مەن وتكەندە بىزدەگى جۇمساق ورىندىقتاردا شالقايىپ وتىراتىن بيىك لاۋازىمدى شەنەۋنىكتەردىڭ قۇمار ويىنعا ەلىتكەندىگى سونشالىقتى، ىلعي كازينودان شىقپايتىندىعى تۋرالى جازعان ەدىم.

الماتى وبلىستىق پروكۋراتۋراسى وسى ماسەلەنى زەرتتەپ، بىزدەگى مىقتىلاردىڭ وسى كازينو مەن ويىن اۆتوماتتارىنا بارلىعى 500 ميلليون تەڭگەنى قالدىرىپ كەتكەندىگىن انىقتاعان.

سودان نە بولدى دەيسىزدەر عوي؟.. ەشتەڭە دە. بارلىعى سول باياعى، ءبارى سۋدان تازا، سۇتتەن اق بولۋعا تىرىسىپ، جانتالاسىپ جاتىر. ايتاتىندارى: «ارينە، بۇل دۇرىس ەمەس. بارلىق مەملەكەتتىك قىزمەتشىلەر ادەپ كودەكسىنەن اسپاۋى كەرەك»، - دەگەن جالپىلاما، جالپاق شەشەيلىك. سول باياعى «سەن تيمەسەڭ، مەن تيمەن بادىراق كوز» دەگەننىڭ سارىنى.

بۇلاردىڭ ىشىندە كازينودا اقشا ۇتقىزۋدان باسقالاردى شاڭ قاپتىرىپ كەتكەن، ياعني، 97 ميلليون تەڭگەنى قاباق شىتپاي وسىندا تاستاپ كەتكەن ىشكى ىستەر مينيسترلىگىنىڭ قىزمەتكەرلەرى كوش باستاپ تۇر. ال ولاردىڭ باستىعى مارات احمەتجانوۆتىڭ دا ايتاتىنى وسى ءۋاج. ولارمەن ۇزەڭگىلەس كەلە جاتقان، ياعني، كازينوداعى اقشا شاشۋدان ەكىنشى ورىن الىپ، 95 ميلليون تەڭگەنى سوزگە كەلمەستەن بەرە سالعان قورعانىس مينيسترلىگىندەگى دوكەيلەر، ءتىپتى، ءۇنسىز. اۋىزدارىنا سۋ تولتىرىپ العان سىڭايلى. بۇلار، ءسىرا، «باس سىنسا بورىك ىشىندە، قول سىنسا جەڭ ىشىندە» دەگەن ۇستانىمعا بەرىك ەكەندىگى بايقالادى. ال بۇلاردىڭ قاسىندا تىم قاراپايىمدىلىق تانىتىپ، قۇمار ويىنعا نەبارى 25 ميلليون تەڭگە عانا ۇتقىزعان قارجى مينيسترلىگىندەگى ۇنەمشىلدەرگە بىردەڭە دەۋدىڭ ءوزى ۇيات سەكىلدى. ودان قالدى، باس-اياعى تەك قانا 15 ميلليون تەڭگەنىڭ باسىنا سۋ قۇيعان قارجى مونتورينگى اگەنتتىگى مەن كازينوعا 7 ميلليون تەڭگەنى ازەر تاپقان جوعارعى سوتقا قالاي كىنا ارتا الارسىڭ؟..

جالپى، كازينو سەكىلدى جىن ويناقتان اۋلاق ءجۇرۋدىڭ قاجەت ەكەندىگىن جوعارى لاۋازىمدى مەملەكەتتىك قىزمەتكەرلەر تۇگىلى، قاراپايىم قايمانا قازاق تا بىلەدى. ال ادەپ كودەكسىنە بەرىك بولۋدى مينيستر مىرزا قاراماعىنداعىلارعا ەرتەرەك ەسكەرتۋى كەرەك ەدى. ەندى «جاۋ كەتكەن سوڭ، قىلىشىڭدى بوققا شاپ».

ال ەندى بۇل جەردە كوپشىلىكتى تولعانتقان باستى ساۋال مۇلدەم ۇمىت قالعان سىڭايلى. ول «وسىنشاما مول اقشانى الگى مەملەكەتتىك قىزمەتشىلەر قايدان الدى؟» دەگەن سالماقتى سۇراق. ءبىر قىزىعى، مۇنى ءمينيسترى بولسىن، قالعانى بولسىن، شەبەرلىكپەن اينالىپ وتۋگە تىرىسادى. بۇل نە، وعان جاۋابى جوق پا، الدە قاراپايىم حالىقتى اقىماق ساناي ما؟

سىزدەر قالاي ويلايسىزدار؟

جايبەرگەن بولاتوۆ

Abai.kz