قازاقستان زاڭسىز ەڭبەك ميگراتسياسىن ادام ساۋداسىنان قورعاۋ ءۇشىن ارنايى شارا قابىلداماقشى. بۇل جايىندا قر ىشكى ىستەر ءمينيسترى مارات احمەتجانوۆ استانادا ءوتىپ جاتقان قۇقىقتىق فورۋمدا ايتتى.

«قازاقستان قازىر كورشى ەلدەردىڭ ازاماتتارىنا جۇمىس ورىندارىن ۇسىنۋشى ەل بولىپ وتىر. وسى ەڭبەك ميگراتسياسىن زاڭداستىرۋ قاجەت. ويتكەنى ادام «كولەڭكەلى ايماقتا» قالماۋى كەرەك. ادەتتە ونداي ايماقتاعى ميگرانت ادام ساۋداسىنىڭ قۇربانىنا اينالادى. سەبەبى ءوز ەلىمىزدە زاڭسىز جولمەن جۇرگەن بولۋى مۇمكىن. سوندىقتان ەلدەن شىعارىپ جىبەرەدى دەپ قورىققاندىقتان ارىزدانا المايدى. سوندىقتان ءبىز وسىنداي اسپەكتىنى قاراستىردىق. ەگەر ونداي شەتەلدىك قىلمىس قۇربانى بولسا، مەملەكەت ونى كۇشتەپ شىعارماۋعا كەپىلدىك بەرەدى»، - دەدى ىشكى ىستەر ءمينيسترى.

سونداي-اق، ول ەلىمىز 60 ەلمەن ادام ساۋداسىنىڭ قۇربانىنا اينالعان قازاقستان ازاماتتارىنا ءوزارا كومەك كورسەتۋ تۋرالى كەلىسىمشارتقا قول قويعانىن ەسكە سالدى.

«بۇل ماسەلەدە قازاقستان ءوزارا قۇقىقتىق كومەك جونىندەگى 60-تان استام ەكىجاقتى حالىقارالىق كەلىسىمشارتتىڭ قاتىسۋشىسى بولىپ ەسەپتەلەدى. سونىڭ اياسىندا بىرنەشە مەملەكەتكە ادام ساۋداسىنىڭ قۇربانىنا اينالعان ءوز ازاماتتارىمىزعا قۇقىقتىق كومەك كورسەتۋ تۋرالى سۇراۋحات جىبەرە الامىز»، - دەدى مارات احمەتجانوۆ.

Abai.kz