وزبەكستاننىڭ سامارقاند قالاسىندا شىۇ ءسامميتى الاڭىندا "قىتاي-قىرعىزستان-وزبەكستان" تەمىر جولى قۇرىلىسى بويىنشا ارىپتەستىك تۋرالى كەلىسىمگە قول قويىلدى.

بۇل تۋرالى قىرعىزستان پرەزيدەنتىنىڭ اكىمشىلىگى حابارلادى. قۇجات "تورۋگارت - ارپا - ماكمال - جالال-اباد" باعىتىمەن تۇسەتىن تەمىر جول قۇرىلىسى جوباسىنىڭ تەحنيكالىق-ەكونوميكالىق نەگىزدەمەسىن ءساتتى اياقتاۋعا كومەكتەسۋدى قاراستىرادى.

جوبانىڭ تەحنيكالىق-ەكونوميكالىق نەگىزدەمەسىن دايىنداۋمەن قىتاي تەمىر جول كورپوراتسياسىنىڭ جوبالاۋ ينستيتۋتى اينالىسادى، قالعان تاراپتار وعان بارىنشا كومەك كورسەتەدى. تەمىر جول جوباسىنىڭ نەگىزدەمەسى، سونىڭ ىشىندە قۇرىلىس قۇنىن ەسەپتەۋ جۇمىسى 2023 جىلدىڭ 1 شىلدەسىنە دەيىن اياقتالۋى ءتيىس.

تاراپتار جوبا نەگىزدەمەسىن دايىنداۋ شىعىنىن تەڭدەي ءبولىپ تولەيدى.

قىتاي بيلىگى "قىتاي-قىرعىزستان-وزبەكستان" تەمىر جولىنىڭ سالىنۋىن قولدايدى. 15 قىركۇيەكتە سامارقاند قالاسىندا قىرعىزستان پرەزيدەنتى سادىر جاپاروۆەن كەزدەسكەن قحر توراعاسى سي تسزينپين وسىلاي دەپ مالىمدەدى.

جاپاروۆ سي ءتسزينپيندى قىرعىزستانعا رەسمي ساپارمەن كەلۋگە شاقىردى. قىرعىزستان پرەزيدەنتى اكىمشىلىگىنىڭ حابارلاۋىنشا، سي تسزينپين ارىپتەسىنىڭ شاقىرتۋىن قابىل الدى.

"قىتاي-قىرعىزستان-وزبەكستان" تەمىر جولى قۇرىلىسى قىرعىزستان رەسپۋبليكاسىنىڭ كولىك سالاسىنداعى ماڭىزدى جوبا", - دەپ مالىمدەدى قىرعىزستان پرەزيدەنتىنىڭ اكىمشىلىگى. ول وڭتۇستىك-شىعىس، باتىس ازيا جانە تاياۋ شىعىس ەلدەرىنىڭ نارىقتارىنا شىعاتىن تەمىر جول دالىزىنە اينالۋى ءتيىس.

"قىتاي-قىرعىزستان-وزبەكستان" تەمىر جولى قۇرىلىسى تۋرالى باستاما 2000-جىلداردىڭ باسىندا ءجيى ايتىلعان، بىراق وسى ۋاقىتقا دەيىن جوبا جۇزەگە اسپاي كەلدى. قىرعىز ۇكىمەتىنىڭ باسشىسى اقىلبەك جاپاروۆتىڭ ايتۋىنشا، جوبا 5-7 ملرد دوللارعا ءتۇسۋى مۇمكىن.

Abai.kz