قازاقستان ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىندا سۇمبە ترانسشەكارالىق وزەنى تۋرالى كەلىسىمگە قول قويىلدى. بۇل قحر توراعاسى سي ءتسزينپيننىڭ قازاقستانعا مەملەكەتتىك ساپارى اياسىندا وتكىزىلدى، دەپ حابارلايدى ەكولوگيا مينيسترلىگى.

قازاقستان رەسپۋبليكاسى ۇكىمەتىنىڭ اتىنان كەلىسىمگە قر ەكولوگيا، گەولوگيا جانە تابيعي رەسۋرستار ۆيتسە-ءمينيسترى ءاليا شالابەكوۆا، قىتاي حالىق رەسپۋبليكاسى ۇكىمەتىنىڭ اتىنان سۋ شارۋاشىلىعى ءمينيسترىنىڭ ورىنباسارى تيان سيۋەبين قول قويدى.

«سۋ قاتىناستارى ءبىزدىڭ ەلدەرىمىز اراسىنداعى ىنتىماقتاستىقتىڭ ماڭىزدى باعىتتارىنىڭ ءبىرى بولىپ تابىلادى. وعان جوعارى دەڭگەيدەگى بارلىق ەكىجاقتى كەزدەسۋلەردە سۋ ماسەلەلەرىن ۇنەمى تالقىلاۋ دالەل بولادى»، - دەدى ۆيتسە-مينيستر ءوزىنىڭ كىرىسپە سوزىندە.

ايتا كەتۋ كەرەك، اتالعان قۇجاتقا قول قويۋ سۇمبە وزەنىنىڭ سۋ رەسۋرستارىن ۇتىمدى پايدالانۋعا جانە الماتى وبلىسى رايىمبەك اۋدانىنداعى اۋىل شارۋاشىلىعى مۇقتاجدىقتارىنا سۋ جيناۋدى جاقسارتۋعا مۇمكىندىك بەرەدى.

قازاقستان تاراپىنا ارناعان سوزىندە سۋ شارۋاشىلىعى ءمينيسترىنىڭ ورىنباسارى تيان سيۋەبين كەلىسىمگە قول قويۋ ترانسشەكارالىق وزەندەردىڭ رەسۋرستارىن ۇتىمدى جانە ءادىل پايدالانۋ كونتەكسىندە ەكى ەل اراسىنداعى ءوزارا ىنتىماقتاستىقتى دامىتۋعا قۋاتتى سەرپىن بەرەتىنىن اتاپ ءوتتى.

Abai.kz