتىلەر جاساعى جۇمىلا ات سالىسىپ جاتىر.

- قوستاناي وبلىسىنداعى قايعىلى وقيعا كىمنىڭ بولماسىن قابىرعاسىن قايىستىرماي قويمادى. سول ءۇشىن شتابتا جان-جاقتان كومەك جيناپ، ونى جۇك كولىكتەرىنە تيەپ، كەزەڭ-كەزەڭىمەن جىبەرەمىز. مۇنداي قيىن سىناقتان جۇدىرىقتاي جۇمىلىپ، ءبىر ەل بولىپ وتە الامىز. قازىر قوستاناي وبلىسىنداعى «Amanat» پارتياسى فيليالىنىڭ باسشىسىمەن بايلانىستا وتىرمىز. ءبىز كورسەتىپ وتىرعان كومەكتەن بولەك، جاپا شەگۋشىلەرگە تىكەلەي قاراجات جىبەرەم دەۋشىلەرگە بانك شوتى اشىلدى. الداعى ۋاقىتتا بۇل ەسەپشوتتىڭ ءنومىرى قوسىمشا حابارلانادى،-دەدى وبلىستىق «Amanat» پارتياسىنىڭ اتقارۋشى حاتشىسى ابدوللا يدرەسوۆ.

ابدوللا يدرەسوۆتىڭ مالىمەتىنشە، ءبىرىنشى قاجەتتىلىكتەگى زاتتار سالىنعان العاشقى 10 جۇك كولىگى جولعا شىقتى. قالعانى قوستاناي وبلىسىنا جاقىن ۋاقىتتا جونەلتىلەدى.

شتاب قۇرامىندا «جاستار رۋحى» جاستار قاناتىنىڭ مۇشەلەرى دە بەلسەندى ات سالىسىپ وتىر.

- اۋىر حاباردى ەستىگەلى بەرى بارىمىزدى سالىپ، ەرىكتى رەتىندە تاۋارلاردى كولىكتەرگە تيەپ جاتىرمىز. ءبىز قوستانايمەن بىرگەمىز. كومەك كورسەتۋگە دايىنبىز. وسىنداي قايىرىمدىلىق شارالارىنا جاستاردى بەلسەندى ات سالىسۋعا شاقىرامىز،-دەدى ەرىكتى زامانبەك قۇراقباي.

بۇدان بولەك، باسپاناسىنان ايىرىلعان قوستانايلىقتارعا كومەك كورسەتۋ ءۇشىن اتىراۋ وبلىسى بويىنشا ارنايى چات اشىلدى.

- چاتقا قوسىلعان ازاماتتار اقشالاي جانە زاتتاي كومەك كورسەتۋگە دايىن ەكەنىن جازىپ وتىر. ەكى كۇن بويىنا كەرەك-جاراقتىڭ ءبارىن جيناپ، كەيىن جونەلتەمىز دەپ وتىرمىز. قازىردىڭ وزىندە 20-عا جۋىق جۇك كولىگى ساقاداي-ساي تۇر. المالى اۋىلى جانە ماحامبەت اۋدانىنان دا جۇك كولىكتەرى كەلە جاتىر،-دەدى نۇرلان جوناسوۆ.

Abai.kz