كەي ازاماتتار جەكەمە شىعىپ، ال نومەرىمدى بىلەتىندەر ۆاتساپ ارقىلى «بۋلات ابيلوۆقا قاتىستى سوت نە بولدى» - دەپ سۇراۋدا. بۇعان، وسى كەزگە دەيىن سەريالى تۇردە پوستتار جاريالاپ كەلە جاتىپ، كىلت ءۇزىپ تاستاعانىم دا اسەر ەتسە كەرەك. وعان سەبەپ – پرەزيدەنت ءوز جولداۋىندا بيىل مەرزىمىنەن بۇرىن سايلاۋ بولاتىنىن ايتىپ، بارلىعىنىڭ نازارى سول جاققا اۋىپ كەتكەسىن، قۇيىسقانعا قىستىرىلعانداي بولمايىن دەپ ويلاعام. سويتسەم ابيلوۆ تاقىرىبى كوپشىلىككە ءالى قىزىق ەكەن.

سوندىقتان، كوپ سوزباي قىسقا-نۇسقا، ەشقانداي ەموتسياسىز، مەيلىنشە تولىق اقپارات بەرە كەتەيىندە، دوعارايىن.

سونىمەن، مەن نە ءۇشىن سوتقا جۇگىنۋگە ءماجبۇر بولدىم؟ نازارلارىڭىزعا ەكى ۆيدەودان ءۇزىندى ۇسىنامىن. بىرىنشىسىندە ابيلوۆ ينتەرۆيۋ بەرىپ وتىرىپ، مەنى جانە امانات كوميسسياسىن كورىنەۋ قارالايدى، ياعني جالا جابادى.
اۋەلى، جۇرگىزۋشىنىڭ سۇراعىنا وراي «ابزال قۇسپان جانە ايمان ۋماروۆا بيلىكتىڭ، ۇكىمەتتىڭ قىزىل ادۆوكاتتارى» - دەپ الادى دا، وعان دالەل رەتىندە مىنا سوزدەردى ايتادى (سوزبە-ءسوز);

«ونىڭ ايتقان ءسوزى، كامەراعا ايتقان ءسوزى، قوسايدىڭ ول اۋرۋحانادا جاتقاندا، اۋرۋحاناعا پوليتسيا كەلىپ، ولاردى تۇرمەگە الىپ كەلدى، اناۋ جەرگە تاستاپ ۇردى، سوقتى، پىتكانى جاسادى دا، سول قاڭتار ايىندا دالا سۋىق قوي، تەرەزە سىندىرعان اشىق، 15 ادام، كامەرا 5 ادامعا، جەردە جاتىر. سول كۇندە (!) ەسىك اشىلىپ ادۆوكات تۇر – ابزال قۇسپان. مەن سونداي اداممىن، مىنە پروكۋرور قاسىمدا، پوليتسيا قاسىمدا قانداي جالوبا. ءبىز ءبارىن ايتتىق، بەتىنە ايتتىق، ابزالدىڭ بەتىنە. ول جازدى بىردەڭە، ەسىك جابىلدى، ءبىتتى! ەشتەمە وزگەرگەن جوق! پىتكا، جەردە جاتىر، تاماق بەرمەيدى، سۋ بەرمەيدى. ءمىنى بۇل نە؟».
​ مىنا سوزدەردى تىڭداعان ادام ءبىزدى، ياعني كوميسسيانى ادامداردى ۇرىپ جاتقان ساتتە كامەراعا كەلىپ، ەشقانداي كومەك كورسەتپەستەن كەتىپ قالدى جانە ءبىز كەتكەننەن كەيىندە ازاپتاۋ جالعاسقان دەپ تۋرا تۇسىنەدى، سولاي عوي؟
​
ال ەندى، ەكىنشى ۆيدەودا سول ابيلوۆ سىلتەمە جاساعان «قاڭتار» قورىنىڭ ۇيىمداستىرعان پرەسس-كونفەرەنتسياسىندا قوساي ماحانباەۆتىڭ ايتقانى، وعان سايكەس; ۇرىپ سوعۋ 8 قاڭتاردا ورىن العان، 3 كۇن بويى، ياعني 11 قاڭتارعا دەيىن اس-سۋ بەرمەگەن، 15 قاڭتارعا دەيىن سالقىن جەردە جاتقان، ال مەن باستاعان كوميسسيا 25 قاڭتاردا كىرگەنبىز. سول كەزدە ول وسى جاعدايدىڭ ءبارىن بىزگە ايتقان.

​ بىراق، كوپشىلىككە تاراتقان اقپاراتىندا بۋلات ابيلوۆ ءبىزدى تەك قانا «بيلىكتىڭ ادامى»، «قىزىل ادۆوكات» دەپ ايتقانى ءۇشىن سوتقا بەردى دەپ كورسەتتى. شىندىعىندا سوتقا جۇگىنۋىمىزدىڭ ەڭ نەگىزگى سەبەبى قوساي ايتتى دەپ ءبىزدى ەل الدىندا قارالاۋى بولاتىن جانە ول تەك مەنىڭ ەمەس، بۇكىل كوميسسيامىزعا جابىلعان جالا ەدى.

​ وتكەن اپتادا الماتى قالالىق سوتىندا ابيلوۆتىڭ سوت قاۋلىسىنا شاعىمى قارالدى. ەڭ قىزىعى، بوكەڭ ءوز سوزدەرىنىڭ دالەلى رەتىندە وسى مەن جالعاعان قوسايدىڭ ۆيدەوسىن جالعاپتى!

​ ءبىز ءوز كەزەگىمىزدە قوساي ماحانباەۆتىڭ ايتقاندارىن تولىق راستايمىز، ول تۋرالى ءبىرىنشى ساتىداعى سوتتا دا، كەشەگى اپەللياتسيالىق القاعا دا ايتتىق. جانە قوسايدىڭ مالىمدەمەسىنەن كەيىن، اراعا 5 كۇن سالىپ، قر باس پروكۋرورىنا قورلاۋ فاكتىلەرى بويىنشا حاتتا جولدادىق. قورلاۋ فاكتىلەرى تۋرالى حاتىمىزدا ءبىرىنشى بولىپ سول قوسايدىڭ ايتقاندارىنا سىلتەمە جاسادىق. باس پروكۋرور تاراپىنان قورلاۋ فاكتىسىمەن قىلمىستىق ءىس قوزعالعانى تۋرالى جاۋاپ كەلدى. وسىنىڭ ءبارى سوتقا ءبىزدىڭ تاراپىمىزدان دالەل رەتىندە ۇسىنىلدى. ناتيجەسىندە، اكىمشىلىك سوت شەشىمى وزگەرىسسىز قالدىرىلدى، شەشىم كۇشىنە ەندى.

​ بىراق، بۋلات ابيلوۆ وسىنىڭ ءبارىن كورە-بىلە تۇرا، ءوز سوزىنەن باس تارتپايتىنىن ايتىپ، ءبىزدىڭ كوميسسيانىڭ ءدال سول تۇتقىنداردى ۇرىپ-سوعىپ، قورلاپ جاتقان ءساتىن دالەلدەيمىن دەپ تابانداپ تۇرىپ الدى. دالەل ۇسىنا الماي سوت تاراپىنان ايىپپۇل سالىنسا «بيلىك وپپوزيتسياعا قىسىم جاساۋدا» -دەپ ويبايلايدى. ەگەر ول «قوسايدىڭ ايتقاندارىن قاتە ءتۇسىنىپپىن» - دەپ، ءوز ايتقانىنان باس تارتسا ەشتەڭە دە بولماس ەدى. ءتىپتى بىزگە ونىڭ كەشىرىم سۇراعانى دا ماڭىزدى ەمەس ەدى، دانەش بايبولاتوۆپەن قالاي كەلىسسەم، ونىمەن دە سولاي كەلىسە سالاتىن شارۋا بولاتىن.
قىسقاشا وسى.

ابزال قۇسپان

Abai.kz