پرەزيدەنت قاسىم-جومارت توقاەۆتىڭ كۇنى كەشە «ەسكەرتكىشتەر قويا بەرگەننەن گورى، سپورت جانە مەديتسينا نىساندارىن سالۋعا باسا نازار اۋدارۋ قاجەت. بۇل اتىراۋ وبلىسىنا عانا ەمەس، بۇكىل ەلىمىزگە قاتىستى ماسەلە» دەگەنى بەلگىلى. ارينە ەل باسشىسى بۇل ءسوزدى تەكتەن-تەككە ايتىپ وتىرعان جوق.

ۇلى ابايدىڭ وسكەمەنگە قويۋعا ارنالىپ جاسالعان ەسكەرتكىشىنىڭ قىزىلدار كوسەمى لەنيننەن اۋماي قالعانى جۇرت اشۋىن تۋدىرسا، اقيىق اقىن مۇقاعالي ماقاتاەۆتىڭ 90 جىلدىعىنا ارنالىپ تۇرعىزىلعان قولا ءمۇسىنى دە كوپتىڭ سىنىنا ۇشىراپ، قايتا قالپىنا كەلتىرىلگەن. ال رۋحاني ابىز اقسەلەۋ سەيدىمبەكتىڭ بيىل تۋعان جەرىنە قويىلعان بەينەسى ءتىپتى ەلدى ىزالاندىرىپ، الىنىپ تىنعان. ايتا بەرسەك اتتەگەن-ايلار اياق الىپ جۇرگىسىز. ۇلىلاردى ۇلىقتاۋ شاراسى – جەمقورلاردىڭ مەملەكەت قارجىسىن تالان-تاراجعا سالىپ، جەمساۋىن تولتىراتىن توتە جولعا اينالعانداي.

سونداي زاڭسىزدىقتاردىڭ ءبىرىن الماتىداعى بىلىكتى زاڭگەرلەردەن قۇرالعان «ادىلەت جولى» قوعامدىق ۇيىمى وزدەرى جۇرگىزگەن كەزەكتى قارجى موريتورگ بارىسىندا انىقتاپتى. ۇيىم باسشىسى باۋىرجان ماقۇلباەۆ مىرزانىڭ ايتۋىنشا: الماتى قالاسى مادەنيەت باسقارماسى 2021 جىلعى ماۋسىمنىڭ 9- ى كۇنى «Aspantau construction» جاۋاپكەرشىلىگى شەكتەۋلى سەرىكتەستىگىمەن ىبىراي التىنساريننىڭ ەسكەرتكىشىن تۇرعىزۋ جايىندا قۇنى 68 ميلليون 750 تەڭگە تۇراتىن كەلىسىم-شارت جاساسقان. (مەملەكەتتىك ساتىپ الۋ زاڭىنىڭ 3 پ 39 ست سايكەس. كەلىسىم-شارت ءنومىرى – 40).

ەكى جاقتى كەلىسىم بويىنشا التىنسارين ەسكەرتكىشىنىڭ تۇعىرى – 350 سم، قولا ءمۇسىننىڭ بيىكتىگى – 400 سم، جالپى بيكىتىگى – 750 سم بولۋى ءتيىس ەدى. اتالمىش كومپانيا الاياقتىققا جول بەرىپ، التىنسارين ەسكەرتكىشىنىڭ تۇعىرىنىڭ بيىكتىگىن كەلىسىلگەن 350 سم-دەن 177 سم الاسارتىپ، ءمۇسىنىنىڭ بيىكتىگىن 400 سم-دەن 350-گە تۇسىرگەن. سالدارىنان ايگىلى اعارتۋشىنىڭ ەسكەتكىشى 7 جارىم مەتر ەمەس، 5 مەتر 27 سم بولىپ شىققان. «ارامزانىڭ قۇيرىعى ءبىر اق تۇتام» دەگەندەي اككىلەردىڭ قيتۇرقى ارەكەتى قوعامدىق بەلسەندىلەردىڭ قىراعىلىعىنىڭ ارقاسىندا اشكەرە بولىپ وتىر.

قۇزىرلى ورىندار پرەزيدەنتتىڭ ءسوزىن جەرگە قالدىرماي، قاتاڭ شارالار قابىلدايدى دەپ سەنەمىز.

Abai.kz