Amanat پارتياسى الداعى كەزەكتەن تىس پرەزيدەنتتىك سايلاۋعا قاسىم-جومارت توقاەۆتىڭ كانديداتۋراسىن ۇسىنادى، دەپ حابارلادى ءماجىلىس سپيكەرى جانە پارتيا توراعاسى ەرلان قوشانوۆ.

"مەن سىزدەرگە وسى سايلاۋعا جانە كەلەسى سايلاۋعا ءوز كانديداتۋرامدى ۇسىنبايتىنىمدى رەسمي تۇردە مالىمدەيمىن. بىراق مەن قاسىم-جومارت توقاەۆتىڭ لايىقتى كانديداتۋراسىن قولدايمىن", - دەدى ەرلان قوشانوۆ ءماجىلىس كۋلۋارىندا.

مەملەكەت باسشىسى Amanat-تان شىقتى، بىراق بۇل پارتيانى سايلاۋعا ءوز كانديداتۋراسىن ۇسىنۋ مۇمكىندىگىنەن ايىرمايدى، دەپ ءتۇسىندىردى ءماجىلىس سپيكەرى.

ايتا كەتەيىك، بۇعان دەيىن مەملەكەت باسشىسى قاسىم-جومارت توقاەۆ بيىل كۇزدە كەزەكتەن تىس پرەزيدەنت سايلاۋىن وتكىزۋدى ۇسىنعان بولاتىن.

"مەن بيىلعى كۇزدە كەزەكتەن تىس پرەزيدەنت سايلاۋىن وتكىزۋدى ۇسىنامىن. ادىلەتتى قازاقستاندى قۇرۋ جولىندا تۇبەگەيلى جانە جان-جاقتى رەفورمالاردى تابىستى جۇزەگە اسىرۋ ءۇشىن حالىقتىڭ جاڭا سەنىم مانداتى قاجەت. مەن ءۇشىن مەملەكەت مۇددەسى بارىنەن بيىك. سوندىقتان مەن وكىلەتتىك مەرزىمىمدى قىسقارتۋعا جانە كەزەكتەن تىس پرەزيدەنت سايلاۋىنا بارۋعا دايىنمىن", - دەدى توقاەۆ قازاقستان حالقىنا جولداۋىندا.

سونداي-اق، ول پرەزيدەنت مانداتىن ۇزاقتىعى 7 جىلدىق ءبىر مەرزىممەن شەكتەۋدى ۇسىندى.

"بىراق قايتا سايلانۋعا تىيىم سالىنادى. بۇل باستامانىڭ نەگىزى قانداي؟ اۋقىمدى باعدارلامانى جۇزەگە اسىرۋ ءۇشىن جەتكىلىكتى كەزەڭ. ەكىنشى جاعىنان پرەزيدەنت مانداتىن ءبىر مەرزىممەن شەكتەۋ مەملەكەت باسشىسىنىڭ، جالپى ۇلتتىق دامۋدىڭ ستراتەگيالىق مىندەتتەرىن شەشۋگە بارىنشا جۇمىلۋىن قامتاماسىز ەتەدى", – دەدى توقاەۆ.

Abai.kz