وتكەن جىلدىڭ اياعىندا پرەزيدەنت توقاەۆ ۇكىمەتتى سىناپ سويلەدى. قولدارىنان ءىس كەلمەيتىندەر ءوز ەرىكتەرىمەن قىزمەتتەرىنەن كەتسىن دەپ ىم-يشارا ءبىلدىردى. وسىدان كەيىن ەل-جۇرت جاڭا جىلدا ۇكىمەتتە ۇلكەن كادرلىق اۋىس-تۇيىستەر ورىن الادى دەپ كۇتتى. ازىرگە اۋىسقان 5 ءمينيستردى عانا كوردىك. ۇكىمەتتىڭ سايتى جاڭارتىلعان ۇكىمەت قۇرامىن جاريالاپتى. سوعان قاراپ، ۇكىمەت قۇرامى جاساقتالىپ قويعانعا ۇقسايدى دەپ توپشىلادىق.

ال بىلتىر پرەزيدەنتتىڭ سىنانان سوڭ «Abai.kz» اقپاراتتىق پورتالى مەن «Usbanov arnasy» بىرلەسىپ، ارنايى ساۋالناما جۇرگىزگەن ەدىك. «قاي مينيستر قىزمەتتەن كەتۋى ءتيىس» دەپ ساۋال تاستادىق.

انتي-رەيتينگ: رومان سكيالر - ەڭ جاعىمسىز مينيستر!

ساۋالنامامىزعا ۇزىن-سانى 1600 ادام قاتىستى. انتي-رەيتينگتە كوش باستاپ تۇرعان مينيسترلەر تومەندەگىدەي بولدى: ءبىرىنشى ۆيتسە-پرەمەر رومان سكليار – 618 داۋىس جينادى. ال قر قورعانىس ءمينيسترى رۋسلان جاقسىلىقوۆ – 493 داۋىسپەن ەل قارسىلىعىنا تاپ بولعان ەكىنشى مينيستر اتاندى. ۇكىمەت باسشىسى ءاليحان سمايىلوۆ انتي-رەيتينگ ۇشتىگىن تۇيىندەدى (445 داۋىس).

رەسپوندەنتتەردىڭ 46 پايىزى – «ۇكىمەت تولىق قۇرامدا تاراتىلۋى كەرەك» دەگەن نۇسقانى تاڭداعان. ال انتي-رەيتينتە ەڭ از داۋىس جيناعان مينيسترلەر: بۇرىنعى وقۋ-اعارتۋ ءمينيسترى اسحات ايماعامبەتوۆ (24 داۋىس), ەنەرگەتيكا ءمينيسترى بولات اقشولاقوۆ (45 داۋىس), عىلىم ءمينيسترى ساياسات نۇربەك (55 داۋىس) بولدى.

سونىمەن، جاڭارتىلعان ۇكىمەت قۇرامىنا ءبىر كوز جۇگىرتەيىك:

ۇكىمەت باسشىسى – ءاليحان سمايىلوۆ.

«قاندى قاڭتاردان» كەيىن، 2022 جىلدىڭ 5 قاڭتارىندا ۇكىمەتتى ۋاقىتشا تىزگىندەدى، سوسىن 11 قاڭتار كۇنى پرەمەر-مينيسترلىككە تاعايىندالعان. باقىتجان ساعىنتاەۆ پرەمەرلىگى كەزىندە قر قارجى ءمينيسترى، اسقار مامين پرەمەرلىگى كەزىندە ۆيتسە-پرەمەرلىكتى اتقارعان ادام (2018-2022 ج).

رومان سكليار – ءبىرىنشى ۆيتسە-پرەمەر.

ەكىباستۇزدان شىققان «دانەكەرلەۋشى» سكليار بۇل قىزمەتكە 2022 جىلدىڭ 11 قاڭتارىندا تاعايىندالعان. اسقار ءماميننىڭ تۇسىندا قر يندۋستريا جانە ينفراقۇرىلىمدىق دامۋ ءمينيسترى (2019 جىلى) بولعان. سول مامينمەن بىرگە ۇكىمەت باسشىسىنىڭ ورىنباسارى بولىپ 2 جىل ءجۇردى (2019-2022 ج). 2016 جىلى ماجىلىستە بولدى. 2016-دان 2019-عا دەيىن ەكى مينيسترلىكتە كىشى مينيستر قىزمەتتەرىن اتقاردى.

مۇحتار تىلەۋبەردى – ۆيتسە-پرەمەر ءھام قر سىرتقى ىستەر ءمينيسترى.

قوس قىزمەتتى قاتار ۇستاپ جۇرگەن تىلەۋبەردى – سىرتقى ىستەر مينيسترلىگىن 2019 جىلدىڭ قىركۇيەگىنەن بەرى اتقارىپ كەلەدى. 2021 جىلدىڭ قاڭتارىندا ۇكىمەت باسشىسىنىڭ ورىنباسارى قىزمەتىن تاعى مىندەتتەپ الدى. التى-جەتى مەملەكەتتە ەلشىلىك جاسادى. سىرتقى ىستەر مينيسترلىگىنە 2016 جىلى كەلدى. كەلگەندە دە ءمينيستردىڭ ءبىرىنشى ورىنباسارى بولىپ كەلدى.

ەرۇلان جاماۋباەۆ – ۆيتسە-پرەمەر جانە قر قارجى ءمينيسترى.

قوس قىزمەتتى قاتار الىپ جۇرگەن تاعى ءبىر ءداۋ. بۇرىنعى پرەمەر – اسقار ءماميننىڭ تۇسىندا مينيسترلەر ساپىندا بولعان ادام. 2018-2019 اپالىعىندا پرەزيدەنت اكىمشىلىگىندە بولدى. پرەزيدەنتكە كەڭەس ايتتى. 2020 جىلى قارجى مينيسترلىگىن تىزگىندەگەن. 2022 جىلى ۆيتسە-پرەمەرلىككە لايىق دەپ تاڭدالدى.

سەرىك جۇمانعارين – ۆيتسە-پرەمەر ءھام قر ساۋدا جانە ينتەگراتسيا ءمينيسترى.

ارىدەگى قىزمەتتەرىن اتپاساق تا، 2019 جىلدان ساپتايىق. 2019 جىلى ۇلتتىق ەكونوميكا ۆيتسە-ءمينيسترى بولدى. ەۋرازيالىق ەكونوميكالىق كوميسسيانىڭ مۇشەسى بولدى. انتيمونوپوليانى 2019-2020 جىلدارى باسقاردى. 2020-2022 جىلدارى باسەكەلەستىكتى قورعاۋ اگەنتتىگىن تىزگىندەدى. قازىرگى اتقارىپ جۇرگەن قوس بىردەي قىزمەتىنە 2022 جىلى قولى جەتتى.

التاي كولگىنوۆ – ۆيتسە-پرەمەر.

استانانىڭ ەكس-اكىمى ۇكىمەتكە بىلتىر جەلتوقساندى اۋىسىپ باردى. سىرت كوزگە ۇكىمەتتەگى «جاڭا كادر». ال ەڭبەك جولىنا كوز جۇگىرتسەك، قازاقستان ساياساتىنا كەشە كەلگەن ادام ەمەس. 2016 جىلدان 2019 جىلعا دەيىن باتىس قازاقستان وبلىسىن باسقاردى. 2019 جىلدان 2022 جىلدىڭ سوڭىنا دەيىن استانا اكىمدىگىن تىزگىندەدى.

عالىمجان قويشىباەۆ – ۆيتسە-پرەمەر، ۇكىمەت اپپاراتىنىڭ باسشىسى.

قويشىباەۆ تا سىرتقى ىستەر مينيسترلىگى سالاسىنىڭ ادامى. ليتۆا، لاتۆيا، ەستونيا فينليانديا سەكىلدى مەملەكەتتەردە ەلشى بولعان. 2016 جىلى ءسىم-دە كىشى مينيستر بولىپ تاعايىندالدى. 2019 جىلى ۇكىمەت كەڭسەسىن باسقاردى. بيىل باعى جانىپ، ۆيتسە-پرەمەرلىككە تاعايىندالدى. سۋبەكتيۆتى تۇردە «جاڭا تاعايىندالعان كادرلەردىڭ» ءبىرى.

پرەمەر-مينيستر مەن ونىڭ ورىنباسارلارىن تۇگەندەپ بولدىق. ەندى ۇكىمەتتىڭ وزگە مۇشەلەرىنە قاراي ويىسايىق...

رۋسلان جاقسىلىقوۆ – قر قورعانىس ءمينيسترى.

جاقسىلىقوۆ اسكەري سالانىڭ ادامى. پەداگوگيكا عىلىمدارىنىڭ كانديداتى. گەنەرال-پولكوۆنيك. مينيسترلىكتى 2022 جىلدىڭ قاڭتارىندا تىزگىندەگەن. جاقسىلىقوۆتىڭ الدىنداعى مينيستر قازىر قاماۋدا (مۇرات بەكتانوۆ). «قارالى قاڭتار» وقيعاسى كەزىندە «سالعىرتتىق جاسادى» دەپ سوتتالىپ جاتىر.

مارات احمەتجانوۆ – قر ىشكى ىستەر ءمينيسترى.

احمەتجانوۆ تا گەنەرال-پولكوۆنيك. مينيسترلىكتى 2022 جىلدىڭ اقپانىندا قولىنا العان. سىبايلاس جەمقورلىققا قارسى اگەنتتىكتى باسقارعان (2021 ج). وعان دەيىن باس پروكۋروردىڭ ورىنباسارى بولعان.

دارحان قىدىرالى – قر اقپارات جانە قوعامدىق دامۋ ءمينيسترى.

بۇل قىزمەتكە 2022 جىلدىڭ قىركۇيەگىندە تاعايىندالعان. 2014-2022 جىلدارى حالىقارالىق تۇركى اكادەمياسىن باسقارعان.

ەربول قاراشوكەەۆ – قر اۋىل شارۋاشىلىق ءمينيسترى.

ۇكىمەتتەگى سىندى كوپ ەستيتىن مينيسترلەردىڭ ءبىرى. بۇل قىزمەتكە 2021 جىلدىڭ قىركۇيەگىندە تاعايىندالعان. جۇتتى دا، قۋاڭشىلىقتى دا وسى ءمينيستردىڭ تۇسىندا كوردى، شارۋالار. اۋىل شارۋاشىلىعىنا قارجى مينيسترلىگىنەن ويىسىپ بارعان ادام.

ازامات ەسقاراەۆ – قر ادىلەت ءمينيسترى.

ەسقاراەۆ كۇنى كەشە عانا تاعايىندالعان سۋ جاڭا مينيسترلەردىڭ ءبىرى. 2000-شى جىلدان باستاپ وسى سالادى قىزمەت ەتكەن. 2019-2023 جىلدارى ۇكىمەت باسشىسىنىڭ كەڭسەسىندە زاڭ ءبولىمىن باسقارعان.

ساياسات نۇربەك – عىلىم جانە جوعارعى ءبىلىم ءمينيسترى.

ساياسات مىرزانىڭ مينيستر بولعانىنا سالىستىرمالى تۇردە كوپ بولا قويعان جوق. 2022 جىلدىڭ جازىندا بۇرىنعى قر ءبىلىم جانە عىلىم مينيسترلىگى ەكىگە ءبولىندى. سول كەزدە عىلىم مەن جوعارعى بىلىمگە جاۋاپتى بولىپ تاعايىندالعان. 2022 جىلدىڭ اقپانىندا بيلىك پارتياسىنان ماجىلىسكە ءوتىپ، دەپۋتاتتىق قىزمەت اتقارعان.

اجار عينيات – قر دەنساۋلىق ساقتاۋ ءمينيسترى.

«قاندى قاڭتاردان» كەيىن مينيسترلىك تىزگىندەگەن ادامداردىڭ ءبىرى. اتالعان مينيسترلىكتە ءارتۇرلى باسشىلىق قىزمەتتەردى اتقارىپ ءجۇرىپ، سمايىلوۆ كومانداسىنان ورىن بۇيىردى.

تامارا دۇيسەنوۆا – قر ەڭبەك جانە حالىقتى الەۋمەتتىك قورعاۋ ءمينيسترى.

ۇكىمەتتەگى كونەكوزدەردىڭ ءبىرى. ەسكى ۇكىمەت تۇگىلى، ەكس-پرەزيدەنتتىڭ تۇسىندا سان ءتۇرلى باسشىلىق قىزمەتتەردى اتقارعان ادام. وبلىس، قالا، اۋدانداردى اكىم ورىنباسارلىعىن كوردى. بىرنەشە مينيسترلىكتە باسشى قىزمەتتەرىندە بولدى. 2020-2022 جىلدارى پرەزيدەنت كەڭەسشىلىگىندە ءجۇردى. ءسويتىپ، 2022 جىلدىڭ ساۋىرىندە ۇكىمەتكە قايتىپ ورالدى.

مارات قاراباەۆ – قر يندۋستريا جانە ينفراقۇرىلىمدىق دامۋ ءمينيسترى.

سۋ جاڭا تاعايىندالعان كادر. 1987 جىلى تۋعان قاراباەۆ - وزبەكستاننان ورالعان قانداس ازامات. 2021 جىلدان بەرى ءوزى باسقاراتىن مينيسترلىكتە ۆيتسە-مينيستر بولعان.

اسحات ورالوۆ – قر مادەنيەت جانە سپورت ءمينيسترى.

32 جاستاعى ورالوۆ مىرزا دا سۋ جاڭا تاعايىندالعان مينيسترلەردىڭ ءبىرى. 2021-2022 جىلدارى استانا قالاسى اكىمىنىڭ ورىنباسارى بولعان. «امانات» پارتياسىنىڭ جاۋاپتى حاتشىسى قىزمەتىندە ءجۇردى.

عاني بەيسەمباەۆ – قر وقۋ-اعارتۋ ءمينيسترى.

جاڭا مينيستر. بۇل كىسى بىلتىرعى جىلدىڭ ناۋرىزىنان بەرى ۆيتسە-مينيستر. بىلتىر ءبىلىم مينيسترلىگىن ەكىگە بولگەندە دە قىزمەتىن ساقتاپ قالعان.  بىر انىعى - عاني مىرزا دا بۇل سالاعا كوشەدەن كەپ قوسىلعان جوق. مينيسترلىككە دەيىن ۇزاق جىلدار وقۋ-ءبىلىم سالاسىندا جۇمىس ىستەدى. «قازاق ءتىلى» وقۋلىعى مەن «قازاق ادەبيەتى» حرەستوماتياسىن ازىرلەۋشىلەردىڭ ءبىرى بولعان.

يۋري يلين – قر توتەنشە جاعدايلار ءمينيسترى.

رەسەيدىڭ جاڭاسىبىرىندە تۋعان بۇل كىسى دە قازاقستان ساياساتىنىڭ كونەدەن كەلە جاتقان مينيسترلەرىنىڭ ءبىرى. اتالعان مينيسترلىكتى 2020 جىلى تىزگىندەگەن. وعان دەيىن قر ىشكى ىستەر ءمينيسترىنىڭ ورىنباسارى بولدى.

الىبەك قۋانتىروۆ – قر ۇلتتىق ەكونوميكا ءمينيسترى.

بۇل قىزمەتكە 2022 جىلدىڭ قاڭتارىندا تاعايىندالعان. 2019-2021 جىلدارى ەلباسى كەڭەسىن باسقارعان. 2021 جىلى كىشى مينيسترلىككە اۋىسىپ، «قاندى قاڭتاردان» كەيىن مينيسترلىك تىزگىندەگەن.

باعدات مۋسين – قر تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى.

اتالعان مينيسترلىككە 2020 جىلى كەلىپ جايعاسقان. «قارالى قاڭتاردان» كەيىن دە قىزمەتىن ساقتاپ قالدى. ۇكىمەتتەگى سىندى كوپ ەستيتىن مينيسترلەردىڭ ءبىرى.

ءزۇلفيا سۇلەيمەنوۆا – قر ەكولوگيا جانە تابيعي رەسۋرستار ءمينيسترى.

سۋ جاڭا مينيستر. جاس مينيستر. 1990 جىلى تۋعان. 2021-2022 جىلدارى ماجىلىستە دەپۋتات بولعان. 2022 جىلى ءوزى باسقاراتىن مينيسترلىكتە كىشى مينيستر قىزمەتىن اتقاردى.

بولات اقشولاقوۆ – قر ەنەرگەتيكا ءمينيسترى.

2022 جىلدىڭ قاڭتارىندا مينيستر اتانعان اقشولاقوۆ بيىل دا قىزمەتىن ساقتاپ قالدى. تىلشىلەر قاۋىمى بۇل كىسىدەن وزگەنى ەمەس، اۋەلى اەس قۇرىلىسى جايىن سۇراۋعا ماشىقتانان. ويتكەنى، قازاقستان اەس-ىنە بىردەن-ءبىر جاۋاپتى ادام – وسى مينيستر اقشولاقوۆ. قر ەنەرگەتيكا مينيسترلىگىندە ۆيتسە-مينيسترلىك قىزمەتتى 2017-2019 جىلدارى اتقارعان.

ازىرگە ءبىز كورگەن ۇكىمەت قۇرامى وسىلاي بولىپ تۇر. اۋىسقانى 5 مينيستر. قالعاندارى ءوز قىزمەتتەرىن ساقتاپ قالدى.

نۇرگەلدى ابدىعانيۇلى

Abai.kz