بيىل 115 جاسقا تولعاندىعى اتالىپ ءوتىپ جاتقان اقىن، اۋدارماشى، جامبىل جاباەۆتىڭ حاتشىسى قىزمەتىن اتقارعان، قازاق ادەبيەتىنە جيىرماسىنشى جىلداردىڭ سوڭعى شيرەگىندە كەلىپ، قازاق پوەزيا­سىنىڭ قالىپتا­سۋىنا ەرەكشە ۇلەس قوسقان قارىمدى قالامگەرلەردىڭ ءبىرى – عالي ورمانوۆتىڭ ءبيۋستى ورنىن تاپپاي تۇر.

ءمان-جايدى انىقتاۋ ءۇشىن اڭگىمەنى ارىدەن باستاساق دەپ وتىرمىز. ءبىزدىڭ بىلۋىمىزشە، استانا قالاسىنداعى №7 مەكتەپ-گيمنازياسىنا عالي ورمانوۆتىڭ اتى بەرىلگەن. سودان كەيىن بۇرىنعى قالا اكىمى باقىت سۇلتانوۆ مەكتەپ الدىنا بيۋست ورناتۋ تۋرالى ماسەلەنى بەكىتىپ، ونى قالالىق ءبىلىم باسقارماسى دا راستاعان.

ال بۇل ماسەلە كەيىننەن سيىرقۇيىمشاقتانىپ كەتكەن.

اقىننىڭ جيەنى ايدار قىرىقبايۇلى:

- ەلوردا مەكتەپتەرىنىڭ بىرىنە ع.ورمانوۆتىڭ ەسىمى بەرىلگەن. 2007 جىلدان بەرى اتالعان مەكتەپتىڭ الدىنا بيۋست ورناتۋ ماسەلەسى كوتەرىلىپ كەلەدى. قالا اكىمى باقىت سۇلتانوۆ بولعاندا بيۋدجەت­تەن عالي ورمانوۆتىڭ ءبيۋستىن ورناتۋ ماسەلەسى بەكىتىلگەن دە بولاتىن. وكىنىشكە قاراي، قارجىسى دا، بيۋست تە جوق بولىپ كەت­تى. وسى ماسەلەنى قازىرگى استانا قالاسىنىڭ اكىمى التاي كولگىنوۆ نازارىنا السا ەكەن ، – دەيدى.

مەكتەپ الدىنا اقىننىڭ ءبيۋستىن قويۋ جونىندە 2019 جىلى ءبىلىم باسقارماسىنىڭ ەكس-باسشىسى ءانۋار جانعوزين Facebook الەۋمەت­تىك جەلىسىندە مەكتەپكە ەسىمى بەرىلگەن تۇلعاعا ارنالعان ءمۇسىندى ورناتۋعا 2020 جىلى قارجى بولىنەتىندىگىن حابارلاعان ەكەن. الايدا ات­تاي ەكى جىل وتسە دە عالي ورمانوۆتىڭ ءبيۋستىن ورناتۋ بىلاي تۇرسىن، سول تۋرالى اقپارات تا جارىققا شىقپاعان. بۇل دا ءبىز ءۇشىن تۇسىنىكسىز جاعداي. استانانىڭ تورىندەگى اقىن اتىنداعى مەكتەپكە ەسكەرتكىش ءمۇسىن ەمەس، ءتىپتى بيۋست قويا الماۋ، «قويامىز» دەپ اقپارات بەرگەن سوڭ، ەكى جىل ىشىندە ونى ورىنداي الماۋ – ەلىمىزدىڭ استاناسى ءۇشىن ۇيات­تى شارۋا. ەلوردادا بەكىتىلگەن ماسەلە ورىندالماي جاتسا، باسقا ايماقتارداعى جاعداي تۋرالى ايتۋدىڭ ءوزى ابەستىك. ءار اقپارات كوزىنەن ءبىر جىلت ەتىپ، «ادىلەت­تى قازاقستان قۇرامىز» دەگەن ۇران ءجيى ايتىلىپ ءجۇر. سەنگىڭ-اق كەلەدى، بىراق ەلىمىزدىڭ قاق ورتاسىنداعى، سول ادىلەت­تى قازاقستان قۇرۋشىلاردىڭ جانىندا مىنانداي جاعداي بولىپ جاتقاندا، سەنىمگە سەلكەۋ تۇسەرى انىق. قاشاندا ۇلت­تىڭ رۋحاني كەلبەتى مادەنيەتىنەن كورىنەدى. ال مادەنيەت­تى جاساۋشىلارعا قۇرمەت كورسەتە الماۋ – ۇرپاعى ءۇشىن ابىرويلى ءىس ەمەس. وسىعان دەيىن وتىز جىل بويى ەكونوميكانى العا تارتىپ، سول ءۇشىن جۇمىس ىستەيمىز دەپ ۇراندات­تىق. ودان كوگەرگەنىمىز شامالى. ال ەندى ناعىز ادەبيەتكە، مادەنيەتكە كوڭىل بولەتىن ۋاقىت­تا ءدال وسىنداي ورىندالماعان ۋادەلەردى كورىپ، قىنجىلاتىنىڭ راس. وتكەن وتىز جىلدىڭ شيرەگىندە اكىم اۋىسسا، ەكس-اكىمنىڭ جاساقتاعان كومانداسى قوسا اۋىساتىنىنا ەتىمىز ۇيرەنىپ تە كەت­تى. ايتسە دە، قازىرگى اكىم التاي كولگىنوۆ وسى ماسەلەگە نازار اۋدارىپ، ءىستى سوڭىنا دەيىن جەتكىزسە دەيمىز.  ءدال قازىر ساياسي ناۋقان، سايلاۋ الدى ۇگىت-ناسيحات­تىڭ قىزىپ تۇرعان شاعى. ادەت­تەگىدەي ۋادەنىڭ استىندا قالامىز. ەرتەڭ-اق قارىشتاپ دامىپ، الدىڭعى قاتارلى ەلدەردىڭ ءبىرى بولىپ كەتەتىندەي كۇي كەشەمىز. بىراق ءبىر بۇرىشتان سىعالاپ، شەنەۋنىكتەردىڭ ورىندالماي قالعان ۋادەلەرى قىلتيادى دا تۇرادى. سول قىلتيعاندار قاپتاسا، ادىلەت­تى قازاقستانعا كىم سەنەدى؟ كەلمەسكە كەتكەندەردىڭ الدىندا ۋادەسىن ورىنداي الماعاندار، بولاشاق الدىندا نە ىستەي الادى؟

Abai.kz