تىركەلمەگەن دەموكراتيالىق پارتيا جەتەكشىسى، بەلسەندى جانبولات ماماي تۇرمەدەن شىعىپ، ۇيقاماققا اۋىستىرىلدى.  ول اقپان ايىنان باستاپ 8 اي بويى قاماۋدا وتىردى.

ونىڭ ۇستىنەن اشىلعان قىلمىستىق ءىس بويىنشا العاشقى سوت وتىرىسى 7 قاراشادا وتپەك.

بەلسەندى اباقتى الدىندا قارسى العان جاقتاستارىنىڭ الدىندا «وزىنە تاعىلعان ايىپتى مويىندامايتىنىن، شىندىق ءۇشىن كۇرەسەتىنىن» ايتتى.

«سىزدەرگە كوپ راقمەت! بۇل مەن ءۇشىن كۇتپەگەن جاڭالىق بولدى. سيزو-دان شىعىپ، ۇيگە بارۋعا ەش دايىندالماعان ەدىم. 8 جارىم ايىمدى كامەرادا وتكىزدىم. اياق استىنان بوستاندىققا شىعاسىن دەپ قاعاز الىپ كەلدى. سىزدەرگە العىسىم شەكسىز! بۇل – تەك قوعامنىڭ جەڭىسى دەپ ويلايمىن. بۇل – تولىق بوستاندىق ەمەس. ۇيقاماققا اۋىستىرىلدىم. ەگەر قوعام نارازىلىق ءبىلدىرىپ، حالىقارالىق ۇيىمدار قولداۋ بىلدىرمەسە، بۇگىنگى جاعداي ورىن الماس ەدى. ماعان تاعىلعان ايىپتى مەن مويىنداعان ەمەسپىن جانە مويىندامايمىن دا. 8 جارىم ايدان بەرى مەن ساياسي سەبەپپەن تۇرمەگە قامالدىم. دەنساۋلىعىم وتە جاقسى. وعان قاتىستى ەشقانداي ارىز-شاعىمىم جوق. بۇگىنگە دەيىنگى الەمگە دەگەن مەنىڭ تەرەزەم جۇبايىم مەن قورعاۋشىلارىم بولدى. سوتتا شىندىقتى دالەلدەپ كۇرەسۋگە مەن دايىنمىن»، - دەدى جانبولات ماماي.

بەلسەندىگە زاڭسىز ميتينگ ۇيىمداستىردى، پوليتسياعا ءتىل تيگىزدى، جالعان اقپارات تاراتتى دەگەن ايىپتار تاعىلعان. تاياۋدا جانبولات مامايعا تاعىلعان «جاپپاي تارتىپسىزدىك ۇيىمداستىردى» دەگەن ايىپ «بەيبىت جيىن وتكىزۋ ءتارتىبىن بۇزۋ» بابىمەن اۋىستىرىلعان.

Abai.kz