رەيستەردى كەشىكتىرگەن، جولاۋشىلاردىڭ قۇقىقتارىن بۇزعان اۆياتاسىمالداۋشىلار جاۋاپكەرشىلىككە تارتىلدى. بۇل تۋرالى ازاماتتىق اۆياتسيا كوميتەتى ءباسپاسوز قىزمەتى حابارلادى.

6 قىركۇيەكتە  «Air Astana” اۋە كومپانياسىنا رەيستى كەشىكتىرۋ كەزىندە جولاۋشىلار قۇقىعىن بۇزعانى ءۇشىن 1 000 اەك (3 063 000 تەڭگە) كولەمىندە ايىپپۇل سالىندى.

16 شىلدەدە «Air Astana” اۋە كومپانياسىنىڭ الماتى – نۇر-سۇلتان باعىتى بويىنشا كس-853 رەيسى رەزەرۆتىك ۇشۋ ەكيپاجىن كۇتۋ سەبەبىنەن 27 ساعات 21 مينۋتقا كەشىكتىرىلدى. رەيس كەشىككەن ۋاقىتتا اۋە كومپانياسى جولاۋشىلاردى قوناق ۇيمەن قامتاماسىز ەتپەگەن.

شىلدە ايىنان باستاپ "«Air Astana” " اۋە كومپانياسىنا (قۇرىلىمدىق بولىمشەسى Fly Arystan اۋە كومپانياسى بولىپ تابىلادى) 7 000 اەك (21 441 000 تەڭگە) سوماسىنا 7 رەت ايىپپۇل سالىندى.

وسى ۋاقىتتا قازاقستاندىق اۋە كومپانيالار 8 000 اەك (24 504 000 تەڭگە) سوماسىنا 8 رەت اكىمشىلىك جاۋاپكەرشىلىككە تارتىلعان.

Abai.kz