«الماتى» تەلەارناسى قاڭتار وقيعاسى تۋرالى بەس سەريالى فيلم تۇسىرگەنىن حابارلادى. فيلم «قايعىلى قاڭتار: بۇلىككە دەيىن...» دەپ اتالادى.

«Almaty.tv جۋرناليستىك زەرتتەۋ جانرىنداعى بۇل اۆتورلىق فيلم الماتىداعى قاڭتار وقيعاسىنىڭ حرونولوگياسىن ەگجەي-تەگجەيلى قالپىنا كەلتىرىپ، ءار ءتۇرلى بولجامدار مەن قاۋەسەتتەن تىس، وقيعانىڭ شىن مانىندە قالاي بولعانىن كورسەتۋگە تىرىسادى»، –  دەلىنگەن حابارلامادا.

تەلەارنانىڭ حابارلاۋىنشا، بۇكىل ەل ءۇشىن ۇلكەن سىناققا اينالعان تراگەديا تۋرالى بەس ءبولىمدى ءفيلمنىڭ العاشقى بولىمىندە ەكسكليۋزيۆتى سۇحبات جانە جۇرتقا بەيمالىم فاكتىلەر بەرىلىپ، ەڭ باستىسى – قانتوگىسكە اينالعان بۇلىك پەن جاپپاي تارتىپسىزدىك حرونولوگياسى قايتا جاڭعىرتىلدى.

«كورەرمەن قاتىسۋشىلار مەن كۋاگەرلەردىڭ ايتۋى بويىنشا قايعىلى قاڭتاردىڭ قالاي باستالعانىن، نە بولعانىن، بۇلىكشىلەردىڭ اكىمدىك، اۋەجاي جانە پوليتسيا دەپارتامەنتىن قانداي ماقساتپەن باسىپ العىسى كەلگەنىن بىلەدى. جۋرناليستەرىمىز ەلدە دۇربەلەڭ بولعانى كىمگە پايدالى بولعانىن، مەملەكەت تۇتاستىعى قالاي ساقتالىپ قالعانىن ءتۇسىنۋ ءۇشىن وقيعالارعا ساراپتاما جاسادى»، – دەلىنگەن ودان ءارى حابارلامادا.

1 جەلتوقسان كۇنى «الماتى» تەلەارناسىنان «قايعىلى قاڭتار: بۇلىككە دەيىن...» ءفيلمىنىڭ ءبىرىنشى ءبولىمى كورسەتىلەدى. ءفيلمدى YouTube ارناسىنان دا كورۋگە بولادى.

Abai.kz