قازاقتى مال سوڭىندا سالپاقتاتۋ ءۇردىسى ءالى جالعاسىپ كەلەدى. بىراق سول سالپاقتاۋشىلاردىڭ ەكى كەمشىلىگى بار. ءبىرىنشىسى – مالىن ءوزى باقپايدى. ەكىنشىسى – كوكتەمە، كۇزەۋ مەن جايلاۋ جانە قىستاما ءۇردىسى ساقتالماۋدا. تەك وزىنە تيسەلى جەردە جىل سايىن توپىرلاتىپ مال جايۋ كەڭ ەتەك الدى.

بۇدان قۇتىلۋ جولى قانداي؟ ەل بولىپ سونى ويلاستىرايىق. ەگىنشىلىك جەرلەردىڭ 90 پايىزى وزگە ۇلتتارعا تيسەلى. قازاق تەك ءوز اتا-بابا جەرىنىڭ 10 پايىزىنا عانا ەگىن سالۋدا. سۋارىلمالى ەگىنشىلىكتى وڭتۇستىكتەگى اعايىندار عانا ساقتاپ قالىپ وتىر. قالعان جەرلەردەگىلەر جەردى تىڭايتاتىن قوي-ەشكىنى قۇرتىپ، تەك زەڭگى بابا تۇقىمىن وسىرۋگە دەن قويدى. سيىر جاپاسى قالعان جەرگە ءشوپ ونشا وسپەيدى. ول تەزەك تەرىلمەيدى. كەرەك دەسەڭىز بۇزاۋ قوڭدانسىن دەگەن نيەتتە سيىر دا ساۋىلمايتىن بولدى. ماسقارا!

90 پايىز ەگىستىك جانە سۋارىلمالى جەردى يگەرۋشى وزگە ۇلتتار بىرىڭعاي دياسپورا بولىپ قونىستانعان. وڭتۇستىكتەكگى اعايىنداردى سولتۇستىك پەن شىعىسقا شاقىرادى. بىراق جەر بەرىپ، تەحنيكامەن مويىنسەرىكتىك جاساۋعا سەپتەسىپ، 25 جىلعا دەيىن سالىقتان بوساتۋ، 12 جىلدان كەيىن تولەيتىن پايىزسىز نەسيە بەرۋ ءسوز ەتىلمەيدى. كوشىپ كەل، كوشىپ كەل دەپ جەر-جەردە قاقساۋى بيلىك ادەت ەتتى.

قۋاڭ جەردەگى تۇرمىسى تومەن باي اۋىلداسىنا جالشى بولعان قازاقتارعا دا جىلى جاي مەن جەر استى سۋىمەن سۋعارىلاتىن ەگىنشىلىكپەن اينالىسۋ ءۇشىن ۇكىمەت قولداۋى كەرەك. ولاردى 25 جىلعا دەيىن سالىقتان بوساتۋ، 12 جىلدان كەيىن تولەيتىن پايىزسىز نەسيە بەرۋ وسى جولى ءماجىلىس دوداسىنا تۇسەتىن پارتيالار تاراپىنان قولعا الىنىپ، باعدارلامالارىنا ەنەدى دەگەن ۇمىتتەمىز.

ءابىل-سەرىك الىاكبار

Abai.kz