ۇكىمەت باسشىسى ءاليحان سمايىلوۆ قازاقستانداعى ينتەرنەت ساپاسىنىڭ ناشارلىعىن ايتىپ، تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسينگە ەسكەرتۋ جاسادى.

"باعدات باتىربەكۇلى، قازاقستاندىقتاردىڭ ساپاسىز ينتەرنەت پەن ۇيالى بايلانىسپەن قامتۋعا قاتىستى شاعىمىن كورىپ وتىرسىز. ءتىپتى، ءىرى قالالاردا دا ساپالى بايلانىس بولمايدى. قازىر ءبارىن ۇيالى تەلەفوننىڭ كومەگىمەن ىستەۋگە بولادى. بىراق كەيدە ينتەرنەتتىڭ بولماۋىنا بايلانىستى ونى دا ىستەۋ مۇمكىن ەمەس.

بۇل ماسەلەنى شەشۋ كەرەك. مەملەكەت باسشىسىنىڭ تاپسىرماسى بويىنشا ساپالى ۇيالى بايلانىسپەن جانە ينتەرنەتپەن قامتاماسىز ەتۋ بارلىق قالالار مەن اۋدان ورتالىقتارىن، سونداي-اق رەسپۋبليكالىق جانە نەگىزگى وبلىستىق اۆتوجولداردى قامتۋى ءتيىس. مينيسترلىك ۇيالى بايلانىس پەن ينتەرنەتتىڭ قامتىلۋىنا تالداۋ جۇرگىزۋى قاجەت. "قولجەتىمدى ينتەرنەت" ۇلتتىق جوباسى اياسىندا قاجەتتى شارالار قابىلدانۋى ءتيىس", - دەدى ءاليحان سمايىلوۆ.

پرەمەر-مينيستر ينتەرنەت ماسەلەسىنە بايلانىستى اتقارىلار جۇمىستار 2027 جىلى اياقتالۋى قاجەت ەكەنىن ەسكە سالدى.

ايتا كەتسەك، بۇعان دەيىن مينيستر باعدات مۋسين ەلىمىزدەگى ينتەرنەت ساپاسىنا قاتىستى ماسەلەلەردىڭ نەدەن تۋىنداپ وتىرعانىنا تۇسىنىك بەرگەن. ونىڭ ايتۋىنشا، ينتەرنەتتى پايدالانۋشىلار سانى مەن ولاردىڭ ينتەرنەتتە وتكىزەتىن ۋاقىتى دا ارتىپ كەلەدى. بۇل ينفراقۇرىلىمدىق كوممۋنيكاتسيالارعا جۇكتەمەنى ارتتىرادى.

"ينتەرنەتتىڭ ساپاسى نەگە تومەن ەكەنى تۋرالى كوپتەگەن شاعىم بار. ءبىز مۇنى مويىندايمىز. بىراق كەيبىر فاكتورلارعا توقتالعىم كەلەدى. مىسالى، TikTok, YouTube جانە باسقالارى بار. ولار تولىعىمەن قولدانىلادى. كۇندەلىكتى ومىردە تاكسي جۇرگىزۋشىلەرى دە باعدارشامدا تۇرعان كەزدە تەلەفوندارىنان ۆيدەو قارايدى. ەكونوميكانىڭ باسقا سالالارىندا دا ينتەرنەت قولدانىلادى. وسىعان بايلانىستى ينتەرنەت-ترافيكتى پايدالانۋ دا ايتارلىقتاي ءوسىپ بارادى. پاندەميا كەزىنەن باستاپ بۇل كورسەتكىش 800 پەتابايتقا جەتتى", - دەگەن ەدى باعدات مۋسين.

حالىقارالىق تەلەكوممۋنيكاتسيا سالاسىندا ITY ۇيىمىنىڭ دەرەگىنشە، بىلتىر الەم بويىنشا ينتەرنەتتى پايدالاناتىندار سانى 4,9 ميللياردتان اسقان.

Abai.kz