ازاتتىق راديوسىنا سۇحبات بەرگەن ءانشى-سازگەر بايان نۇرمىشەۆا 3 جاسىندا دومبىرامەن، 5 جاسىندا گيتارامەن ءان سالىپ، 9 جاسىندا ءان جازعانىن ايتادى. جەكە ءومىرى مەن شىعارماشىلىعىنداعى جاڭالىقتارمەن بولىسكەن ءانشى ارۋ جاقىندا كورەرمەندەر نازارىنا العاشقى بەينەكليپىن ۇسىنباق.

«قازاقتىڭ ءان بازارىندا سىرى مەن مۇڭىن قاتار ءورىپ «وزىنە شاق اسپانىمەن» ەشكىمدى كيمەلەمەي، ەشكىمدى كەيىتپەي قازاقى يبا مەن يناباتىن گيتارا شاناعىنان شىمىرلاتا بەينەلەي بىلگەن زامانداسىمىز ءجۇر. يباسى قايدان دەسەڭىز، ءان-الىپپەسىن ءداستۇرلى انمەن اشقان ەدى. يناباتى قايدان دەسەڭىز، كوكشەدەگى قازاقى اۋىلدا تۋىپ ەدى. وسى ءان ونەرىنىڭ قىر-سىرىن ءجۇردىم-باردىم ەمەس، ارنايى وقىدى. وزىنە كاسىپ ەتتى. شەبەرلىگىن شىڭدادى، ونەرپازدىق ءناسىپ بولدى. تابيعاتىنا ساي اندەردى ءدوپ باسىپ تاڭداي ءبىلدى، تىڭداۋشىسى تامساندى. ەندى جان تەبىرەنىسىن وزىنشە بەينەلەپ، اندەر شىعارا باستادى، ونىسى جۇرەكتەرگە جول تاپتى»،- دەپ جازىپتى ءبىزدىڭ بۇگىنگى كەيىپكەرىمىز تۋرالى ءانشى بەكبولات تىلەۋحان.

ءۇش  جاسىمدا دومبىرامەن، بەس جاسىمدا گيتارامەن ءان سالدىم

ازاتتىق راديوسىنا سۇحبات بەرگەن ءانشى-سازگەر بايان نۇرمىشەۆا 3 جاسىندا دومبىرامەن، 5 جاسىندا گيتارامەن ءان سالىپ، 9 جاسىندا ءان جازعانىن ايتادى. جەكە ءومىرى مەن شىعارماشىلىعىنداعى جاڭالىقتارمەن بولىسكەن ءانشى ارۋ جاقىندا كورەرمەندەر نازارىنا العاشقى بەينەكليپىن ۇسىنباق.

«قازاقتىڭ ءان بازارىندا سىرى مەن مۇڭىن قاتار ءورىپ «وزىنە شاق اسپانىمەن» ەشكىمدى كيمەلەمەي، ەشكىمدى كەيىتپەي قازاقى يبا مەن يناباتىن گيتارا شاناعىنان شىمىرلاتا بەينەلەي بىلگەن زامانداسىمىز ءجۇر. يباسى قايدان دەسەڭىز، ءان-الىپپەسىن ءداستۇرلى انمەن اشقان ەدى. يناباتى قايدان دەسەڭىز، كوكشەدەگى قازاقى اۋىلدا تۋىپ ەدى. وسى ءان ونەرىنىڭ قىر-سىرىن ءجۇردىم-باردىم ەمەس، ارنايى وقىدى. وزىنە كاسىپ ەتتى. شەبەرلىگىن شىڭدادى، ونەرپازدىق ءناسىپ بولدى. تابيعاتىنا ساي اندەردى ءدوپ باسىپ تاڭداي ءبىلدى، تىڭداۋشىسى تامساندى. ەندى جان تەبىرەنىسىن وزىنشە بەينەلەپ، اندەر شىعارا باستادى، ونىسى جۇرەكتەرگە جول تاپتى»،- دەپ جازىپتى ءبىزدىڭ بۇگىنگى كەيىپكەرىمىز تۋرالى ءانشى بەكبولات تىلەۋحان.

ءۇش  جاسىمدا دومبىرامەن، بەس جاسىمدا گيتارامەن ءان سالدىم

پارلامەنت ءماجىلىسى دەپۋتاتىنىڭ بۇل لەبىزى ونىڭ ءبىر كەزدەگى شاكىرتى، بۇگىندە قالىڭ قازاقتى انىمەن قوسا گيتارا سازىنا بولەگەن ءانشى-سازگەر بايان نۇرمىشەۆا تۋرالى. بايان قازىر قر قورعانىس مينيسترلىگى ءانسامبلىنىڭ ءانشىسى، وسى انسامبلدە 9 جىلدان بەرى جۇمىس ىستەيتىن ءانشى اقىن كۇلاش احمەتوۆانىڭ سوزىنە جازىلعان ءوزىنىڭ «جاقسىلىقتىڭ باعاسى» اتتى انىنە جاناتبەك بايتەكوۆتىڭ فوتو-ۆيدەوستۋدياسىندا بەينەكليپ ءتۇسىرۋ جۇمىستارىمەن اينالىسىپ جۇرگەنىن ايتتى.

«تاعى ءبىر ءان جيناعىن شىعارۋ ويدا بار، بىراق بۇل ماسەلە اندەردى قانشالىقتى جيناقتاۋىڭا بايلانىستى. جاقسى ءان تاڭداۋ، رەپەرتۋاردى بايىتۋ دەگەن ءبىزدىڭ كۇن سايىن اينالىسىپ جۇرەتىن جۇمىسىمىز. ءانشىنىڭ باعىن اشاتىن جاقسى ءاندى ارقاشان ىزدەپ جۇرەمىز، ءبىر كۇنىمىزدى بوسقا وتكىزبەيمىز. ءاردايىم ىزدەنىستە جۇرمەسەڭ ونەر ادامى رەتىندە وسپەيسىڭ، مەن وسىدان كەيىنگى بەس جىلدا قانداي بولار ەكەنمىن دەگەن ويدان مازاسىزدانامىن، ەگەر وسى بەس جىل ىشىندە كاسىبي تۇرعىدان جەتىلمەسەم، دەڭگەيىم وسپەسە ونەردە جۇرگەنىمنىڭ كەرەگى نە دەپ تە ويلايتىنىم راس.

رەپەرتۋارىمدا جيىرماعا جۋىق ءان بار، سونىڭ ىشىندە «قارعام-اۋدى» حالىقتىڭ جاسى-كارىسى تۇگەل جاقسى قابىلدادى دەي الامىن. ءاربىر ءانشىنىڭ ءوزىنىڭ ءستيلى، قالىپتاسقان ورنەگى بولادى عوي، مەن ساحناعا العاش شىعار كەزدە ويلاعان مۋزىكالىق جانرىم، ياعني وزىمە تاڭداعان جولىم - حالىق اندەرىن گيتارانىڭ سۇيەمەلدەۋىندە ورىنداۋ. بۇل بىزدە بولماعان دۇنيە جانە وسى جانردى ءارى قاراي دامىتۋ ماقساتىندا جۇمىس ىستەگىم كەلەدى، ءداستۇرلى ءاندى ساحنادا ورىنداۋمەن قاتار ونىڭ عىلىمي جاعىن زەرتتەۋمەن دە اينالىسۋىم مۇمكىن، سەبەبى بۇل سالانىڭ زەردەلەۋدى قاجەت ەتەتىن تۇستارى جەتكىلىكتى.

گيتارامەن ءان سالۋدان كەيىن گيتاراسىز، ەسترادامەن دە ءان سالىپ ءجۇردىم، ءوزىمدى باسقا باعىتتا سىناپ كورۋ دە ويىمدا بار. ماسەلەن مەن جوعارعى ءبىلىمدى قۇرمانعازى اتىنداعى ۇلتتىق كونسەرۆاتوريادان الدىم، وندا حالىق ءانى كافەدراسىنان قايرات بايبوسىنوۆتىڭ كلاسىندا وقىدىم، ياعني بولاشاقتا دومبىرامەن ءان ايتۋىم دا مۇمكىن. مۇنىڭ ءبارى بىراق ۋاقىتپەن كەلەتىن دۇنيە دەپ ويلايمىن، دومبىراڭمەن ءان ايتۋدىڭ كەزەڭى كەلىپ، سۇرانىسى ارتقان كەزدە نەگە ايتپاسقا»،- دەيدى بايان

ال ءانشى بولماعانىڭدا قانداي ماماندىقتى تاڭدار ەدىڭ دەگەن سۇراعىمىزعا: «ءتىپتى، ايتا المايمىن، ادامعا پايداسى بار دارىگەرلىكتى قالاۋىم مۇمكىن بە ەدى..، بىراق مەندە باسقا ماماندىق تاڭداۋ تۋرالى وي دا بولعان جوق. مەنىڭ ونەرگە كەلۋىمنىڭ ءوزى ءاۋ باستان بەلگىلى بولعان سياقتى، اللا مەنىڭ ماڭدايىما انشىلىكتى جازعان شىعار دەپ ويلايمىن. مەن ەس بىلگەلى مۋزىكانى جاقسى كورەمىن، ال ۇيدەگىلەر مەنىڭ 3 جاسىمدا دومبىرامەن، 5 جاسىمدا گيتارامەن ءان سالاتىنىمدى ايتادى، مەن ول كەزدە ەسىمدى دە ءجوندى بىلمەيمىن عوي، ال مۋزىكاعا دەگەن قۇشتارلىق پەن ىڭكارلىك بالا جاستان بويىمدا بار.

مەنى بالاسىنىپ، مۋزىكالىق اسپاپتى سىندىراسىڭ دەپ، قولىما كوپ بەرە قويمايتىن، ءبىر كۇنى گيتارانى الىپ تىعىلىپ ءان ايتىپ وتىرعانىمدى اپكەم كورىپ قالدى، ول كەزدە مەنىڭ جاسىم التىعا تولماعان ەدى. سول كەزدە اپكەم «سەن قاشان، قايدان ۇيرەنگەنسىڭ» دەپ قاتتى تاڭقالدى، ونىڭ تاڭقالعانىنا مەن تۇسىنبەدىم، سەبەبى مەنىڭ جاسىمداعى بارلىق بالا وسىلاي ءان ايتىپ، گيتارادا ويناي الادى دەپ ويلايتىنمىن، بۇل مەن ءۇشىن قالىپتى جاعداي بولىپ كورىنەتىن، سويتسەم ولاي ەمەس ەكەن عوي.

وسى ونەرىمدى كورگەن ۇلكەن اپكەم نۇرگۇل مەنى ءوزىنىڭ قاسىنا، ياعني كوكشەتاۋ قالاسىنا الىپ كەلىپ، مۋزىكالىق مەكتەپتىڭ كلاسسيكالىق گيتاريستەر دايىندايتىن بولىمىنە وقۋعا بەردى. العاشىندا اۋىلدان كەلگەندىكتەن، ورىس ءتىلىن ونشا بىلمەگەندىگىم سەبەپتى ساباققا بارعىم كەلمەي قينالاتىنمىن، كەيىن ۇيرەنىپ كەتتىم، ال ماعان گيتارادان ساباق بەرگەن ۇستازىم اندرەي پالەنوۆ ءوزىنىڭ ءىسىن سونشالىقتى سۇيەتىن، ساباق كەزىندە مەنىڭ باسقا دا پاندەردى وقۋىم كەرەكتىگىن، ءوزىنىڭ باسقا دا شارۋاسى بارىن ۇمىتىپ، جان-تانىمەن كىرىسەتىن ناعىز ۇستاز بولدى. وسى ۇستازىمنىڭ ارقاسىندا مەن گيتارانى مەڭگەردىم، ال ونەرگە قالاي كەلگەنىمدى دە بىلمەيمىن، ەس بىلگەلى ونەردەن الشاقتاعان كەزىم جوق»، - دەيدى گيتاراشى ارۋ.

ءداستۇرلى ءاندى گيتارامەن ورىنداۋدى ۇستازدارىم جاقسى قابىلدادى

مەكتەپ وقۋشىسى كەزىنەن «ءانشى بالاپان»، «اينالايىن» بايقاۋلارى ارقىلى رەسپۋبليكا سارايىنىڭ ساحناسىندا ءان ايتۋدى باستاعان بايان كاسىبي ءانشى رەتىندە ۇلكەن ساحناعا 2001 جىلى اياق باسىپ، «باۋىرجان-شوۋ»، «ايتىس» شارالارى ارقىلى حالىققا تانىلا باستادى. ول ءوز اندەرىنىڭ حالىققا كەڭىرەك تارالۋىنا مۇمكىندىك بەرىپ، كوپ ىقپال ەتكەن تالاي ءانشىنىڭ جۇلدىزىن جارقىراتىپ، تۇساۋىن كەسكەن «ءان مەن ءانشى» باعدارلاماسىنىڭ كونتسەرتى دەيدى.

«مەن كونسەرۆاتورياعا كەلگەندە ءداستۇرلى اندەردى ورىنداماۋشى ەدىم، اۋىلدا جۇرگەندە اقان سەرى، ءبىرجان سالدىڭ اندەرىن ەستىپ جۇرگەنىمىزبەن، اسا قاتتى ءمان بەرمەپپىن، بىرگە وسكەن قۇربىلارىم ورىستىلدىلەر بولدى، ونىڭ ۇستىنە مەن قۇرالپى جاستارعا ءداستۇرلى ءاننىڭ ەرەكشەلىگىن ايتىپ ۇعىندىراتىن ورتا دا بولمادى ما دەپ ويلايمىن. كونسەرۆاتورياعا كەلىپ، قايرات، بەكبولات، رامازان سياقتى ءداستۇرلى ءاننىڭ مايىن ىشكەن، وسى ورتادا قايناپ وسكەن اعالاردىڭ ءتالىمىن العان سوڭ حالىق انىنە، ءداستۇرلى مۋزىكاعا دەگەن سۇيىسپەنشىلىگىم ويانىپ، كوزقاراسىم وزگەردى.

مەن الماتىعا گيتارانى وقىتاتىن بولىمدە وقيمىن دەگەن ويمەن كەلگەم، ول مۇندا جوق بولىپ شىقتى. سونىمەن مەن ءداستۇرلى انگە ماماندانا باستادىم، ءبىر كۇنى ساباقتا وتىرىپ، قايرات اعايمەن «مەن گيتارامدى الىپ كەلسەم، ونىمەن قانداي اندەر ايتۋعا بولادى» دەگەن سىڭايدا اقىلداستىم. ءسويتىپ، ول كىسىگە ەستايدىڭ «قورلانىن» ورىنداپ بەرىپ ەدىم، اعاي ماعان ول ءاننىڭ ءداستۇرلى تۇردە قالاي بۇزىلماي ايتىلاتىنىن ۇيرەتىپ، كورسەتىپ بەردى. قايرات اعاي عانا ەمەس، كونسەرۆاتورياداعى ۇستازدارىمىزدىڭ كوبى ءداستۇرلى ءاندى گيتارامەن ورىنداۋ دەگەن ەكسپەريمەنتكە جاقسى قارادى، جىلى قابىلدادى»، - دەدى سۇحباتتاسىمىز ۇستازدارىنىڭ ءوز ستيلىنە دەگەن كوزقاراسى جايىندا.

ونەردە جۇرگەن جاستاردىڭ قامقور كوڭىلگە، شىن جۇرەكتەن ايتىلعان اقىل-كەڭەسكە مۇقتاج بولاتىنى بەلگىلى. قيىندىعى مەن قىزىعى قاتار جۇرەتىن وسى ءبىر اۋىرلاۋ جولدا تەمىرقازىقتان اداستىرماي باعىت سىلتەۋشىلەردىڭ ورنى ەرەكشە. بايان ونەر جولىندا جاقسى ادامدارعا كوپ كەزىككەنىن، ۇيرەنەمىن دەگەن ادامعا ءاربىر ۇستازدىڭ شەبەرلىگى وزىندىك ءىز قالدىراتىنىن ايتادى.

«ادام ءومىردى ءومىردىڭ وزىنەن كورە ءجۇرىپ ۇيرەنەدى عوي، ال ۇستاز دەگەن ول شىن مانىندەگى ۇستاز بولسا، ونىڭ سەنىڭ ومىرىڭدەگى ورنى ارقاشان ەرەكشە. مەن ءۇشىن قولىمنان جەتەلەپ، بىلگەنىن ۇيرەتىپ، ونەر مايتالماندارىمەن تانىستىرىپ، ونەر جولىنا باعىتتاعان اپكەم نۇرگۇلدىڭ، گيتارادان ساباق بەرگەن اندرەي لەونيدوۆيچتىڭ، العاشقى ۇستازىم بالحاديشا اپايدىڭ، كونسەرۆاتورياداعى ۇستازدارىمنىڭ ورنى ەرەكشە. اللا مەنى وسىنداي جاقسى ادامدارعا جولىقتىردى. مەنىڭ العاشقى پروديۋسەرىم مارقۇم بيعازى تۇتقابەكوۆ ەدى، قازىر قاعاز جۇزىندە شارتقا وتىرماي-اق، پروديۋسەردىڭ قىزمەتىن ادامگەرشىلىك تۇرعىدا، دوستىق راۋىشتە اتقارىپ جۇرگەن ونەردەگى دوسىم، ارىپتەسىم جاناتبەك بايتەكوۆ».

العاشقى ءانىمدى 9 جاسىمدا جازدىم

كورەرمەن مەن تىڭدارماندى ساحناداعى بەينەسى مەن ءان ونەرىندەگى وزگەلەرگە ۇقساي بەرمەيتىن ورنەگىمەن سۇيسىندىرگەن باياننىڭ گيتارا شەرتىپ، ءان سالۋمەن قاتار ءان جازاتىن سازگەرلىك ونەرى دە بار. بۇل جايىندا ءانشى-سازگەر: «ءان جازۋىما نەسىپبەك ايتۇلىنىڭ بالالارعا ارنالعان جىر جيناعىنىڭ قولىما ءتۇسۋى سەبەپ بولدى، العاشقى ءانىم 9 جاسىمدا سول اعامىزدىڭ «بالمۇزداق» دەگەن ولەڭىنە جازىلدى، كەيىننەن تاعى دا سول كىسىنىڭ «جولىڭ بولسىن» دەگەن ولەڭىنە ءان شىعاردىم، ارينە، مۇنىڭ ءبارى بالالىق اۋەستىكپەن شىعارىلعان اندەر بولدى، ءسال دە بولسا كاسىبي دەڭگەيى بار دەگەن اندەرىم - ستۋدەنتتىك كەزدە اقىن ساعي جيەنباەۆتىڭ سوزىنە جازعان «سەنەمىن ءبىر باقىتقا» دەگەن ءانىم، بۇل ءاندى ءانشى قۇربىم بەيبىت سەيدۋاليەۆا ورىندادى، ودان كەيىن دە «كوڭىلىڭدە تۇرۋ كەرەك ءبىر ادام»، يسرايىل ساپارباي اعامىزدىڭ «دوسىم»، «ءومىرىم-اي» دەگەن ولەڭدەرىنە، كۇلاش احمەتوۆا اپايىمىزدىڭ «جاقسىلىقتىڭ باعاسى» دەگەن ولەڭدەرىنە ءان جازدىم.

ءوزىمدى سونشاما مىقتى كومپوزيتورمىن دەپ ايتا المايمىن، قازىرگىدەي ەكىنىڭ ءبىرى ءان جازاتىن، بىرىنەن-ءبىرى اينىمايتىن اندەر كوبەيگەن كەزدە ءان جازۋدىڭ كەرەگى دە جوق شىعار دەگەن ويعا كەلەمىن. كەزىندە جازىلىپ، ءالى كۇنگە ەلدىڭ ەسىندە جۇرگەن اندەردى كادىمگىدەي ءبىلىمدى سازگەرلەر جازدى عوي، ال مەنىڭ كومپوزيتورلىق ءبىلىمىم جوق، سوندىقتان وسى كەزگە دەيىن جازىلعان اندەردى اعا بۋىن ونەرپازدارمەن، ءان ارلەۋشىلەرمەن كەڭەسە وتىرىپ، جازىپ كەلدىم.

ەندىگى ۋاقىتتا تىڭدارماننىڭ كوڭىلىنەن شىعاتىن جاقسى اندەر بولسا جازىپ قالارمىن، ەگەر ونداي بولماسا قاجەتى جوق دەپ ەسەپتەيمىن، ساحناعا الىپ شىعۋعا باتىلىم جەتپەي، «ۇيدە جاتقان» اندەرىم دە بارشىلىق. جازعان اندەرىمنىڭ كوبىن ءوزىم ورىندايمىن. مەنىڭ رەپەرتۋارىمداعى اندەردىڭ ىشىندە ءشامشى قالداياقوۆتىڭ، كاكىمبەك سالىقوۆتىڭ، قۇربىم روزا القوجانىڭ ءبىر -ءبىر اندەرى عانا بار، قالعاندارى حالىق اندەرى مەن ءوزىمنىڭ اندەرىم. نەگە ەكەنىن بىلمەيمىن، ماعان جانىما جاقىن، ءوزىمنىڭ ەرەكشەلىگىمە ساي ءان تابۋ قيىن. مىسالى روزانىڭ «جىبەكتىڭ ەلى» ءانىن تىڭداعاننان-اق ماعان ساي ءان ەكەنىن بىردەن ءبىلدىم. وسىنداي اندەردى كوپ كەزدەستىرمەيمىن»، - دەدى.

جۇبانىش پەن تىرەكتى دىننەن تاپتىم

ءومىردىڭ اق پەن قارادان، قۋانىش پەن قايعىدان تۇراتىنى امبەگە ايان، ءبىزدىڭ كەيىپكەرىمىز ءانشى باياننىڭ دا باسىنان وتكەن قايعىلى جاعداي تۋرالى حابار قالىڭ قازاققا تاراپ كەتتى، باياننىڭ ومىرلىك سەرىگى جاسبولات ناۋقاستانىپ، قاپيادا باقيعا ساپار شەكتى. ءوزى ايتاتىن اندەگىشە «گاككۋلى مەكەن، اققۋلى مەكەن - جايىققا»، اق نەكەسىن قيدىرىپ كەلىن بولىپ تۇسكەن باياننىڭ ارۋ جايىقتىڭ جاعاسىندا تولەگەنىنەن ايىرىلعان جىبەكتىڭ تاعدىرىن قايتالاپ، سىڭارسىز اققۋدىڭ كۇيىن كەشىپ قالعان جايى بار. قازىر ەكى جارىم جاستاعى ءىلياس ەسىمدى ۇلىن تاربيەلەپ وتىرعان بايان جۇبايى جايىندا بىلاي دەيدى:

جۇبايلىق ءومىرىم وسىنداي قايعىلى جاعدايعا ۇشىراعانىمەن، مەن ءوزىمدى باقىتسىز ايەل بولدىم دەپ ايتپايمىن، سۇيگەن ادامىما قوسىلدىم، سۇيگەن جارىم ەكەۋىمىزدىڭ ومىرگە اكەلگەن ءسابيىمىز بار، وسى ءۇشىن دە مەن باقىتتىمىن. جولداسىم جاسبولات قورعانىس مينيسترلىگى ءانسامبلىنىڭ جەتەكشىسى بولىپ قىزمەت اتقاردى، ونىڭ وسى ۇجىمعا، جالپى قازاقتىڭ ونەرىنە سىڭىرگەن ەڭبەگى زور دەپ ايتا الامىن، بىراق ول ەشقاشان مەن وسىنى جاسادىم دەپ ىستەگەن ىسىنە جارناما جاساعان ادام ەمەس.

جۇمىسى وزىنە ۇنايتىن، وعان كەرەگى دە سول بولاتىن، ودان ارتىق كوزگە ءتۇسۋدى، ۇپاي جيناۋدى ول ماقسات تۇتقان جوق. ونەردى جان-تانىمەن ءسۇيىپ، جۇمىسىنا ادال بەرىلگەن جولداسىم كوپشىل، ەر كوڭىلدى، جومارت، اشىق ازامات ەدى. كوبىنە ول ءتىرى داۋىستا ءان شىرقاۋدىڭ جاقتاۋشىسى بولدى، وسى انسامبلدەگى سيمفونيالىق وركەستردىڭ جۇمىسىن جانداندىردى، وسى وركەستر قۇرىلعالى بەرى ۇلكەن شارالار مەن ايگىلى انشىلەردىڭ كونتسەرتتەرىنە قاتىسىپ ءجۇردى.

اللا تاعالا ادامنىڭ بولمىسىن قىزىق جاراتقان عوي، مىسالى بالانىڭ العاشقى ماحابباتى اتا-اناسى بولادى، سول اكە-شەشەڭ بولماسا ءوزىڭدى ەشكىم ەمەستەي سەزىنىپ، كادىمگىدەي جۇدەپ قالاسىڭ، ەرجەتىپ ەسەيگەن شاقتا جاستىق ماحابباتىڭ كەزىگىپ، اتا-اناڭا دەگەن ماحابباتىڭ ول كىسىلەردىڭ الدىنداعى بورىش-پارىزىڭ سياقتى سەزىمگە اۋىسادى، ءسويتىپ ءجۇرىپ وتاۋ قۇراسىڭ، كەيىن ومىرگە بالا كەلگەن سوڭ جۇبايىڭا دەگەن ماحاببات تا ءبىر سىيلاستىق سياقتى سەزىمگە اينالىپ، بار تىلەگىڭ بالاڭنىڭ ۇستىندە بولادى، جاراتقاننىڭ پەندەسىنە سىيلاعان وسىنداي ىزگى قاسيەتتەرى مەن ىستىق سەزىمدەرىنىڭ ارقاسىندا ادامنىڭ ومىرگە دەگەن تالپىنىسى تۋىندايدى. مەن دە وسىنداي ۇلى سەزىم سىيلاعانى ءۇشىن اللاعا ريزامىن، ومىردە قايعى-قاسىرەت دەگەن قۋانىشپەن قاتار جۇرەتىن ۇعىم عوي، ارينە، "تاس تۇسكەن جەرىنە اۋىر" دەگەن، مەنىڭ قايعىمنىڭ قانشالىقتى اۋىرلىعى ول وزىمە عانا ايان، دەگەنمەن اللانىڭ جاقسىلىعىنان كۇدەر ۇزگەنىم جوق، قايعىنىڭ دا سوڭىنان قۋانىش سىيلايمىن دەسە شاراپاتى مول اللانىڭ ەركىندە. سوندىقتان دا مەن جاقسىلىقتان ءۇمىتتىمىن.

جىبەكتىڭ ەلىنە، ورالدىڭ الاتاۋ دەگەن كادىمگى قۇمدى اۋىلىنا كەلىن بولىپ ءتۇستىم. بۇل ادامدارى سونداي ەرەكشە «مىناۋ انا ءۇيدىڭ مۇلكى نەمەسە بوتەن ءۇيدىڭ شارۋاسى» دەپ بولە-جارمايتىن، قوناق كەلسە بىرگە كۇتىسىپ، بىرەۋدىڭ بالاسى كورشىنىڭ ۇيىنە سۋ تاسىپ جۇرەتىن قازاقى مەيىرباندىعىنان، ۇيىمشىلدىعىنان اجىراماعان اۋىل ەكەن، وسى ءبىر اۋىلعا سونشا ريزا بولعانمىن. مەن قازىر دە جىل سايىن جازدا وسى اۋىلعا اسىعىپ بارىپ تۇرامىن، قايىن جۇرتىممەن اراقاتىناسىمىز ۇزىلگەن جوق.

قازاق ەستراداسىن زەرتتەپ جۇرگەن ءبىر قۇربىمنىڭ ايتۋىنشا، ءبىزدىڭ ەسترادادا ءۇش ساتى قاتتى دامىعان ەكەن، ونىڭ ءبىرىنشىسى، ءاربىر ءانشىنىڭ رەپەرتۋارىندا ونىڭ داۋىسىنا قاراماستان ءبىر حالىق ءانىنىڭ بولۋى، ەكىنشىدەن، كەزدەسىپ جۇرگەن قىز بەن جىگىتتىڭ داۋىس ىرعاقتارىنىڭ كەلۋ-كەلمەۋىنە قاراماي دۋەتپەن ءان سالۋى جانە جۇبايىنان ايىرىلعان انشىلەردىڭ ءانى، ياعني، «جەسىردىڭ جوقتاۋى» ەكەن، سول ايتپاقشى، مەنەن دە وسى قازادان كەيىن جىلاڭقى ءان كۇتكەن ادامدار، ءتىپتى «نەگە سونداي ءان جازبايسىڭ» دەپ ەسكەرتكەندەر بولدى.

بىراق مەنىڭ جىگەرلەندىرەتىن، رۋحتاندىراتىن ءان جازدىرعىم كەلىپ ءجۇر، سۇيگەن جارىما، وتاۋىمنىڭ يەسى - ازاماتىما دەگەن سەزىمىمدى انمەن دە، سوزبەن دە جەتكىزۋ مۇمكىن ەمەس، ول مەنىڭ جۇرەگىمدە ماڭگى وشپەيتىن سەزىم ەكەنىن ءوزىم بىلەمىن، ال جاڭاعىداي قايعىدان قان جىلاعان ءان ايتپايمىن دەپ شەشتىم. باسىما وسىنداي قايعى ءتۇسىپ، ازا تۇتىپ وتىرعان كۇندەرىمدە مەن جۇبانىشتى دا، تىرەكتى دە اللانىڭ حاق جولىنان، ءدىنىمىز يسلامنان الدىم، بارلىق سۇراعىما جاۋاپتى دا دىننەن تاپتىم»،- دەيدى ءانشى بايان نۇرمىشەۆا.

ەلەونورا ياكيا،
«ازاتتىق راديوسى»، 14.08.2009