سەنبى كۇنى ءماجىلىس دەپۋتاتتىعىنا ۇمىتكەر «بايتاق» جاسىلدار پارتياسىنىڭ سيەزى ءوتىپ، جيىننىڭ ارتى داۋعا اينالدى. ازاتتىقتىڭ مالىمەتىنشە، اتىراۋدان كەلگەن دەلەگات مارال كوشەنوۆ كانديداتتار تىزىمىنەن الىنىپ تاستالعان. ونىڭ ورنىنا ءماجىلىستىڭ بۇرىنعى دەپۋتاتى يراك ەلەكەەۆتىڭ ۇلى ەركىن ەلەكەەۆ قوسىلىپتى. بىراق ۇمىتكەر ءوزىنىڭ وڭىرلەردە وتكىزىلگەن ىرىكتەۋ كەزىندە ۇسىنىلعان كانديداتتار تىزىمىندە بولعانىن ايتادى.

«بۇل نە دەگەن ماسقارا! مەن پارتيانىڭ اتىنان ماجىلىسكە بارامىن، اتىراۋدىڭ ەكولوگيا ماسەلەسىن كوتەرەمىن دەگەن ۇمىتپەن كەلدىم. مەن كاسىپكەر ەمەسپىن، قاراپايىم تۇرعىنمىن. اتىراۋدىڭ ەكولوگيالىق جاعدايى ناشار. بۇل تۋرالى ايماقتىڭ ءاربىر تۇرعىنى وتە جاقسى بىلەدى. ەگەر مەنى تىزىمگە قوسپاسا، «بايتاق» قۇرامىنان كەتەمىن»، - دەدى كوشەنوۆ.

پارتيا توراعاسى: «ولار ەرتەرەك ۇسىنۋى كەرەك ەدى، كوشەنوۆتى وبلىستىق بيۋرو تىزىمگە ەنگىزگەن بولسا، جاعداي قارالادى»، - دەگەندى ايتتى. ازاماتحان ءامىرتاي ماجوريتار جۇيە بويىنشا سايلاۋعا تۇسەتىنىن ايتقان كەزدە، الماتى فيليالىنىڭ باسشىسى موسكوممەرتسبانك ديرەكتورلار كەڭەسىنىڭ بۇرىنعى توراعاسى بەيبىت اپسەنبەتوۆ ورىنان تۇرىپ، جيىننان شىعىپ كەتكەن.

«بايتاق» جاسىلدار پارتياسىنىڭ ءتىزىمى بويىنشا 20 ادام، ماجوريتارلى جۇيە بويىنشا 4 ادام ءماجىلىس سايلاۋىنا قاتىسادى.

سونداي-اق 3 اقپان كۇنى استانادا «اۋىل» حالىقتىق-دەموكراتيالىق پارتياسىنىڭ كەزەكتەن تىس XXII سيەزى ءوتىپ، ءماجىلىس سايلاۋىنا قاتىساتىن كانديداتتار ءتىزىمى بەكىتىلگەن بولاتىن: پارتيالىق تىزىممەن 25, ماجوريتارلى جۇيە بويىنشا 9 ادام ۇمىتكەر بولىپ وتىر. كانديداتتار قاتارىندا 2022 جىلعى كەزەكتەن تىس پرەزيدەنت سايلاۋىنا قاتىسقان جيگۋلي دايراباەۆ پەن تاياۋدا پارتيا قاتارىنا قوسىلعان قاراقات ابدەن، جۋرناليست اننا دانچەنكو بار. ءماسليحات سايلاۋىنا پارتيانىڭ 600-دەن استام مۇشەسى قاتىسپاق.

«اۋىلدىڭ» توراعاسى ءالي بەكتاەۆ پارتيانىڭ پارلامەنت سايلاۋىنا ءۇشىنشى رەت قاتىسقالى وتىرعانىن ايتتى.

«2017 جىلى العاش قاتىسقاندا كورسەتكىشىمىز كوڭىلدەن شىقپادى. ودان بەرى ءبىزدىڭ پارتيا بوي تۇزەپ جۇمىستى جانداندىرا ءتۇستى. پارتيانىڭ تولىق قۇرىلىمىن قالىپتاستىردىق. ساياسي ۇيىمعا اينالدىق دەپ تولىق ايتا الامىز. 2021 جىلعى سايلاۋدا ءبىز پارلامەنت ماجىلىسىنە وتە المادىق. دەگەنمەن 237 كانديداتىمىز جەرگىلىكتى ءماسليحاتتار دەپۋتاتى اتاندى. سونىمەن قاتار اۋىل اكىمدەرى سايلاۋىندا ءبىزدىڭ پارتيانىڭ 35 مۇشەسى اۋىل اكىمى بولىپ سايلاندى»، - دەدى ول.

بۇرىن ءمالىم بولعانداي، ەلىمىزدەگى ءماجىلىس پەن ءماسليحات سايلاۋى 19 ناۋرىزدا وتەدى. 18 اقپاندا ۇمىتكەرلەردى ۇسىنۋ مەن تىركەۋ توقتاتىلادى. سايلاۋ تۋرالى زاڭعا ەنگىزىلگەن وزگەرىستەرگە ساي، بيىل ماجىلىسكە 69 دەپۋتات – پارتيالىق ءتىزىم بويىنشا، 29 دەپۋتات – بىرمانداتتىق اۋماقتىق وكرۋگتەر بويىنشا سايلانادى. وبلىستار، رەسپۋبليكالىق ماڭىزى بار قالالار مەن ەل استاناسى ءماسليحاتتارىنىڭ 50 پايىزى ماجوريتار جۇيەمەن، 50 پايىزى پارتيالىق تىزىممەن سايلانادى.

Abai.kz