قۇرمەتتى اسحات ايماعانبەتوۆ مىرزا!

مەن اۋىلدىق مەكتەپتە تاربيە ورىنباسارى بولىپ جۇمىس جاسايمىن. ەڭبەك ءوتىلىم 10 جىلدان استى. تاربيە سالاسىندا جۇرگەنىمە 1 جىلدىڭ كولەمى بولدى. تاربيە ورىنباسارى رەتىندە مەن بالانىڭ تاربيەسىن الدىنعى قاتارعا قويامىن. سەبەبى مەكتەپىشىلىك تاربيە جۇمىسىنىڭ ادىستەمەلىك تاقىرىبى: ۇلتتىق رۋحى بيىك، ادامگەرشىلىگى جوعارى، سالاۋاتتى ءومىر سالتىن ۇستاناتىن، ەلىنىڭ وتكەنىن قۇرمەت تۇتىپ، ەرتەڭىنە ءوز ۇلەسىن قوسۋدى پارىزىم دەپ بىلەتىن جان-جاقتى ءبىلىمدى، قابىلەتتى، جاڭاشىل تۇلعا قالىپتاستىرۋ!

اياق استى تاپتالاتىن، قوعامدا تەك سوزبەن بولماسا، ءىس-جۇزىندە ەش بەدەلى جوق مۇعالىمنىڭ دارەجەسىن ەلەپ جاتقان ەشكىم جوقتىعىنا ءوزىمىز كۋامىز. بەدەلىمىز تەك بالا مەن اتا-انا الدىندا ەمەس، ارىپتەستەر الدىندا دا جوق.

اتاقتى ويشىل ءال فارابي: «ادامعا ەڭ ءبىرىنشى ءبىلىم ەمەس، تاربيە كەرەك. تاربيەسىز بەرىلگەن بىلىم – ادامزاتتىڭ قاس جاۋى، ول كەلەشەكتە ونىڭ ومىرىنە قاۋىپ اكەلەدى»، - دەگەن ەكەن.

ال ەندى وسىنىڭ ءبارى تەك انشەيىن ءسوز بولىپ قالدى، مەنىڭ جۇمىسىمنىڭ كورسەتكىشى الۋمەتتىك جەلى ونىڭ ىشىندە ۆاتساپ، ينستاگرامم، فەيسبۋك، ودان قالدى قاعاز جۇزىندە وسىنىڭ دالەلى حاتتاماسى، ونىڭ انىقتاماسى، ءتۇرلى-ءتۇستى سۋرەتى مەن پەرەپلەتتەلگەن بولۋى كەرەك. وسىلار شارت پا؟ مەن وسى جوعارىدا اتالعانداردى ورىنداۋىم ءۇشىن بارلىق ۋاقىتىمدى قاعازعا سارپ ەتەمىن، ودان قالدى بارلىق قاعاز ءۇشىن ءوز قالتامنان اقشامدى جۇمساۋىم كەرەك. سوندا مەن نە ءۇشىن بۇلاي جاساۋىم كەرەك دەگەن وي دا مازالايدى.

ايتا بەرسە شەشىمىن تاپپاي وتىرعان ماسەلە وتە كوپ. قاعازدان سوڭ مۇعالىمنىڭ جەكە ۋاقىتى جونىندە (ونىڭ دا بالا-شاعاسى، شارۋاسى، وتباسى بار), بىراق، كەشكىلىك كەزەكشىلىك رەيدكە شىعارۋ ماسەلەسى بولىپ وتىر. اياق استى تاپتالعان نامىس پەن بەدەل وسىنىڭ ءبارىن ورىندايتىن وسى ماسەلەنىڭ نۇكتەسىن قوياتىن ءسىز. نامىسى اياق استى بولعان ۇستازدىڭ الدىندا وتىرعان بالادا نە نامىس، نە ار بولادى. بالا-شاعامدى اسىرايمىن دەپ تەر توككەن ۇستازدار سانى از ەكەنىن بىلەمىز، بىراق، «جانىم ارىمنىڭ ساداعاسى» دەمەكشى، نامىستى، ارلى ۇستازدار سانى كەمىپ كەتپەسىن.

مەكتەپ قابىرعاسىندا ءجۇرىپ جۇكتى بولاتىن قىزدارىمىز ءۇشىن نە سەبەپتى مۇعالىم جاۋاپ بەرۋى كەرەك. ءوز-وزىنە قول جۇمسايتىن بالا ءۇشىن دە ءدال سولاي. وسىنداي پروبلەمالاردى كورە وتىرىپ، ورامال ماسەلەسى دە شەشىلمەدى.

مۇعالىمنىڭ مارتەبەسىن كوتەرەمىز دەپ جۇرتقا جار سالعانىمەن، ءىس جۇزىندە بۇل دا تەك ءسوز بوپ قالدى، الىپپەدەن باسقا شەشىمىن تاپقان ماسەلەلەر بار ما دەگەن وي دا كەلەدى.

قۇرمەتتى اسحات قاناتۇلى!

سىزدەن ءوتىنىپ سۇرارايتىنىم، ەلىمىزدىڭ باس ۇستازى رەتىندە وسى ماسەلەلەردى شەشۋگە كومەكتەسىڭىز. ءبىزدى تولعاندىرىپ وتىرعان ماسەلەرلەر وڭ شەشىمىن تابادى دەپ ۇمىتتەمىن. رۋحى بيىك، ارلى نامىستى، ەلىنىڭ بولاشاعىن ويلايتىن بالا تاربيەلەۋىمە مۇمكىندىك بەرىڭىز. وزگەنىڭ بالاسىنا ءوز بالامداي تىلەك تىلەپ، ءوز بالامداي جاناشىر رەتىندە قارايتىنىما اللانىڭ الدىندا ءسوز بەرەمىن.

مەيىرحان ءدىلجانوۆ

Abai.kz