الماتى قالاسىنىڭ جوعارى وقۋ ورىندارىندا 1 شىلدەدەن باستاپ كۇشىنە ەنەتىن قازاقستان رەسپۋبليكاسىنىڭ جاڭا كونستيتۋتسياسىنا ارنالعان اقپاراتتىق-ءتۇسىندىرۋ ءىس-شارالارىنىڭ سەرياسى ءوتتى. ءىس-شارالار ستۋدەنتتەردى، وقىتۋشىلاردى جانە جاس عالىمداردى بىرىكتىردى.

22–30 ماۋسىم ارالىعىندا قالانىڭ جەتەكشى جوعارى وقۋ ورىندارىنىڭ بازاسىندا 13 دوڭگەلەك ۇستەل، عىلىمي-پراكتيكالىق سەمينار، ساراپتامالىق پىكىرتالاس، ءدارىس جانە اشىق كەزدەسۋ ۇيىمداستىرىلدى. ءىس-شارالارعا پروفەسسورلىق-وقىتۋشىلىق قۇرام، جاس عالىمدار، زاڭگەرلەر مەن ستۋدەنتتەر قاتىستى. كەزدەسۋلەر بارىسىندا كونستيتۋتسيانىڭ جاڭا نورمالارى، قۇقىقتىق مەملەكەت قاعيداتتارى، ازاماتتىق جاۋاپكەرشىلىك جانە جاستاردىڭ زاماناۋي قازاقستاننىڭ دامۋىنا قوساتىن ۇلەسى تالقىلاندى.

ءىس-شارالار م.تىنىشپاەۆ اتىنداعى ALT ۋنيۆەرسيتەتىندە، Narxoz ۋنيۆەرسيتەتىندە، قازاق ۇلتتىق قىزدار پەداگوگيكالىق ۋنيۆەرسيتەتىندە، قوناەۆ ۋنيۆەرسيتەتىندە، ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىندە، قۇرمانعازى اتىنداعى قازاق ۇلتتىق كونسەرۆاتورياسىندا، سانكت-پەتەربۋرگ گۋمانيتارلىق كاسىپوداقتار ۋنيۆەرسيتەتىنىڭ الماتى فيليالىندا، الماتى تەحنولوگيالىق ۋنيۆەرسيتەتىندە جانە حالىقارالىق اقپاراتتىق تەحنولوگيالار ۋنيۆەرسيتەتىندە ءوتتى.

كەزدەسۋلەر بارىسىندا كونستيتۋتسيانىڭ ءاربىر ازامات ءۇشىن پراكتيكالىق ماڭىزىنا، قۇقىقتىق مادەنيەتتى قالىپتاستىرۋعا، زاڭعا قۇرمەت كورسەتۋگە جانە جاستاردىڭ بەلسەندى ازاماتتىق ۇستانىمىن دامىتۋعا ەرەكشە نازار اۋدارىلدى.

«قازاقستان رەسپۋبليكاسىنىڭ كونستيتۋتسياسى جاستارعا ساپالى ءبىلىم الۋعا، ەڭبەك ەتۋگە، كاسىپكەرلىكپەن اينالىسۋعا جانە قوعامدىق ومىرگە بەلسەندى قاتىسۋعا كەڭ مۇمكىندىك بەرەدى. بۇگىندە مەملەكەت جاستاردىڭ الەۋەتىن جۇزەگە اسىرۋ ءۇشىن بارلىق قاجەتتى جاعدايدى جاساپ وتىر. الايدا كەز كەلگەن قۇقىق ۇلكەن جاۋاپكەرشىلىكپەن قاتار جۇرەدى. زاڭدى قۇرمەتتەۋ، ازاماتتىق ۇستانىمدى قالىپتاستىرۋ جانە ەلدىڭ دامۋىنا ۇلەس قوسۋ – ءاربىر جاستىڭ باستى مىندەتى»، – دەپ اتاپ ءوتتى ولجاس اليموۆ، قازاقستان-بريتان تەحنيكالىق ۋنيۆەرسيتەتى زاڭ دەپارتامەنتىنىڭ ديرەكتورى، «ادىلەت» جوعارى قۇقىق مەكتەبىنىڭ اعا وقىتۋشىسى.

قازاق ۇلتتىق قىزدار پەداگوگيكالىق ۋنيۆەرسيتەتىنىڭ حالىقارالىق ىنتىماقتاستىق ءبولىمىنىڭ باسشىسى سالتانات دجاكۋباەۆانىڭ ايتۋىنشا، قۇقىقتىق مەملەكەتتى قالىپتاستىرۋ جاستاردىڭ بەلسەندى قاتىسۋىنسىز مۇمكىن ەمەس.

«بەلسەندى ازاماتتىق قوعام ءوز قۇقىقتارىن بىلەتىن، زاڭدى قۇرمەتتەيتىن جانە ەلدىڭ دامۋىنا بەيجاي قارامايتىن ازاماتتاردان قالىپتاسادى. سوندىقتان جاستار ءۇشىن اشىق ديالوگ الاڭدارىن قۇرىپ، ولاردى قوعامدىق ومىرگە كەڭىنەن تارتۋ اسا ماڭىزدى»، – دەدى ول.

ۇيىمداستىرۋشىلاردىڭ ايتۋىنشا، وتكىزىلگەن ءىس-شارالار ستۋدەنتتەردىڭ كونستيتۋتسيانىڭ جاڭا نورمالارىنىڭ پراكتيكالىق ماڭىزىن تەرەڭىرەك تۇسىنۋىنە، ازاماتتاردىڭ قۇقىقتارىن قورعاۋ، زاڭ ۇستەمدىگى قاعيداتتارى، ازاماتتىق جاۋاپكەرشىلىك جانە جاستاردىڭ قوعامدىق ومىرگە قاتىسۋى ماسەلەلەرىن جان-جاقتى تالقىلاۋىنا مۇمكىندىك بەردى.

كەزدەسۋلەر بارىسىندا «زاڭ مەن ءتارتىپ» قاعيداتىنا، ازاماتتىق قوعامدى دامىتۋعا، جاستار باستامالارىن قولداۋعا، ۆولونتەرلىكتى دامىتۋعا، ەكولوگيالىق مادەنيەتتى قالىپتاستىرۋعا جانە مەملەكەتتىك رامىزدەرگە قۇرمەت كورسەتۋگە ەرەكشە كوڭىل ءبولىندى.

قازاقستان رەسپۋبليكاسى كونستيتۋتسياسىنىڭ نەگىزگى قاعيداتتارىن كەڭىنەن ناسيحاتتاۋ جۇمىستارى الداعى ۋاقىتتا دا جالعاسادى.
10 شىلدەگە دەيىن الماتى قالاسىنىڭ جوعارى وقۋ ورىندارى مەن جاستار كەڭىستىكتەرىندە جاستاردىڭ قۇقىقتىق ساۋاتتىلىعىن ارتتىرۋعا جانە كونستيتۋتسيالىق قۇندىلىقتاردى نىعايتۋعا باعىتتالعان تاعى ونعا جۋىق اقپاراتتىق-ءتۇسىندىرۋ ءىس-شاراسىن وتكىزۋ جوسپارلانعان.

Abai.kz