جاپونيا سىرتقى ىستەر مينيسترلىگى رەسەي ەلشىسى ميحايل گالۋزيندى شاقىرتتى. جاپون ۇكىمەتى وعان ۆلاديۆوستوكتاعى كونسۋلدىڭ ۇستالۋىنا نارازى ەكەنىن ايتتى. رەسەي فەدەرالدىق قاۋىپسىزدىك قىزمەتى جەكسەنبى كۇنى جاپون ديپلوماتى موتوكي ءتاتسۋنوريدى تىڭشى دەپ ايىپتاعان.

جاپونيا سىرتقى ىستەر مينيسترلىگى باسشىسىنىڭ مالىمدەمەسىندە رەسەيدەن كونسۋلدىڭ ۇستالۋىنا بايلانىستى رەسمي كەشىرىم سۇراۋ تالاپ ەتىلگەنى ايتىلعان. جاپون ءمينيسترىنىڭ پىكىرىنشە، ديپلومات زاڭعا قايشى ەشقانداي ارەكەت جاساماعان. بۇل تۋرالى "كيودو تسۋسين" اگەنتتىگى حابارلادى.

رەسەي فەدەرالدىق قاۋىپسىزدىك قىزمەتى دۇيسەنبى كۇنى ءتاتسۋنوريدىڭ ۇستالۋ سەبەبىن ءتۇسىندىردى. فەدەرالدىق قىزمەت مالىمەتىنشە، ديپلومات رەسەيدىڭ ازيا-تىنىق مۇحيت ەلدەرىمەن ارىپتەستىگى، سانكتسيالاردىڭ رەسەي ەكونوميكاسىنا اسەرى تۋرالى قۇپيا اقپاراتتى اقشاعا ساتىپ العان. فقق ءباسپاسوز قىزمەتى كونسۋلدىڭ ءبىر كافەدە قۇجاتتى الىپ جاتقانى، ۇستالعان سوڭ كامەراعا زاڭسىز ارەكەتىن مويىنداعانى تۋرالى ۆيدەو تاراتتى.

رەسەي ءتاتسۋنوريدى پەرسونا نون گراتا دەپ جاريالادى. ديپلومات ەلدەن كەتۋى ءتيىس. قارىمتا قايتارۋ ءۇشىن جاپونيا رەسەيدىڭ ءبىر كونسۋلىن ەلدەن شىعارۋى مۇمكىن.

ماسكەۋ مەن توكيو اراسىنىڭ قارىم-قاتىناسىنىڭ سالقىن تارتقانىنا بىرنەشە جىل بولدى. رەسەي ۋكرايناعا باسىپ كىرگەن ۋاقىتتا جاپونيا باتىس ەلدەرىمەن بىرگە رەسەيگە قارسى سانكتسيا جاريالادى. ماسكەۋ جاپونيانى دوس ەمەس ەلدەر تىزىمىنە قوسىپ، بەيبىت كەلىسىم تۋرالى كەلىسسوزدەردى ءۇزدى، جاپون ازاماتتارىنا كۋريل ارالدارىنا جەڭىلدىكپەن كەلۋگە تىيىم سالدى.

Abai.kz