يندونەزيادا G20 ءسامميتى باستالدى. الەمنىڭ الپاۋىتتارى قاتىسىپ جاتقان بۇل جيىنعا باق وكىلدەرى ەرەكشە قىزىعۋشىلىقپەن قاراپ وتىر. جيىندا كوتەرىلەتىن تاقىرىپتار دا وزەكتى. قاۋىپسىزدىك، سوعىسسىز الەم، قاقتىعىستاردى ازايتۋ، بولاشاقتى جارقىن ەتۋ جوسپارلارىن تالقىلاۋ جانە ت.ب. 

باليدەگى باسقوسۋعا رەسەي تاراپىنان لاۆروۆ قاتىسۋدا. بۇعان دەيىن جيىنعا پۋتين قاتىسۋى مۇمكىن دەگەن اقپارات ايتىلعان. الايدا كەيىن ول وناين قاتىسادى دەدى، ارتىنشا مۇلدە قاتىسپايتىنى بەلگىلى بولدى. ساراپشىلار ءپۋتيننىڭ جيىنعا ءتىپتى ونلاين قاتىسپاۋىنىڭ ءوزى ونىڭ بەدەلىنە جانە رەسەيلىك تاراپتىڭ جيىن بارىسىندا اشىق سىنعا ۇشىراۋى مۇمكىندىگىنە بايلانىستى دەيدى.

جيىنعا لاۆروۆ قاتىسۋدا. الەمنىڭ الپاۋىتتارى بيىل جيىننىڭ اشىلۋ سالتاناتىندا توپتاسىپ سۋرەتكە ءتۇسۋ ءراسىمىن جاسامادى. بۇل "رەسەيلىك دەلەگاتسيامەن ءبىر سۋرەتتە بولعىمىز كەلمەيدى", دەگەننەن كەيىن قابىلدانعان شەشىم ەدى.

ءسامميتتىڭ تاقىرىبى دا تۇسىنىكتى. ول رەسەي مەن ۋكراينا اراسىنداعى سوعىستى توقتاتۋ، ونىڭ سالدارىن جويۋ، ازىق-تۇلىك تاپشىلىعىن ازايتۋ جانە ت.ب. ءسامميتتى وتكىزۋشى يندونەزيا پرەزيدەنتى دجوكو ۆيدودو "ەگەر سوعىس توقتاماسا، ءبيۋىزدىڭ العا قارىشتاپ قادام باسۋىمىز ەكىتالاي، ءبىز الەمدى بولمەۋگە ءتيىسپىز", دەپ ءسوزىن باستادى. وسىنىڭ ءوزى سامميت بارىسىندا سوعىسىپ جاتقان تاراپتاردى قانداي دا ءبىر كەلىسىمگە كەلۋگە ۇگىتتەيتىن مالىمدەمەلەر بولاتىنىن ايعاقتاپ تۇر.

G20 ءcامميتىنىڭ سوڭعى كۇنىندە ارنايى رەزوليۋتسيا قابىلدانباق. وندا قاتىسۋشى ەلدەر بۇۇ جارعىسىن ساقتاۋ كەرەكتىگىن ايتادى دەپ كۇتىلۋدە. بۇل پوزيتسيانى رەسەي قولداي ما، جوق پا، ول جاعى بەلگىسىز. قازىردىڭ وزىندە رەسەي وكىلى رەتىندە قاتىسىپ جاتقان لاۆروۆ يادرولىق قارۋدى تاراتپاۋ جانە سوعىستا قولدانباۋ تۋرالى كوزقاراستى قولدايتىنىن راستاپ ۇلگەردى.

G20 ءسامميتىنىڭ قارساڭىندا بايدەن مەن سي اراسىندا كەزدەسۋ ءوتتى. تايۋان تالاسى، ساۋدا-ساتتىق سوعىسىنان كەيىن اقش پەن قىتاي اراسى سۋىپ كەتتى. ال رەسەي سوعىسىندا قىتاي بەيتاراپتىقتى ساقتاۋعا تىرىسۋدا. ەكى ەل باسشىسىنىڭ كەزدەسۋىندە دە رەسەي مەن ۋكراينا سوعىسى تالقى بولىپ، يادرولىق قارۋدى قولدانۋعا بولمايتىندىعى باسا ايتىلدى.

بۇگىنگى سامميتكە زەلەنسكي دە قاتىسۋدا. زەلەنسكي قازىرگى ۋاقىتتا رەسەيمەن سوعىستى اياقتاۋدىڭ مۇمكىندىگى بارىن ايتتى. ول سونىمەن قاتار ۋكراينا ءوز تەرريتورياسىن وزگەگە بەرەتىن شارتقا ەشقاشان كونبەيتىنىن دە مالىمدەدى. ول رەسەيمەن كەلىسىمنىڭ العىشارتتارى رەتىندە باسقىنشى اسكەردىڭ ەلدەن شىعارىلۋى مەن كەلتىرىلگەن شىعىندى وتەۋى كەرەكتىگىن دە مالىمدەدى.

سامميتتە تاراپتار استىق كەلىسىمىن ۇزارتۋ بويىنشا دا پىكىر الماسۋدا. ولار استىق پەن ەنەرگيانى بوپسا رەتىندە قولدانۋدى ايىپتاۋدا.

G20 ءcامميتىنىڭ الدىندا بۇۇ باس اسسامبلەياسىندا رەسەيدى ايىپتاپ، ۋكراينا بويىنشا رەپاراتسيا تولەۋ كەرەكتىگىن نۇسقايتىن قارارعا داۋىس بەرۋ ىسكە استى. قارار قابىلداندى. ورتالىق ازيا ەلدەرى قالىس قالدى، ال تۇركىمەنستان داۋىس بەرۋگە قاتىسپادى. رەسەيدى قولداپ، داۋىس بەرگەننىڭ ءبىرى بەلارۋس بولدى. "بۇل قاراردىڭ ءوزى رەسەيدەن الشاقتىق ساقتاعىسى كەلەتىندەر سانى ارتتى دەگەندى بىلدىرەدى", دەيدى ساراپشىلار.

كا مىرزا

Abai.kz