رەداكتسيادان: ءبىر سالانىڭ پۇشپاعىن يلەپ جۇرگەن سوڭ جۋىردا «كتك» تەلەارناسىنىڭ ءجۋرناليسى دينا تولەپبەرگەن  «جىلدىڭ ەڭ ۇزدىك تەلەجۇرگىزۋشىسى» اتانعاندا ەلەڭ ەتە قالعانىمىز راس.  ەلىمىزدەگى جۇزدەگەن تەلەجۇرگىزۋشىلەر اراسىنان قارا ءۇزىپ شىعىپ، مۇنداي اتاققا قول جەتكىزۋ استە وڭاي بولماسا كەرەك. ونىڭ كاسىبي بىلىكتىلىگى مەن تەلەارناداعى ەڭبەگىنە شاك كەلتىرۋدەن اۋلاقپىز. دەگەنمەن دينانىڭ «استارلى اقيقات» باعدارلاماسى توڭىرەگىندە سوڭعى كەزدە قوعامدا ءار الۋان پىكىرلەر ايتىلىپ جۇرگەنىن جوققا شىعارۋعا بولماس. ونىڭ ءبىر پاراسىن «جاڭالىقتار ەمەس، قىلمىس حرونيكاسى» دەگەن تاقىرىپپەن گازەتىمىزدىڭ 21 جەلتوقسان كۇنگى نومىرىندە دە جاريالاعانبىز. بىراق كەيدە ارتىق قىلام دەپ تىرتىق قىلىپ الىپ جاتاتىن تەلەجۇرگىزۋشىنىڭ كەم-كەتىك، ولقى تۇستارىن سىرتىنان سىپىرا جامانداعانشا، ءوز اۋزىنان ەستيىك دەگەن نيەتپەن وزىنە حابارلاسىپ، ەل ىشىندەگى الىپ-قاشپا اڭگىمەنىڭ اپتىعىن باسۋ ءۇشىن بىرنەشە ساۋالدار جولداعان ەدىك. ادەتتە «استارلى اقيقاتتى» انىقتاۋ ءۇشىن وزگەلەردى ءتۇرلى ساۋالدارمەن تومپەشتەپ،  تىعىرىققا تىرەپ ۇيرەنگەن دينا حانىم بۇل جولى ءبىزدىڭ وتكىرلەۋ ساۋالدارىمىزعا جاۋاپ بەرىپ جاتۋدى نامىس كوردى مە، «تەلەارنانىڭ ساياساتىنا قايشى كەلەتىن جانە ونىڭ بەدەل-ابىرويىنا نۇقسان كەلتىرەتىن ساۋالدارعا جاۋاپ بەرمەيمىن»، - دەپ ءۇزىلدى-كەسىلدى باس تارتتى. دينانىڭ ءوز مانەرىندە قويۋعا تىرىسقان سۇراقتارىمىز شىمبايىنا باتىڭقىراپ كەتكەنىن ازداپ ءىشىمىز سەزەدى. بىراق ۇنەمى «اقيقاتتى» بەتكە ءتىلىپ ايتاتىن جۋرناليست بۇل جولى دا سونداي ىرىلىك تانىتار دەپ ويلاعانبىز. «تەلەارنانىڭ ساياساتى مەن بەدەل-ابىرويىنا نۇقسان كەلتىرەدى» دەپ تاپقان (ال سۇراقتاردىڭ ىشىندە تەلەارنا تۋرالى ءلام-ميم ءسوز جوق) تەلەجۇرگىزۋشىنىڭ وڭ جامباسىنا كەلمەي، جاۋاپسىز قالعان ساۋالدارىمىزدىڭ سىڭايى تومەندەگىدەي. «جەتىم» ساۋالدارعا ۇنسىزدىكتىڭ ءوزى جاۋاپ بەرىپ تۇرعانداي...

1. دينا، ەڭ الدىمەن «جىلدىڭ ەڭ ۇزدىك تەلەجۇرگىزۋشىسى» اتانۋىڭىزبەن قۇتتىقتايمىز! ەڭبەگىڭىزدىڭ ەلەنگەنى جۇمىسقا دەگەن قۇلشىنىسىڭىزدى ارتتىرىپ جاتقان بولار...  بۇعان دەيىن قانداي ماقتاۋ-ماراپاتتارعا قول جەتكىزىپ ەدىڭىز؟! الدە بۇل سىيلىعىڭىزدىڭ باسى ما؟

2. «استارلى اقيقاتتا» جانتۇرشىگەرلىك وقيعالاردى قورىقپاي باياندايسىز. جۇرتشىلىق ءسىزدى باتىل جۋرناليست سانايدى. بىراق سىزگە سىن ايتۋشىلار دا بار. عالامتورداعى ءتۇرلى پىكىرلەردى وسىعان دەيىن اڭعارعان شىعارسىز.  بىرەۋلەر ءسىزدى: «باعدارلامانى جۇلقىنىپ وتىرىپ جۇرگىزەدى، كەيدە ءتىپتى ىڭعايسىز تاقىرىپتاردى قوزعاپ، ەتيكادان اتتاپ كەتەدى»، - دەيدى. بىرەۋلەر: «بەتپاق»، - دەيدى (كەشىرىڭىز ارينە), ەندى بىرەۋلەر: «مەن-مەن دەپ تەپسىنگەن بىرەۋ»، - دەيدى. قويشى ايتەۋىر، ءسىز تۋرالى الا-قۇلا پىكىر كوپ. وسىنداي پىكىرلەردى قالاي قابىلدايسىز؟

3. مۇنداي اڭگىمەلەر «ساز الەمى»، «مامما ميا» سىندى جوبالارعا ساراپشى بولعانىڭىزدان دا ايتىلسا كەرەك. ويتكەن، قاراپايىم كورەرمەن رەتىندە ءبىزدىڭ دە: «ديناعا وسى نە ۇنايدى ەكەن؟» - دەپ اڭىرىپ قالاتىنىمىز بار. جۇرتتىڭ بارىنە ۇناعان دۇنيە سىزگە ۇناماي جاتادى نەمەسە كەرىسىنشە. كەيدە ءتىپتى بەلدەن تومەندى دە ءسوز ەتىپ كەتەسىز. ءبىر قاراساڭ، ۇلتتىق ناقىشتاعى دۇنيەلەر سىزگە ۇنامايتىنداي كورىنىپ، جاڭارۋدىڭ، زاماناۋيلىقتىڭ جاعىندا بولىپ وتىراسىز. ەندى بىردە باسقاشا. سوندايدا ءسىزدى تۇسىنبەي كەتەمىز. ساراپشى بولعانىڭىزدا ادىلدىكتى ايتۋدى ەمەس، «نە ايتسام مەنىڭ پىكىرىم وزگەلەردىكىنەن ەرەكشە بولادى» دەگەندەي ەرەكشەلەنۋدى ويلاپ وتىراتىن سياقتىسىز. الدە مەن قاتەلەسىپ تۇرمىن با؟! كەيدە ءسىزدىڭ ەسىمىڭىز اتالعاندا «اتىڭ شىقپاسا جەر ورتە دەگەننىڭ كەرى عوي» دەگەن سوزدەر دە ايتىلىپ قالادى. نەلىكتەن دەپ ويلايسىز؟

4. «استارلى اقيقاتتا» حالىق ءومىرى بوياماسىز بەرىلىپ، قيۋىن تاپپاعان ماسەلەلەر سىزدەردىڭ ارالاسۋلارىڭىزبەن شەشىلىپ جاتادى. بىراق باعدارلاماڭىزعا بىرنەشە سىن دا ايتىلدى. «پرايم-تايمدا قان-جىن، ءمايىت، ۇرىپ-سوعىپ، زورلاپ كەتۋ سىندى جانتۇرشىگەرلىك وقيعالاردى بەرەدى» دەگەن سىن ايتىلا-ايتىلا جاۋىر بولدى، ماسەلەن. «جالاڭاش دەنە مەن ەروتيكالىق سيپاتتاعى كورىنىستەردى كورسەتەدى»، - دەپ تە سىنالدىڭىزدار. بۇگىنگى بولمىس سونداي دەلىك، جارايدى. جۋىردا ءبىر حابارىڭىزدا پاروديست ولجاس سىدىقبەك تۋرالى سيۋجەتتە قىز بەن جىگىتتىڭ جاقىنداسۋىن بەينەلەگەن انايى كورىنىس بەردىڭىزدەر. ولجاس پەن سيۋجەت كەيىپكەرىنىڭ توسەكتە قالاي جاقىنداسقانىن ىڭعايسىز ۆيدەو ارقىلى كورسەتپەسە دە تۇسىنىكتى عوي.  وسىنداي وسپادارلىقتىڭ قاجەتى قانشا ەدى؟

5. مۇنداي ساۋالدار قويىلعاندا ءسىز ۇنەمى: «كەشىرىڭىزدەر، قوعام سونداي بولسا، ونى جاسىرۋدىڭ قاجەتى قانشا؟»، - دەپ جاتاسىز... بىراق قازاقى مەنتاليتەتىمىز بار، ايتاتىن-ايتپايتىن، كورسەتەتىن-كورسەتپەيتىن دۇنيەلەر بار دەگەندەي.  ورىسشاعا جۇيرىكسىز. سۇرايىن دەگەنىم، قازاقتىلدى ورتادا كوبىرەك بولاسىز با، الدە ءورىستىلدى ورتادا ما؟ «ويباي» - دەپ شورشىپ-شوشيتىن دۇنيەلەردىڭ ءسىز ءۇشىن جاي اشەيىن دۇنيە بولىپ كورىنۋى ورىسقولدى ەكەنىڭىزدەن ەمەس پە؟

6. تەلەارناعا كەزىندە قاتاڭ تالاپپەن قابىلدايتىن، قازىر ەكىنىڭ ءبىرى ەفيردە جۇرگىزۋشى بولىپ ءجۇر. مۇنى وسى سالانىڭ كاسىبي ماماندارى دا ءجيى ايتادى. سونىڭ ىشىندە ءسىزدىڭ دە ەسىمىڭىز اتالىپ جاتادى، مىسالى،  «سويلەم قۇراۋى دۇرىس ەمەس، ۇندەستىك زاڭىن ساقتامايدى» دەگەن سىن سىزگە ءجيى ايتىلادى. ءارى كالكانىڭ الدىندا دارمەنسىزدىك تانىتىپ، ەفيردەن «ۇستىمىزدەگى جىلى»، «اعىمداعى جىلى» دەپ سويلەيسىز. «بۇقپاسىز بولمىس»، بوياماسىز شىندىق» دەپ سويلەيسىز، قازاق «بۇقپاسىز» دەپ ەمەس، «بۇكپەسىز» دەپ سويلەۋشى ەدى؟!  «قايشىكەس كوزقاراس»  دەيسىز تاعى. «قايشىلاس»، «قايشىلىقتى» كوزقاراس دەسەڭىز ءبىرسارى...

7. جوق جەردەن كەمشىلىك ىزدەپ، جىپكە ءتىزدى دەمەسسىز. بىراق بۇرىندارى بەرگەن سۇحباتتارىڭىزدا وسىنداي ءبىردى-ەكىلى سىن ايتىلعاندا: «مەنى سىناپ، ءتىپتى ەفيردەن الىپ تاستاۋدى تالاپ ەتىپ جاتقان كىسىلەرگە وكپەلەمەيمىن. كورەالماۋشىلىق، قىزعانىش - بۇل  وسال ادامنىڭ قاسيەتى»، - دەپسىز. كورە المادى دەيتىندەي، ءسىز ءوزىڭىزدى بولىپ-تولعان، ءوز سالاڭىزدىڭ اككى مامانى نەمەسە تەلەەكراننىڭ «جۇلدىزى» سانايسىز با؟

8. الدىندا الدەكىمدەردىڭ ءسىزدى سوتقا بەرىپ،  10 ملن. تەڭگە وتەماقى تالاپ ەتكەنىن الەۋمەتتىك جەلىلەردىڭ بىرىنەن كوزىمىز شالىپ قالعان. سول ءىستىڭ سوڭى نە بولدى؟ اقيقاتتى ايتقانىڭىز ءۇشىن ۇستىڭىزدەن ارىز جازاتىندار، قورقىتىپ-ۇركىتەتىن وقيعالار ءجيى بولىپ تۇرا ما سوندا؟ (وسى جەردە كەڭىرەك توقتالساڭىز بولار ەدى باسىڭىزدا كەزدەسكەن جاعدايلارعا)

9. جۇمىس بارىسىندا جاندى تۇرشىكتىرىپ، جاعا ۇستاتاتىن جاعدايلاردىڭ ورتاسىندا جۇرەسىز. نەكروفيل، پەدوفيل، گوموسەكسۋاليستەردىڭ، قاڭعىباستار مەن كەيبىر ەكىجۇزدى «جۇلدىزداردىڭ» وقيعالارىنا ەتىڭىز ۇيرەنىپ كەتكەن شىعار... نەگاتيۆتى اقپاراتتان شارشايتىن كەزىڭىز بولا ما؟ وندايدا كوڭىلىڭىزدى نەگە بۇراسىز؟

10. ەفيردەن حالىق ۇنەمى ءوز-وزىنە سەنىمدى، اقيقاتقا كەلگەندە كىمنىڭ دە بولسىن اپشىسىن قۋىراتىن دينانى كورەدى. ال ومىردەگى دينا قانداي؟ اسىرەسە جارىڭىزدىڭ الدىندا... (وتباسىڭىز تۋرالى ايتا كەتسەڭىز)

11. «استارلى اقيقات» باي-ماناپتاردىڭ ۇلكەن-ۇلكەن باسقوسۋلارىنا، باستاڭعىلارىنا بارادى. كىلەڭ سانقوي حانىمدار مەن قالتالى ازاماتتار كەلەتىن ءسان اپتالىقتارىندا جۇرەدى. شىنىڭىزدى ايتىڭىزشى، «كتك»-دان العان جالاقىڭىز وسىنداي سالتاناتتى كەشتەرگە كيىپ باراتىن ءساندى كويلەگىڭىز بەن قىمبات اشەكەيىڭىزگە جەتە مە؟

قارلىعا يبراگيموۆا

«حالىق ءسوزى» گازەتى