قازاقستاننىڭ بىرقاتار وڭىرلەرىندە اۋا-رايىنىڭ كۇرت بۇزىلۋىنا بايلانىستى 9 ايماقتا رەسپۋبليكالىق ماڭىزعا يە اۆتوجولداردىڭ جابىلعانى حابارلانعان ەدى. بۇگىن قر تجم رەسمي وكىلى رۋسلان يمانقۇلوۆ قازاقستاننىڭ 3 وڭىرىندە اۋا-رايىنىڭ قولايسىزدىعىنان 5 ادامنىڭ جوعالىپ كەتكەنىن مالىمدەدى.

«قۇتقارۋشىلار اتىراۋ وبلىسىندا، قاراعاندى مەن ۇلىتاۋ وبلىستارىندا ىزدەستىرۋ جۇمىستارىن جۇرگىزۋدە. اتىراۋ وبلىسى، قۇرمانعازى اۋدانىندا 1 قاڭتار كۇنى 50 جاستاعى ەر ازامات جوعالىپ كەتكەن. ال قاراعاندى وبلىسىنىڭ شەت اۋدانىندا 2 قاڭتار كۇنى 45 جاستاعى مالشى جوعالدى. ۇلىتاۋ وبلىسىنداعى ۇلىتاۋ اۋدانىندا 2 قاڭتاردا تاعى 3 ادام قاساقپاي اۋىلىنان بۇلماش قىستاۋىنا قاراي جولعا شىعىپ، جوعالىپ كەتتى. اۋا-رايىنىڭ قولايسىزدىعىنا بايلانىستى تىكۇشاقتاردى ۇشۋرى مۇمكىن بولماي تۇر»، - دەدى مينيسترلىكتىڭ رەسمي وكىلى.

بۇرقاسىن بوران مەن كوكتايعاققا بايلانىستى اۆتوجولداردىڭ 79 ۋچاسكەسى جابىلدى. ونىڭ 32-ءسى رەسپۋبليكالىق ماڭىزعا يە جولدار.

جولدا قالعان كولىكتەر مەن كولىك تەحنيكالارىنىڭ كەپتەلىسى كەلىسى باعىتتاردا انىقتالدى:

• استانادان شىعار جولدا، قاراعاندى وبلىسىنا قاراي 300-دەي كولىك تەحنيكاسى تۇر. ال پاۆلودار وبلىسىنا قاراي 100-گە جۋىق كولىك تەحنيكاسى جولدا. جىلىتۋ ورتالىقتارىنداادام جوق. ەۆاكۋاتسيادان باس تارتۋدا.
• پاۆلودار وبلىسىنداعى شىدەرتى ەلدىمەكەنىنەن اقمولا مەن قاراعاندى وبلىستارىنا قاراي جولدا 66 تەحنيكا تۇر. جىلىتى ورتالىقتارىندا 236 ادام، سونىڭ ىشىندە 16 بالا بار.
• قاراعاندى وبلىسىنداعى اقسۋ-ايۋلى ەلدىمەكەنىنەن استاناعا قاراي جولدا 23 كولىك تەحنيكاسى، بالقاشقا قاراي 126 تەحنيكا، تەمىرتاۋعا قاراي 17 تەحنيكا تۇر. جىلىتۋ ورتالىقتارىنا 20 ادام بارعان.
• تارازدان تۇركىستان وبلىسىنا قاراي جولدا جۇك كولىكتەرىنىڭ جۇرۋىنە تىيىم سالىنعان. 318 كولىك تەحنيكاسى تۇر. ال جەڭىل كولىكتەردىڭ جۇرۋىنە رۇقسات.
• الماتى وبلىسىنداعى ەڭبەكشىقازاق اۋدانىندا توتەنشە جاعدايلار دەپارتامەنى قىزمەتكەرلەرى تۇرگەن-بوتان اۆتوجولىندا قار كوشكىنىنە تاپ بولعان 38 جەڭىك كولىكتى قۇتقارۋ جۇمىستارىن جۇرگىزىپ جاتىر. جىلى تاماق ۇيىمداستىرىلىپ، ايەلدەر مەن بالالار ەۆاكۋاتسيالانعان.

اۋا-رايىنىڭ كۇرت بۇزىلۋىنا بايلانىستى ارنايى رەسپۋبليكالىق شتاب قۇرىلعان. وسىنداي شتابتار اباي، اقمولا، قاراعاندى، جامبىل، پاۆلودار، جەتىسۋ وبلىستارىندا دا اشىلعان.

وتكەن تاۋلىكتەر توتەنشە جاعدايلار دەپارتامەنتى قىزمەتكەرلەرى 725 ادامدى قاۋىپسىز جەرگە ەۆاكۋاتسيالاعان. ولاردىڭ 137-ءسى بالالار. 124 كولىك تەحنيكاسى قار قۇرساۋىنان شىعارىلدى. اۆتوجولداردا قار قۇرساۋىندا قالىپ قويعانداردى ەۆاكۋاتسيالاۋ جۇمىستارى ءالى دە جالعاسادى. ول ءۇشىن 200 تەحنيكا جۇمىلدىرىلعان. قۇتقارۋ جۇمىستارىنا 4163 ادام، 1343 تەحنيكا جۇمىلدىرىلعان.

Abai.kz