تاجىكستان ءسىم مالىمەتىنشە، قاقتىعىس كەزىندە كەمىندە 30 بەيبىت تۇرعىن قازا تاپقان.
ولاردىڭ ىشىندە ءبىر وتباسىنىڭ بەس مۇشەسى، 6 جاستاعى اسموا مەن 5 جاستاعى يمراننىڭ، اياعى اۋىر ايەلدەردىڭ قايتىس بولعانى ايتىلعان. سونىمەن بىرگە جەدەل جاردەم كولىگىنە، بەيبىت تۇرعىنداردىڭ ۇيلەرى مەن اكىمشىلىك عيماراتتارعا قاراتا وق اتىلعانى حابارلانىپ، بۇل اكتىلەردىڭ ءبارى گۋمانيزم پرينتسيپتەرى مەن حالىقارالىق گۋمانيتارلىق زاڭدارعا قايشى كەلەتىنى مالىمدەنگەن.
تاجىكستاننىڭ رەسمي مالىمدەمەسىندە 14 قىركۇيەك كۇنى تاڭەرتەڭ قىرعىز شەكاراشىلارى "سەبەپسىز" يسفاراداعى تاجىك وتكىزۋ بەكەتىنە مينومەت، پۋلەمەتەن وق اتقانى جازىلعان.
ازاتتىقتىڭ تاجىك قىزمەتى دەرەككوزىنە سىلتەمە جاساپ، 14-16 قىركۇيەكتە 39 ادامنىڭ قايتىس بولعانىن حابارلادى.
قىرعىزستاننىڭ سىرتقى ىستەر مينيسترلىگى دە تاجىكستانمەن شەكاراداعى جاعدايعا بايلانىستى رەسمي مالىمدەمە تاراتتى.
قىرعىزستان 14-17 قىركۇيەكتەگى جاعدايدى تاجىكستان تاراپىنان قىرعىزستاننىڭ تاۋەلسىزدىگىنە قول سۇعۋ ءارى الدىن الا جوسپارلانعان قارۋلى اكتى دەپ اتادى.
"قىرعىزستان تاجىك تارابىنان قاراعاندا وزگە ەلدىڭ اۋماعىن باسىپ الۋ ماقساتىندا ەمەس، جەرىن قورعاۋ ۇستانىمىندا بولدى. تاجىكستاننىڭ بۇل ارەكەتىن حالىقارالىق تالاپتارعا قايشى ءارى دەسترۋكتيۆتى دەپ باعالايمىز. اسكەري تەحنيكالارىن قولدانىپ، ەش سەبەپسىز شەكاراعا قارسى، بەيبىت تۇرعىندارعا قارسى وق اتتى. قىرعىز-تاجىك شەكاراسىنىڭ سىزىعى سوزىلىپ جاتقان باتكەن مەن لەيلەك اۋداندارىنا، باتكەن وبلىسىنىڭ ورتالىعىنا، باتكەن قالاسىنا وق اتتى. وق اتۋدى توقتاتۋ جونىندەگى وسىعان دەيىنگى بىرنەشە كەلىسىمنىڭ بار ەكەنىنە قاراماستان، تاجىك تارابى دوستىق، اقساي، ينتەرناتسيونال، جاشتىك، بوربوردۋك، ارقا جانە كۋلۋندۋ ەلدى-مەكەندەرىن باسىپ الدى", - دەلىنگەن قىرعىزستاننىڭ ءسىم تاراتقان مالىمدەمەدە.
قىرعىزستان تارابى مالىمدەمەسىنە ايعاق بولاتىن ماتەريالدار جەتكىلىكتى ەكەنىن ايتتى.
16 قىركۇيەكتە قىرعىز-تاجىك شەكاراسىندا ىرى قاقتىعىس بولدى. تاراپتار وقيعاعا ءبىر-ءبىرىن كىنالادى. سول كۇنى اتىستى توقتاتۋ تۋرالى كەلىسىم جاسالعانمەن شەكارادا اتىس قايتا جالعاسقان. قىرعىزستاننىڭ باتكەن وبلىسىندا توتەنشە جاعداي جاريالاندى.
17 قىركۇيەكتە دە شەكارادا قاقتىعىس تىنشىمادى، تاراپتار ءبىر-ءبىرىن كەلىسىمدى بۇزدى دەپ ايىپتادى. ازاتتىقتىڭ قىرعىز قىزمەتىنىڭ جازۋىنشا، بۇل جولى وش وبلىسىنىڭ چون-الاي اۋدانىندا قاقتىعىس بولعان.
قىرعىزستان دەنساۋلىق ساقتاۋ مينيسترلىگىنىڭ مالىمەتىنشە، قاقتىعىستىڭ سالدارىنان 36 ادام قازا بولعان، اراسىندا بەيبىت تۇرعىندار دا بار. كەمىندە 144 ادام زارداپ شەككەن.
Abai.kz
