زەلەنسكيدىڭ ۇشاعى كەشە ەرەۆانعا قوندى. ءيا، ارمەنيانىڭ قاق تورىنە زەلەنسكي وپ-وڭاي جەتتى.

وندا ءبىر القا-قوتان جيىن بولماق. ەۋروپالىق ساياسي كەڭەستىڭ ءسامميتى وتەدى. 4 مامىردا. تاقىرىبى: «بولاشاقتى قۇرۋ: ەۋروپاداعى تۇراقتىلىق پەن بىرلىك» دەپ اتالادى.

ۇزىن-ىرعاسى 48 مەملەكەتتىڭ باسشىلارى (پرەزيدەنتتەر مەن ۇكىمەت باسشىلارى) شاقىرىلىپتى. ەۋروپانىڭ تۇتاس باسشىلارى جيىلۋدا. وسى جولى كانادا دا قاتىسپاق (پرەمەر-مينيستر مارك كارني). نورۆەگيا، فينليانديا، چەحيا، ۇلىبريتانيا پرەملەرلەرى تۇگەل بارماق.

ەڭ باستىسى - وسى جولى «ەو-ارمەنيا» ءسامميتى وتەدى. بۇل العاشقى سامميت.

ول ما، كۇنى كەشە: «ەرەۆان اشساق الاقانىمىزدا، جۇمساق جۇدىرىعىمىزدا»، - دەگەن ماسكەۋدەگىلەر بۇلقان-تالقان. ءتىپتى، ءبىر-ەكى اۋمەسەر زەلەنسكيدى تۇتقىنداۋدى دا ۇسىنىپتى. ارمەنيانىڭ گيۋمري دەيتىن قالاسىندا رەسەيدىڭ 102-ءشى اسكەري بازاسى مەن 4 مىڭ ساربازى ءالى بار عوي. سولار ارقىلى قۇرىقتاعىسى كەلىپتى.

الگىندە عانا زەلەنسكي ازىربايجانعا بارىپ، باكۋدە ءسوز سويلەگەن ەدى. ەندى ارادا ۋاقىت سۋىتپاي جاتىپ، ارمەنياعا ەمىن-ەركىن جەتىپ وتىر.

بۇل ماسكەۋ ءۇشىن قوسار سوققى بولدى. ارمەنيا ەۋروپاعا بەت بۇرعانىن كورسەتتى. بۇل - ءبىر سوققى بولسا، باكۋ مەن ەرەۆانعا زەلەنسكي الاڭسىز بارىپ ءجۇر. بۇل - ەكىنشى سوققى.

الگى بىردە پرەمەر-مينيستر پاشينيانمەن كەزدەسكەن پۋتين: «ارمەنيا ءبىر دۇنيەنى ءتۇسىنۋى ءتيىس. ەو مەن ەاەو-دا ءبىر ۋاقىتتا قاتار مۇشە بولۋ مۇمكىن ەمەس»، - دەگەن. بۇعان پاشينيان: «ارمەنيا مۇنى جاقسى بىلەدى. بولاشاقتا كورەرمىز. ال قازىر ءبىز ەو-عا دا، ەاەو-عا دا قايشى ەش ارەكەت جاساپ جاتقان جوقپىز»، - دەگەن.

ەستەرىڭىزدە بولسا، ماسكەۋگە بارىپ تۇرىپ، پاشينياننىڭ ءپۋتيننىڭ قىتىعىنا تيەتىن مالىمدەمەلەر جاساعانىن وسىعان دەيىن جازعان ەدىك.

ەندى مىنە، ارادا ۋاقىت ۇزاتپاي جاتىپ، ەۋروپانىڭ باسشى-قوسشىلارى ەرەۆاندا باس قوسىپ جاتىر. وڭتۇستىك قاپقازداعى ارمەنيا مەن ءازىربايجاننىڭ ماسكەۋدىڭ باس دۇشپانىن قوناق قىلۋى - گەوساياسي دەمارش قانا ما، الدە شىن مانىندە رەسەيدەن جىراي باستاعاننىڭ ءبىر كورىنىسى مە؟!

Abai.kz