اقپان ايىنىڭ 3 كۇنى "قازاقستان زاڭگەرلەر وداعى" قوعامدىق بىرلەستىگىنىڭ الدا بولاتىن ءماجىلىس پەن ءماسليحات سايلاۋى بويىنشا "ادال سايلاۋ ءۇشىن" شتاب مۇشەلەرىنىڭ بريفينگى ءوتتى. الماتى قالالىق شتابىنىڭ جەتەكشىسى بىلىكتى زاڭگەر باۋىرجان ماقۇلباەۆ مىرزامەن 19 ناۋرىزعا بەلگىلەنگەن كەزەكتى سايلاۋدىڭ ەرەكشەلىگى تۋرالى از-كەم سۇحباستتاسقان ەدىك.

- پرەزيدەنت 19 قاڭتاردا پارلامەنتتىڭ 7-ءشى شاقىرىلىمىن، جەرگىلىكتى ءماسيليحاتتاردى تاراتىپ، ەكى سايلاۋدى ەكى ايدان سوڭ ءبىر ۋاقىتتا وتكىزۋگە جارلىق شىعاردى. ەلىمىزدە كەزەكتەن تىس سايلاۋ وتكىزۋ سانگە اينالىپ بارا جاتقانداي اسەر قالدىرادى. ءسىزدىڭ ويىڭىز؟

- شىندىعىندا پارلامەنت سايلاۋى بولاتىنىن 6 اي بۇرىن پرەزيدەنت رەسمي جاريالاندى. تاريحتى تارازىلاي قاراساق، تاۋەلسىزدىك جىلدارىندا وتكەن ساياسي ناۋقانداردا كانديداتتار مەن ساياسي پارتيالارعا سايلاۋعا دايىندالۋعا مۇنداي مۇرسات، 6 اي مەرزىم بەرىلگەن ەمەس.

- ەسكى سايلاۋلارمەن سالىستىرعاندا تاعى دا قانداي ايىرماشىلىقتار بايقادىڭىز؟

- 2004 جىلدان باستاپ كۇشىنەن قالعان ماجىلىسكە كانديداتتاردى ءبىر مانداتتى وكرۋگتەر بويىنشا سايلاۋ جۇيەسىنىڭ قايتا قالپىنا كەلتىرىلۋى دەر ەدىم. وسى جولى 98 دەپۋتاتتىڭ 29-ى ماجوريتارلىق نەگىزدە سايلانعالى وتىر. ەندى جەرگىلىكتى سايلاۋ كوميسسيالارى كاسىبي نەگىزدە جۇمىس جاسايدى دەگەن ءسوز. تاعى دا ءبىر ايتا كەتەرلىگى ءماجىلىستىڭ جاڭا قۇرامىندا قازاقستان حالقى اسسامبلەياسىنىڭ كۆوتاسى بولمايدى. ايەلدەر مەن جاستارعا، ەرەكشە قاجەتتىلىكتەرى بار ادامدار ءۇشىن 30 پايىزدىق كۆوتا مانداتتاردى ءبولۋ كەزىندە نازارعا الىنادى.

- پارلامەتتەگى ورىننان دامەلى ەسكى دە جاڭا 7 پارتيا بار ەكەنى بەلگىلى. ولارعا دا جەڭىلدىك قاراستىرىلعان با؟

- ءيا، بار. پارتيالار كانديداتتارىن پارتيالىق تىزىممەن دە، ءبىر مانداتتى جۇيەمەن دە ۇسىنا الادى. پارلامەنتكە ءوتۋ شەگى بۇرىنعى 7 پايىزدان 5 پايىزعا تومەندەتىلدى.

- جاڭا ساياسي وزگەرىستەردەن كەيىن ەلدە جاڭا ەكى پارتيا ("بايتاق", "رەسپۋبليكا") تىركەلدى. ساياساتقا ارالاسقىسى كەلگەن قوعام بەلسەندىلەرىنە دە جول اشىلعان سياقتى.

- بۇل جولعى سايلاۋدىڭ باستى ەرەكشەلىگى سول بولىپ تۇر. ازاماتتار ماجىلىسكە پارتيا، قوعامدىق ۇيىمدار اتىنان عانا ەمەس، ءوزىن-ءوزى ۇسىنۋعا مۇمكىندىك الدى. جوعارىدا ايتقانىمداي بۇنداي ساياسي مۇمكىندىك 19 جىلدان كەيىن قايتا ورالىپ وتىر. سونداي-اق سايلاۋشىلاردىڭ دا تاڭداۋ ەركىندىگى كەڭەيىپ وتىر. ءماجىلىس پەن ءماسيليحاتتىڭ سايلاۋ بيۋللەتەندەرىندە العاش رەت "بارلىعىنا قارسى" دەگەن باعان بولادى. سايلاۋشىلار بەس بيۋللەتەن بويىنشا داۋىس بەرەدى (رەسپۋبليكالىق ماڭىزى بار قالالاردا-ءتورت بيۋلەتەن بويىنشا).

- اڭگىمەڭىزگە راقمەت!

Abai.kz