رەسەيدە موبيليزاتسيا جالعاسۋدا. جارتىلاي موبيليزاتسيا رەسەي قوعامىن حاوسقا سالىپ قويدى. ەلدەن كەتۋشىلەر سانى ساعات ساناپ ارتۋدا. ال ماسكەۋ ولاردى توقتاتۋ ءۇشىن شەكارانى جابۋدى ۇسىنىپ وتىر. 

موبيليزاتسياعا قارسىلاردىڭ باسىم بولىگى پۋتين بيلىگىن قولدايتىندار. ولار موبيليزاتسياعا دەيىن سوعىستى قولداپ، اگرەسسيانى جاقتاعاندار. كولىكتەرىنە "Z" بەلگىسىن جابىستىرىپ، ءوز پوزيتسيالارىن بىلدىرگەندەر ەدى. الايدا موبيليزاتسيا بارلىعىن وزگەرتتى جانە الەۋمەتتىك جەلىدە اگرەسسيانى قولداۋ مەن شىنايى سوعىسقا قاتىسۋدىڭ ايىرماشىلىعى جەر مەن كوكتەي ەكەنىن رەسەيلىكتەر جاقسى تۇسىنەدى. سول سەبەپتى ولار ەندى سوعىستى جاقتاۋشىلار ەمەس، بەيبىت ءومىردى اڭساۋشىلار بولىپ شىعا كەلدى. كولىگى بارلار كولىككە وتىرىپ، قازاقستان، موڭعوليا، گرۋزيا، بەلارۋس اسىپ جاتىر. ال شەكاراعا جاقىن ەمەستەرى ۇشاققا بيلەت الىپ، تۇركيا مەن دۋبايعا، سەربياعا كەتۋگە تالپىنۋدا.

سوڭعى اقپاراتتارعا سەنسەك، موبيليزاتسيا جاريالانعان ساتتەن باستاپ رەسەيدەن 261 مىڭ ەر ادام شىعىپ كەتكەن. ولاردىڭ بارلىعى دەرلىك كەرى قايتۋعا نيەتتى ەمەس جانە ۇقشۇ-عا مۇشە ەلدەردىڭ قاتارىندا ۇزاق قالۋدى ويلامايدى. ماسكەۋدىڭ سۇراۋى بويىنشا وزدەرىن كەرى قايتارىپ جىبەرۋى مۇمكىن دەپ سانايدى. سوندىقتان تەز ارادا باسقا ەلگە كەتۋدى ويلاستىرۋدا، ال ۇقشۇ ەلدەرىن ترانزيت رەتىندە قولدانۋدا.

رەسەيدەگى موبيليزاتسيا پروتسەسىنە شاقىرۋشىلاردىڭ كوڭىلى تولمايتىنى انىق كورىنۋدە. مىڭداعان موبيليزاتسيالانعاندار رەسەي بيلىگىنىڭ وزدەرىن ءتىپتى قاراپايىم تاماقپەن قامتاماسىز ەتە الماي جاتقانىن ايتادى. ءبىر توبى جاتىن ورىن جوق، سۋىق ەدەندە جاتىرمىز دەسە، ەندى ءبىرى ورماننىڭ ىشىندە وت جاعىپ، جىلىنىپ وتىرعان ۆيدەولاردى سالدى. ال موبيليزاتسيالانعانداردىڭ ىشىندە ىشىمدىككە سىلقيا تويىپ، ۇيىقتاپ قالعان نەمەسە جانىنداعىنىڭ جاعاسىنان الىپ، توبەلەس شىعارعان ۆيدەولار بۇگىندە الەۋمەتتىك جەلىدە كەڭىنەن تاراۋدا. ۆوەنكوماتتا جۇرەگى ۇستاپ، اۋرۋحاناعا اتتانعاندار دا جەتەرلىك.

حالىق قارسىلىعى كەي ايماقتا ۆوەنكوماتتارعا ءورت قويۋمەن كورىنىس تابۋدا. ال يركۋتسك قالاسىندا موبيليزاتسياعا شاقىرىلعان 25 جاستاعى جىگىت ءتىپتى ۆوەنكومدى اتىپ تاستاعان جاعداي تىركەلدى.

رەسەي بيلىگى موبيليزاتسيانى تالاپقا ساي جۇرگىزبەگەن ايماقتارعا ەسكەرتۋ جاساپ، قوعام الدىندا ءتۇسىپ كەتكەن بەدەلىن كوتەرىپ الۋدىڭ دا امالىن جاساۋدا. كەي ايماقتار موبيليزاتسياعا مۇلدە قاتىسپايمىز دەپ مالىمدەۋدە. مىسالى شەشەنستان موبيليزاتسيا پروتسەسى بولمايتىنىن ايتتى. قادىروۆ ء"بىز جوسپاردى ەكى ەسە ورىنداپ تاستاعانبىز" دەيدى. قىرىم دا ءدال سولاي. داعىستان حالقى بولسا كەشەلى بەرى بۇلقىنىپ جاتىر. ولار دا قارسى.

رەسەيدەگى موبيليزاتسيا قازىردىڭ وزىندە ماسكەۋ قالاعانداي ىسكە اسپاي جاتقانى بەلگىلى بولدى. ەل اراسىندا موگيليزاتسيا دەپ بەكەر ايتىلماسا كەرەك-ءتى...

Abai.kz