ەكس-پرەزيدەنتتىڭ قۇداسى، بەلگىلى وليگارح، قازىر ءىستى بولعان قايرات بورانباەۆتى قولداۋعا جان-جاقتان تانىمال تۇلعالار جينالا باستادى. تاياۋدا استاناعا كەلگەن بەلگىلى رەسەيلىك كينورەجيسسەر جانە پروديۋسەر تيمۋر بەكمامبەتوۆ دوسى قايرات بورانباەۆتىڭ سوتىنا قاتىسىپ، وعان قولداۋ ءبىلدىرۋ ءۇشىن كەلگەنىن ايتقان.

رەجيسسەر «قازاقستاننىڭ قۇقىقتىق تەتىكتەرىمەن تانىس ەمەسپىن»،- دەيدى، دەگەنمەن ايىپتالۋشىنىڭ سوت پروتسەسى اياقتالعانشا قاماۋدا وتىرعانى دۇرىس ەمەس دەپ سانايدى.

ء"بىز دوسپىز. دۇنيەنىڭ تىنىش كەزىندە، جاقسى ۋاقىت وتكىزدىك. امەريكادا، رەسەيدە كەزدەسكەنبىز. ەندى ونىڭ باسىنا قيىندىق تۇسكەندە مەنىڭ «جوق» دەگەنىم جارامايدى. ءبىزدىڭ دوس بولعانىمىزعا كوپ جىلدار ءوتتى. ءتىپتى قاي ۋاقىتتان بەرى ەكەنى ەسىمدە جوق. مۇمكىن 2005 جىلدان بەرى شىعار، بىراق 15 جىلداي دوس بولعانىمىز انىق. جالپى، ادامدى باس بوستاندىعىنان ايىرۋ دۇرىس ەمەس»،-دەيدى ول.

بەكمامبەتوۆتىڭ ويىنشا، «سوت پروتسەستى كاسىبي جۇرگىزبەگەن».

قازاقستاندىق قالتالىنى سوت وتىرىسىندا قولداۋ ءۇشىن بەلگىلى مۋزىكانت، تانىمال A’Studio توبىنىڭ نەگىزىن قالاۋشى بايعالي سەركەباەۆ پەن رەسەيدەگى العاشقى McDonald’s مەيرامحاناسىنىڭ نەگىزىن قالاعان كاسىپكەر حامزان حاسبولاتوۆ دا ارنايى كەلگەن.

سەركەباەۆتىڭ ايتۋىنشا، ول بورانباەۆتى سوتتا جاقتاپ سويلەۋدى ۇيعارعان. بىراق وعان رۇحسات بەرىلمەپتى.

«مەن قايرات بورانباەۆپەن جيىرما جىلدان استام دوسپىن، ونىڭ وتباسىن بىلەمىن. قايراتتى ۇلكەن مەتسەنات، كوپتەگەن ونەر ادامدارىنا، سپورتقا قولداۋ كورسەتەتىن ادام رەتىندە تانيمىن. ونىڭ قازاقستان پاراليمپيادالىق سپورتشىلاردى قولداۋداعى ەڭبەگىن ءبارىمىز جاقسى بىلەمىز. مەن ونىڭ ادامدارعا قانشالىقتى يگى ىستەر جاساعانىن بىلەمىن. ونىڭ بىرەۋگە كومەكتەسپەگەن ءبىر كۇنى دە بولعان ەمەس»،-دەدى بايعالي سەركەباەۆ.

A’Studio جەتەكشىسى دوسىن قولداۋعا ءوز قالاۋىمەن كەلگەنىن جەتكىزدى. ال حامزان حاسبولاتوۆ بورانباەۆتى «ارقاشان جاڭاشىلدىق اكەلۋگە قۇمار، جاۋاپتى، ادال ءارى ادەپتى» دەپ سيپاتتايدى.

ايتا كەتەيىك، وليگارح قايرات بورانباەۆ 2022 جىلعى 17 ناۋرىزدا كۆازيمەملەكەتتىك سەكتوردا اسا ءىرى مولشەردە مەملەكەتتىك قارجىنى ۇرلادى دەگەن كۇدىكپەن ۋاقىتشا تەرگەۋ يزولياتورىنا قامالدى. 30 قىركۇيەكتە تەرگەۋ جۇمىستارى اياقتالدى.

30 جەلتوقساندا استاناداعى  №2 سارىارقا اۋداندىق سوتىندا كاسپكەردىڭ ءىسى بويىنشا سوت پروتسەسى باستالدى. بۇعان دەيىن پروكۋرور قىلمىستىق جولمەن الىنعان اقشالاي قاراجاتتى زاڭداستىرۋ ماقساتىندا بورانباەۆ پەن نوحانوۆ "ازيا گازچۋندجا" جشس-نەن 4,8 ملرد تەڭگەگە جۋىق اقشانى شىعارعانىن ايتقان بولاتىن.

كاسىپكەر قاماۋعا الىنعاننان كەيىن قازاقستانداعى McDonald 's تاماقتانۋ جەلىسى جابىلدى. بىراق رەسمي تۇلعالار «تاماقتانۋ جەلىسىنىڭ جابىلۋى قايرات بورانباەۆتىڭ ىسىنە ەش قاتىسى جوق»،- دەپ مالىمدەدى.

قايرات بورانباەۆ – داريعا نازارباەۆانىڭ بۇرىنعى كەلىنى ءاليما بورانباەۆانىڭ اكەسى. بورانباەۆتىڭ اتى قازاقستانداعى ءارتۇرلى سالاداعى 30-عا جۋىق كومپانيامەن بايلانىستىرىلادى. كاسىپكەردىڭ اكتيۆتەرى اراسىندا Esentai Mall ساۋدا ورتالىعى، "المالى" جانە «Esentai Tower» بيزنەس-ورتالىعى، الماتى تاۋ بوكتەرىندە سالىنىپ جاتقان قوناق ۇيلەر مەن فيتنەس-ورتالىقتار، ونەركاسىپتىك كاسىپورىندار جانە ت.ب. بار. بورانباەۆ قازاقستاننىڭ ەڭ باي 50 كاسىپكەرىنىڭ ىشىندە 14-ءشى ورىندا تۇر. ونىڭ 2021 جىلعى بايلىعى 590 ميلليون دوللار بولدى.

Abai.kz