قوستانايداعى الاپات ءورت پەن ونىڭ اۋىر زارداپتارى جايلى قۇلاعدار بولماعان ادام جوق شىعار. مۇنى ەستىگەن قالىڭ جۇرتشىلىق تا ودان سىرت قالعان جوق. ءبارى دە تايلى-تاياعى قالماي قولدان كەلگەن كومەكتەرىن بەرىپ جاتىر. بىرەۋلەر اقشالاي، بىرەۋلەر كيىم-كەشەكپەن، ال بىرەۋلەر ازىق-تۇلىكپەن دەگەندەي.

وسى ورايدا، قالتالى ازاماتتاردىڭ ىشىندە بولات وتەمۇراتوۆتىڭ قايىرىمدىلىق قورىنىڭ يگى ءىسىن ەرەكشە اتاپ وتكىم كەلەدى. ول ءوز قورىنان وبلىسىمىزداعى سول ورتتەن ايرىقشا ازاپ شەككەن اۋليكول جۇرتىنا اناۋ-مىناۋ ەمەس 1 ميلليارد 100 ميلليون تەڭگە اۋدارعان. ونىڭ ۇستىنە ۇيلەرى ورتەنىپ كەتكەن ءار وتباسىنا 1 ميلليون تەڭگە كومەك بەرگەن. سونىمەن قاتار مۇندا تاعى دا ينسۋلت ورتالىعىن سالماق. ايتپاقشى، وسى ازامات ءار وبلىستا «انالار ءۇيىن» اشىپ، سولاردى ءوز قارجىسىمەن ۇستاپ تۇر. مۇنىڭ ءوزى وتباسىندا زورلىق-زومبىلىق كورگەن ايەلدەردىڭ از ۋاقىت بولسا دا پانالايتىن ورنى بولىپ تۇر. بۇل ساۋاپ ەمەس دەپ كىم ايتار؟

ال ەندى حالىقتىڭ بايلىعىن ءارتۇرلى قۋلىق-سۇمدىقپەن قالتاعا باسقاندار، سول مول دۇنيەسىنىڭ ءبىر شاعىن عانا بولىگىن قاراشانىڭ باسىنا كۇن تۋعاندا وسىلايشا بولىسسە، ەڭ بولماسا حالىقتىڭ قارعىسىنا دا قالماس ەدى. وتەمۇراتوۆتىڭ وسى باستاماسىن ءبارى ءدۇر ەتىپ قولداپ الا جونەلسە عوي، شىركىن. ءاي، قايدام. وزگەسىن بىلاي قويعاندا وسى ولكەدەن شىققان قالتالىلار دا تىپ-تىنىش. «سەن تيمەسەڭ، مەن تيمەسپەن» الاڭسىز ءومىر ءسۇرىپ جاتىر. وزگەسىن بىلاي قويعاندا، وسى وبلىستىڭ قارابالىق اۋدانىنىڭ تۋماسى، ەلىمىزدەگى بايلاردىڭ العى شەبىندە جۇرگەن ادىلبەك جاقسىبەكوۆ كەزىندە سول اۋداندا ءمارماردان كەرەمەت مەشىت سالىپ، وعان شەشەسىنىڭ ەسىمىن بەرۋمەن اتى شىققان. قازىر ول دا ءۇنسىز.

بۇل ۇنسىزدىك بۇكىل قوستاناي وبلىسىن جايلاپ العان. ءبىزدىڭ مۇمكىن انا مەملەكەتتىڭ ەسەبىنەن سالىنعان، اۋماعى ات شاپتىرىم رەزيدەنتسيادا تۇرىپ جاتقان وبلىس اكىمى ارحيمەد مۇقامبەتوۆ 2 ميلليوندىق ايلىعىنىڭ جارتىسىن بەرىپ، قالعان ءبىر ميلليونىمەن ءبىر اي شىداي تۇرىپ، وزگەلەرگە ۇلگى كورسەتە مە دەگەن ءۇمىتىمىز دە جەلگە ۇشتى. «جامان ادەت جۇققىش كەلەدى» ەمەس پە، ارحيمەد ۇندەمەگەن سوڭ، قالعاندارىنان نە ءۇمىت، نە قايىر؟

ماسەلەن، مىنا كورشىمىز - اقتوبە وبلىسىنداعى «اقتوبە» فۋتبول كلۋبى ءبىر ماتچىنان تۇسكەن 7 ميلليون تەڭگەنى وسىنداعى ورتتەن زاپا شەككەندەرگە اۋدارۋعا بەل بۋىپتى. ال وسىنداعى ارحيمەد بيۋدجەت ەسەبىنەن ميللياردتاعان قارجى اۋدارىپ، ەرەكشە ماپەلەپ، لەگيونەرلەردى بايىتىپ وتىرعان «توبول» فۋتبول كلۋبى تاس كەرەڭ بولا قالىپتى. ولارعا جان كۇيەرلەر تەك ماتچ كەزىندە عانا كەرەك سەكىلدى.

مىنەكەي، كىمنىڭ كىم ەكەندىگى ادامنىڭ باسىنا قيىن كەزەڭ تۋعاندا عانا بايقالادى. جاي ۋاقىتتا ءبارى دە مىرزا، ءبارى دە اتىمتاي جومارت. ال قاراشا قينالعاندا ءبىزدىڭ ۇرلىقپەن بايىعان «فوربس» جۋرنالىنىڭ كەيىپكەرلەرى ءساندى سارايلارىنان سىرتقا شىعۋعا جۇرەكتەرى داۋالامايدى. مىنە، ەلىمىزدىڭ بۇگىنگى جاعدايى وسىنداي.

ايتپاقشى، سوڭعى جاڭالىقتى ايتا كەتكەن ورىندى سەكىلدى. وسى جاقىندا عانا ءبىر كەزدەرى وبلىسىمىزدا وسى ارحيمەد سەكىلدى 7 جىل باسقارعان سەرگەي كۋلاگين وسىنداعى باسپاناسىنان ايىرىلعان جاندارعا دەپ، ءوز قالتاسىنان 7 ميلليون تەڭگە اۋدارىپتى. ءسويتىپ، وزگە ۇلتتان بولسا دا ازاماتتىعىن بايقاتىپتى. ال قازاقشاعا سۋداي، ءوز ۇلتىمىزدىڭ وكىلى - ارحيمەد مىرزادان مۇنداي جاناشىرلىقتى بايقامادىق.

جايبەرگەن بولاتوۆ

Abai.kz