مەكتەپ تۇلەكتەرىنە جوعارى وقۋ ورنىنا تۇسۋگە مۇمكىندىك بەرەتىن ۇلتتىق بىرىڭعاي تەستىلەۋ جۇيەسىنە وزگەرىس ەنبەك. 2023 جىلدان باستاپ نەگىزگى ۇبت ءساۋىر جانە شىلدە ايلارىندا وتكىزىلەدى. بۇل تۋرالى ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ مالىمدەدى.

«كەلەسى ەرەجە بەكىتىلگەنشە نەگىزگى ۇبت ەكى رەت بولىپ قالادى. بيىلعى وقۋ جىلىندا وقۋشىلاردا 5 رەت ۇبت تاپسىرۋعا مۇمكىندىك بار. قاڭتاردا، ناۋرىز، تامىزدا اقىلى نەگىزدە وتەدى جانە ونىڭ سەرتيفيكاتى جوعارى وقۋ ورنىندا اقىلى نەگىزدە وقۋعا جارايدى. سونداي-اق ەكى نەگىزگى ۇبت-نى تاپسىرۋعا مۇمكىندىك بەرىلگەن. تىركەلۋ ونلاين فورماتتا وتەدى، اركىم تەستىلەۋ تاپسىرۋ كۇنىن جانە ۋاقىتىن ءوزى بەلگىلەي الادى»، – دەدى ول.

سونداي-اق ورتالىق ديرەكتورى 2023 جىلى نەگىزگى ۇبت نەلىكتەن ءساۋىر جانە شىلدە ايلارىندا وتكىزىلەتىنىن ءتۇسىندىردى.

«جىل سايىن نەگىزگى ۇبت مامىر جانە ماۋسىم ايلارىندا وتكىزىلىپ كەلدى. ەندى وعان وزگەرىس ەنگىزگەلى وتىرمىز، جوباسى دايىن. بيىلعى جوسپارىمىز بويىنشا ءبىرىنشى مۇمكىندىككە تىركەلۋدى ناۋرىز ايىندا اشقالى وتىرمىز. العاشقى تەستىلەۋدى ءساۋىر ايىندا وتكىزۋدىڭ بىرنەشە سەبەبى بار. بىرىنشىدەن، مامىر ايىندا مەرەكە كوپ. ەكىنشىدەن، بيىلعى وقۋ جىلىندا 31 مامىردا وتەتىن ماڭىزدى مەرەكە – سوڭعى قوڭىراۋ بار. وقۋشىلاردىڭ بار ويى سوڭعى قوڭىراۋدى تويلاۋدا بولادى»، – دەپ ءتۇسىندىردى رۋسلان ەمەلباەۆ.

ۇلتتىق تەستىلەۋ ورتالىعى عىلىم جانە جوعارى ءبىلىم مينيسترلىگىنە ۇسىنعان جاڭا جوبادا ديستراكتورلار (جاۋاپ نۇسقالارى) سانى وزگەرتىلگەن. ياعني ءبىر دۇرىس جاۋابى بار تەست تاپسىرمالارىندا نۇسقالار سانى 5-تەن 4-كە دەيىن، ءبىر نەمەسە بىرنەشە دۇرىس جاۋابى بار تەست تاپسىرمالارىندا ء(ۇش دۇرىس جاۋاپتان كوپ ەمەس) نۇسقالار سانى 8-دەن 6-عا دەيىن ازايادى.

رۋسلان ەمەلباەۆتىڭ ايتۋىنشا، سۇراقتار سانىندا دا وزگەرىستەر بولادى. «وقۋ ساۋاتتىلىعى» بويىنشا 15 سۇراق: 5 سۇراقتان 3 ءماتىن (200-ء350سوز) بەرىلەدى، ال «قازاقستان تاريحى» بويىنشا 20 سۇراق: ءبىر دۇرىس جاۋاپتى 10 تاپسىرما، ءمانماتىن نەگىزىندە 10 تاپسىرما بەرىلەدى. بۇل وزگەرىستەر قازىرگى تاڭدا تەستىلەۋ ورتالىعى تاراپىنان جوبا رەتىندە ۇسىنىلعان.

Abai.kz