رەسەيلىك ءدىنتانۋشى ءشامىل الياۋتدينوۆ استانادا وتەتىن فورۋمعا كەلمەيتىن بولدى. بۇل تۋرالى ول الەۋمەتتىك جەلىدە مالىمدەدى، دەپ حابارلايدى Abai.kz پورتالى Ulysmedia.kz-عا سىلتەمە جاساپ.

«قۇرمەتتى قازاقستاندىقتار! 4 جەلتوقساندا استانادا وتەتىن ترەنينگكە مەن بارمايمىن. قوسىمشا نارازىلىق تۋعىزىپ، ۇيىمداستىرۋشىلار مەن سپيكەرلەرگە پروبلەما تاۋىپ بەرگىم كەلمەيدى. ال وسىنى ۇيىمداستىرىپ، ماعان قارسى اقپاراتتى ءبىرىنشى تاراتقاندار، وسىناۋ وتىرىك پەن ايىپتاۋدى ۇيىمداستىرۋشىلار – سىزدەرگە قۇداي سوت! قازىرگى ۋاقىتتا ءىستىڭ ءمان-جايىن انىقتاۋدىڭ... جوق... سول سەبەپتى گازعا باسامىز»، - دەيدى الياۋتدينوۆ.

ەسكە سالا كەتەيىك، بىرنەشە كۇن بۇرىن الەۋمەتتىك جەلىدە رەسەيلىك ءدىنتانۋشى ءشامىل الياۋتدينوۆتىڭ استاناداعى فورۋمعا قاتىسۋى قىزۋ تالقىعا تۇسكەن بولاتىن. 4 جەلتوقساندا استانادا «جاڭا شىنايىلىق» اتتى ۇلكەن فورۋم وتەدى. الدىن الا تاراعان اقپاراتقا سايكەس، ول فورۋمعا بەلگىلى قازاقستاندىق كاسىپكەر مارعۇلان سەيسەمباي، بلوگەر بەيبىت الىبەكوۆ پەن رەسەيلىك ءدىنتانۋشى ءشامىل الياۋتدينوۆ قاتىسپاق. الەۋمەتتىك جەلى قولدانۋشىلارى الياۋتدينوۆتىڭ ۋكرايناداعى سوعىستى قولداپ سويلەگەن ءسوزىن ءبولىسىپ، فورۋمعا ونىڭ قاتىسۋىنا جول بەرمەۋ كەرەك دەپ پىكىر ايتقان.

بۇعان دەيىن سوعىستى قولدايتىن رەسەيلىك ءانشى پولينا گاگارينانىڭ الماتىداعى كونتسەرتى كوپشىلىكتىڭ سىنىنا ۇشىراپ، وتپەيتىن بولدى. ال قازاق قىزدارىن قورلايتىن ترەنينگ وتكىزبەكشى بولعان رەسەيلىك بلوگەر الەكس لەسليگە  (شىن اتى الەكساندر كيريللوۆ) قازاقستان اۋماعىنا كىرۋگە تىيىم سالىندى.

Abai.kz