ۇلىبريتانيا قارا جامىلدى. تاقتا 70 جىلعا جۋىق مەرزىم وتىرعان ەليزاۆەتا ءىى 96 جاسىندا ومىردەن ءوتتى. 

ەليزاۆەتا الەكساندرا مەري ۆيندزور 1926 جىلى 21 ساۋىردە ومىرگە كەلدى. ەليزاۆەتا پاتشا گەورگ V-ءتىڭ اقىلىمەن ءوستى. ول جاۋاپكەرشىلىك سەزىمىن بارلىعىنان جوعارى قوياتىن. بۇل تۋرالى اتاقتى ۋينستون چەرچيلل دە ءوز جازبالارىندا كەلتىرەدى. پاتشايىم ەل قاتارلى مەكتەپكە بارعان جوق، ءبىلىمدى ارنايى ۇستازداردان الدى. ۇلىبريتانيا تاريحى مەن الەم تىلدەرىن، قۇقىقتى ۇيرەندى. ءوزىن قوعامنان تىسقارى سەزىنبەۋى ءۇشىن، وعان ارناپ ارنايى قىزدار وتريادى قۇرىلدى.

پاتشا گەورگ V ومىردەن وتكەن ساتتە، تاققا ونىڭ ۇلى دەۆيد وتىرادى. ول ءوزىن ەدۋارد VIII دەپ جاريالادى. الايدا ەدۋارد VIII تاقتا ۇزاق وتىرمادى. سەبەبى ول ەكى مارتە اجىراسقان جانە ءدىنى بولەك  ۋولليس سيمپسونعا عاشىق بولدى. ساياسي سالادا ۋولليس پاتشايىم ستاتۋسىنا جارامايتىن. وسىعان بايلانىستى 1936 جىلى ەدۋارد VIII تاقتان باس تارتتى.

تاققا ەليزاۆەتانىڭ اكەسى وتىردى. اكەسى پاتشا بولعىسى كەلمەسە دە، وتىرۋعا ءماجبۇر ەدى. بۇل ەليزاۆەتانى ءسوزسىز جارقىن بولاشاق كۇتىپ تۇرعانىن اڭعارتتى. ەليزاۆەتانىڭ اكەسى گەورگ ءVى تاققا وتىرعان ساتتە ەۋروپانى سوعىس ەلەسى كەزىپ ءجۇردى. گەرمانيا، يتاليا جانە باسقا دا ەلدەر سوعىسقا دايىندالىپ جاتتى. الەم انە-مىنە الاپات سوعىس وتى تۇتاناتىنىن سەزدى، ءبىلدى. پاتشا وتباسى ۇلىبريتانيانى ارالاپ، مونارحيانىڭ ماڭىزدى ەكەنىن، قيىن ساتتە حالىق بىرىگۋى تيىستىگىن ناسيحاتتادى.

1939 جىلى 13 جاستاعى ەليزاۆەتا گرەك حانزاداسى فيليپپەن ءبىر جيىندا تانىسادى.سوعىستا فلوتتا بورىشىن وتەگەن فيليپپ 1944 جىلى ۇلىبريتانياعا كەلەدا جانە ەليزاۆەتامەن كەزدەسەدى. ول كەزدە ەليزاۆەتانىڭ جاسى 18-دە بولاتىن. ەليزاۆەتا فيليپپكە عاشىق ەكەنىن جاسىرماستان ءوز بولمەسىنە ونىڭ سۋرەتىن ءىلىپ قوياعان ەدى جانە ءوزارا حات الماسىپ ءجۇردى.

سوعىستان كەيىن فيليپپ كەن ەليزاۆەتا وتباسىن قۇردى. حانزادا فيليپپ ەدينبۋرگ گەرتسوگى اتاعىن الدى. ول اسكەري فلوتتاعى قىزمەتىن جالعاستىرا بەردى، سوندىقتان مالتاعا اسكەري تاپسىرمامەن جونەلتىلدى. 1948 جىلى فيليپپ پەن ەليزاۆەتانىڭ ۇلى چارلز ومىرگە كەلدى، ال 1950 جىلى اننا دۇنيە ەسىگىن اشتى.

1952 جىلى ەليزاۆەتانىڭ اكەسى ومىردەن ءوتتى. بۇل ساتتە ەليزاۆەتا كەنيادا بولاتىن. ول لوندونعا پاتشايىم رەتىندە ورالدى. ەليزاۆەتا 1953 جىلى تاققا وتىردى. ول بيلىگىن باستاعان ءسات ۇلىبريتانيا ءۇشىن قيىن كەزەڭ بولاتىن. سوعىستان كەيىن ۇلىبريتانيا ەكونوميكاسى ءالى ەسىن جيمادى، ال الەمنىڭ ءار جەرىندەگى وتار ەلدەر ءوز تاۋەلسىزدىگىن الىپ جاتتى. سونىڭ ءبىرى ءۇندىستان بولاتىن. ءۇندىستان ۇلىبريتانيا ەكونوميكاسىندا ەلەۋلى ءرول وينايتىن.

1956 جىلى سۋەتس كانالىندا داعدارىس باستالدى. ۇلىبريتانيا كانالدى ساقتاپ قالۋ ءۇشىن اسكەر جىبەردى، الايدا بريتان اسكەرى بۇۇ كۇشتەرى كەلگەن سوڭ، سۋەتس ماڭىنان شىعارىلدى. بۇل ۇلىبريتانيانىڭ دەرجاۆا رەتىندە ستاتۋسىنا سوققى جاسادى.

سوعان قاراماستان پاتشايىم سىرتقى ساياساتتا ساۋاتتى قادامدار جاساۋعا تىرىستى. ول افريكا ەلدەرىمەن تىعىز قاتىناس ۇستاپ، وار ورناعان اپارتەيد ساياساتىنا قارسى بولدى. 90-جىلدارى پاتشا اۋلەتىندە كوپتەگەن كەلەڭسىز وقيعالار بولدى. اجىراسۋ مەن ۇرىس-كەرىس باق بەتتەرىنە كوپتەپ جاريالاندى. 1997 جىلى ديانا حانشايىم كولىك اپاتىندا كوز جۇمدى. بۇل ساتتە ەليزاۆەتا ەكى حانزادانىڭ تاربيەسىن ءوز موينىنا الدى. 2011 جىلى ەليزاۆەتا يرلاندياعا بارىپ، ءوز باياندامىسىن يرلان تىلىندە باستادى. بۇل ەكى جاۋلاسۋشى تاراپتى دوستاستىرۋ ماقساتىندا جاسالعان قادام ەدى.

2014 جىلى شوتلانديا رەفەرەندۋم وتكىزدى. بۇل پاتشايىم ءۇشىن ۇلكەن سىناق بولدى. سەبەبى ول بىرىككەن پاتشالىقتى ساقتاۋعا انت ەتكەن بولاتىن. بىراق رەفەرەندۋم شوتلانديا قالاعان ناتيجەمەن اياقتالمادى.

2021 جىلى ەليزاۆەتانىڭ جۇبايى فيليپپ ومىردەن ءوتتى. بۇل وعان اۋىر سوققى بولدى دەيدى جاقىندارى. ال اراعا ءبىر جىل سالىپ، 2022 جىلى 8-قىركۇيەكتە ەليزاۆەتانىڭ ءوزى دە بۇل جالعاننان كەتتى. تاققا ونىڭ ۇلى چارلز وتىرماق، ونىڭ جاسى 74-تە. تاققا وتىرعان ساتتە چارلز پاتشا كارل ءىىى اتىن يەمدەنەتىن بولادى.

Abai.kz