جاڭا وقۋ جىلىندا قازاقستاندا 380 مىڭنان استام بالا العاش رەت مەكتەپ تابالدىرىعىن اتتايدى. قازىر ولاردىڭ 320 مىڭعا جۋىعى، ياعني شامامەن 84%-ى مەكتەپكە قابىلدانىپ ۇلگەرگەن. بۇل تۋرالى وقۋ-اعارتۋ مينيسترلىگى حابارلادى.

قابىلدانعان بالالاردىڭ 296 مىڭعا جۋىعى مەملەكەتتىك، 23 مىڭعا جۋىعى جەكەمەنشىك مەكتەپتەردە ءبىلىم الادى. قالالىق مەكتەپتەرگە 191 مىڭعا جۋىق، اۋىلدىق مەكتەپتەرگە 128 مىڭعا جۋىق بالا قابىلدانعان. سونداي-اق ولاردىڭ اراسىندا ەرەكشە ءبىلىم بەرۋ قاجەتتىلىكتەرى بار 4 مىڭعا جۋىق بالا بار.

– جاڭا وقۋ جىلىندا 380 مىڭنان استام بالا مەكتەپ تابالدىرىعىن اتتايدى دەپ كۇتىلۋدە. بۇگىندە بولجانعان بالا سانىنىڭ 320 مىڭعا جۋىعى، ياعني شامامەن 84%-ى مەكتەپتەرگە قابىلداندى، – دەلىنگەن مينيسترلىك حابارلاماسىندا.

بالالاردىڭ 71%-دان استامى قازاق تىلىندە وقيدى

بيىل ءبىرىنشى سىنىپقا باراتىن بالالاردىڭ باسىم بولىگى قازاق تىلىندە ءبىلىم الۋدى تاڭداعان. مينيسترلىك مالىمەتىنشە، بولاشاق ءبىرىنشى سىنىپ وقۋشىلارىنىڭ 71%-دان استامى قازاق تىلىندە، 26%-دان استامى ورىس تىلىندە، ال 2,5%-عا جۋىعى باسقا تىلدەردە ءبىلىم بەرەتىن سىنىپتارعا قابىلدانعان.

سونىمەن قاتار وزگە ۇلت وكىلدەرىنىڭ 2 مىڭنان استام بالاسى قازاق تىلىندە وقيتىن بولادى.

– وزگە ۇلت وكىلدەرىنىڭ 2 مىڭنان استام بالاسى قازاق تىلىندە ءبىلىم بەرەتىن سىنىپتارعا قابىلداندى. بۇل اتا-انالاردىڭ بالالارىن قازاق تىلىندە وقىتۋعا دەگەن قىزىعۋشىلىعىنىڭ ارتىپ كەلە جاتقانىن كورسەتەدى، – دەپ حابارلادى ۆەدومستۆو.

اتا-انالاردىڭ كوبى قۇجاتتى ونلاين تاپسىرعان

ءبىرىنشى سىنىپقا قابىلداۋ ءالى جالعاسىپ جاتىر. وتىنىشتەر 2026 جىلعى 27 مامىر مەن 31 تامىز ارالىعىندا بەكىتىلگەن كەستەگە سايكەس كەزەڭ-كەزەڭىمەن قابىلدانادى. قازىر اتا-انالاردىڭ باسىم بولىگى مەكتەپكە بارماي-اق، قۇجاتتاردى ونلاين راسىمدەۋدى تاڭداعان. وتىنىشتەردىڭ 84%-عا جۋىعى ەلەكتروندى فورماتتا بەرىلگەن.

قۇجاتتاردى eGov.kz ەلەكتروندىق ۇكىمەت پورتالى نەمەسە eGov Mobile ءموبيلدى قوسىمشاسى ارقىلى تاپسىرۋعا بولادى. سونداي-اق اتا-انالار تاڭداعان مەكتەبىنە تىكەلەي بارىپ ءوتىنىش بەرە الادى. قۇجات قابىلداۋ وقۋ-اعارتۋ مينيسترلىگى مەن جاساندى ينتەللەكت جانە تسيفرلىق دامۋ مينيسترلىگىنىڭ بىرلەسكەن بۇيرىعى نەگىزىندە پيلوتتىق جوبا اياسىندا جۇرگىزىلىپ جاتىر.

ءبىرىنشى سىنىپ وقۋشىلارى قاي وڭىرلەردە كوپ؟

بيىل ءبىرىنشى سىنىپقا باراتىن بالالار سانى بويىنشا تۇركىستان وبلىسى كوش باستاپ تۇر. مۇندا 50 مىڭنان استام بالا مەكتەپ تابالدىرىعىن اتتايدى دەپ كۇتىلەدى. ودان كەيىن الماتى وبلىسى تۇر – 35 مىڭنان استام بالا. استانادا 33 مىڭ، الماتىدا 31 مىڭنان استام، ال شىمكەنتتە 29 مىڭنان استام بالا ءبىرىنشى سىنىپقا بارادى دەپ بولجانىپ وتىر.

مينيسترلىك بۇل وڭىرلەردەگى كورسەتكىشتىڭ جوعارى بولۋىن حالىق سانىنىڭ كوپتىگىمەن جانە تۋ دەڭگەيىنىڭ جوعارى بولۋىمەن بايلانىستىرادى. وقۋ-اعارتۋ مينيسترلىگى اتا-انالارعا قۇجاتتاردى ۋاقىتىلى راسىمدەۋدى ەسكەرتتى. ءبىرىنشى سىنىپقا قابىلداۋ 31 تامىزعا دەيىن جالعاسادى. قوسىمشا اقپاراتتى تاڭداعان مەكتەپتەن، eGov.kz پورتالى مەن eGov Mobile قوسىمشاسىنان الۋعا بولادى.

دەرەككوزى: el.kz سايتى

Abai.kz