ەلىمىزدە 200-دەن استام اۋىلدىق ەلدى مەكەندە مەديتسينالىق نىسان جوق. بۇل تۋرالى قر دەنساۋلىق ساقتاۋ ءمينيسترى اجار عينيات ايتتى، دەپ حابارلايدى قازاقپارات ءتىلشىسى.

«پرەزيدەنت ءوزىنىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى جولداۋىندا اۋىل حالقىنىڭ مەديتسينالىق كومەككە سۇرانىسىن قامتاماسىز ەتۋگە باعىتتالعان ۇلتتىق جوبانى ىسكە اسىرۋ قاجەتتىگىن ايتتى. «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسىن ىسكە اسىرۋ ەكى جىل ىشىندە بارلىق اۋىلدى جانە 650 ەلدى مەكەندى مەديتسينالىق ينفراقۇرىلىممەن قامتاماسىز ەتۋگە مۇمكىندىك بەرەدى. سونداي-اق 32 كوپبەيىندى اۋداندىق اۋرۋحانا ۇيىمداستىرىلادى. وسىنداي ءىس-شارالاردى جۇزەگە اسىرۋ بۇگىنگى كۇنى وتە وزەكتى جانە ۋاقىتى كەلدى»، - دەدى مينيستر ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا.

اجار عينياتتىڭ دەرەگىنشە، قازىرگى تاڭدا اۋىلدا رەسپۋبليكا حالقىنىڭ 41 پايىزى نەمەسە 7 ملن 768 مىڭ ادام تۇرادى.

ولارعا مەديتسينالىق كومەك كورسەتۋ ءۇشىن 5 مىڭنان استام مەديتسينالىق ۇيىمدار قىزمەت ەتەدى.

ونىڭ ىشىندە 2 مىڭنان استام - مەديتسينالىق پۋنكت، 790 - فەلدشەرلىك-اكۋشەرلىك پۋنكت، ءبىر مىڭنان استام – دارىگەرلىك امبۋلاتوريا، 227 – ەمحانا، 203 اۋرۋحانا بار.

ەلدى مەكەندەردە 67 مىڭنان استام مەديتسينا قىزمەتكەرى، ونىڭ ىشىندە 13 مىڭنان استام دارىگەر، 54 مىڭ ورتا مەديتسينا قىزمەتكەرى قىزمەت اتقارادى.

«اۋىلدىق دەنساۋلىق ساقتاۋ دەڭگەيىندە پروبلەمالىق ماسەلەلەر بار. 200-دەن استام اۋىلدىق ەلدى مەكەندە مەديتسينالىق نىسان جوق. بۇل - وزەكتى ماسەلە. بۇدان باسقا، اۋىلداردا العاشقى مەديتسينالىق-سانيتارلىق كومەك ۇيىمدارىنىڭ مەديتسينالىق ينفراقۇرىلىمىنىڭ 50 پايىزدان استامى توزعان»، - دەدى ول.

Abai.kz